U Červieńskim rajonie mužčyna złaviŭ 8 ryb i zapłaciŭ 5800 rubloŭ
Pavodle materyjałaŭ śledstva, u mai 50‑hadovy žychar vioski Stary Prud rybačyŭ na vadaschoviščy Viedryca. Dla łoŭli jon vykarystaŭ zabaronienyja pryłady — pastki, jakija pakinuŭ u vadzie, a sam viarnuŭsia dadomu, piša «Minskaja praŭda».
Praz tydzień mužčyna pryjechaŭ zabrać zdabyču. U pastkach akazałasia vosiem ryb roznych vidaŭ. Jon skłaŭ ich u pakiet i schavaŭ u zaplečnik, ale pa darozie byŭ spynieny supracoŭnikam pryrodaachoŭnaj słužby.
Rybak pryznaŭ, što karystaŭsia niezakonnymi srodkami łoŭli, i pakazaŭ miescy, dzie jany byli ŭstanoŭlenyja. Škoda, naniesienaja pryrodzie, skłała bolš za 5800 rubloŭ. Hetuju sumu mužčyna dobraachvotna kampiensavaŭ całkam.
Jaho dziejańni kvalifikavanyja jak niezakonnaja zdabyča ryby z vykarystańniem zabaronienych pryład padčas nierastavoj zabarony. Svaju vinu jon pryznaŭ poŭnaściu, supracoŭničaje sa śledstvam i vydaŭ usie zabaronienyja srodki łoŭli.
Kamientary