Cichanoŭskaja atrymała ŭznaharodu ŭ Polščy i raskazała pra razmovu, padsłuchanuju ŭ «Žabcy»
Śviatłana Cichanoŭskaja była ŭznaharodžana mižnarodnaj Premijaj karala Eryka Pamieranskaha ŭ Polščy. Siońnia jaje ŭručyli joj u horadzie Darłova na Bałtycy, piša Reform.news.
Premija była prysudžana za dziejnaść pa sadziejničańni demakratyčnym pieraŭtvareńniam u Biełarusi i ŭmacavańni adnosin krainy ź jeŭrapiejskaj supolnaściu.
Premija zasnavanaja ŭ Darłavie ŭ honar narodžanaha ŭ hetym horadzie karala Danii, Šviecyi i Narviehii Eryka Pamieranskaha (1381 — 1459) — pieršaha manarcha, jaki ŭznačaliŭ try krainy ŭ miežach Kalmarskaj unii.
Śviatłana Cichanoŭskaja, vystupajučy paśla ŭručeńnia premii, padkreśliła, što biełarusy, ukraincy i palaki zmahajucca za adny i tyja ž kaštoŭnaści.
«Učora ŭ kramie «Žabka» na vulicy Morska ja padsłuchała cikavuju razmovu.
Pradaviec i pažyły pan abmiarkoŭvali mienavita hetuju ŭznaharodu. Pradaviec skazaŭ: «Uznaharodu znoŭ uručajuć, ale nie našym ludziam». «Nu tak, — vietliva adkazaŭ pan, — ale biełarusy taksama našy. Siońnia jany zmahajucca za svabodu, jak i my tady».
I jon mieŭ racyju. Biełarusy, ukraincy i palaki — my ŭsie ŭdzielničajem u adnoj i toj ža baraćbie. My zmahajemsia za adny i tyja ž kaštoŭnaści i supraćstaim adnamu i tamu ž złu», — skazała jana.
«Chacia na hetym dypłomie napisana majo imia, ja chacieła b pryśviacić hetuju ŭznaharodu tysiačam biełarusaŭ, jakija praciahvajuć zmahacca za svabodu, niahledziačy na strach, represii i vyhnańnie. Niekatoryja dziejničajuć padpolna, niekatoryja dapamahajuć, pieradajučy infarmacyju. Niekatoryja padtrymlivajuć palitviaźniaŭ i ich siemji. Niekatoryja zmahajucca za Ukrainu. Niekatoryja prasoŭvajuć biełaruskuju movu i kulturu, i siońnia heta taksama forma supracivu», — dadała Cichanoŭskaja.
Jana adznačyła, što nie imknułasia stać palitykam, ale časam žyćcio nie pytajecca, ci hatovyja my.
«Jano prosta stavić nas pierad vybaram: pryniać niespraviadlivaść abo supraćstajać joj. I ja prosta zrabiła toje, što ličyła pravilnym dla svajoj siamji i svajoj krainy. Jak skazaŭ Andžej Pačobut, my prosta starajemsia pavodzić siabie hodna ŭ niahodnyja časy», — skazała jana.
Cichanoŭskaja adznačyła, što Polšča razumieje baraćbu biełarusaŭ jak nichto inšy. Palaki viedajuć, jak heta — žyć pad tyranijaj i zmahacca, kali nadziei amal nie zastałosia. Jana nahadała, što ŭ palakaŭ i biełarusaŭ jość ahulnaje ŭ historyi i kultury.
«My razam zmahalisia ŭ paŭstańniach suprać Rasijskaj impieryi, i ŭ našaj historyi nikoli nie było kanfliktaŭ, jakija mahli b padzialić našy narody. U 2020 hodzie Polšča adčyniła svaje dźviery i sercy dla tysiač biełarusaŭ, jakija ŭciakali ad represij, dla niezaležnych ŚMI, pravaabaroncaŭ, ludziej kultury i biźniesu.
My razhladajem Polšču jak prykład i madel dla Biełarusi. My chočam, kab Biełaruś była padobnaja da Polščy — mocnaj, demakratyčnaj i kvitniejučaj. Kaliści my adnovim našu krainu i vierniemsia ŭ jeŭrapiejskuju siamju narodaŭ, da jakoj my histaryčna naležym», — skazała jana.
Jana zaklikała Polšču zachoŭvać padtrymku.
«Ja prašu vas zastavacca viernymi hetym pryncypam, praciahvać padtrymlivać Ukrainu i Biełaruś. My nie dazvolim dyktataram nas šantažavać. Dyktataraŭ nielha ŭłahodzić, ich nielha pieravychavać — ź imi možna tolki zmahacca. Tamu ja prašu praciahvać akazvać cisk na režym. Padtrymlivajcie žorstkija sankcyi, pakul nie ŭbačym realnych źmien: pakul nie buduć vyzvaleny ŭsie palityčnyja źniavolenyja, nie spyniacca represii i Biełaruś nie pierastanie być častkaj vajny Rasii», — skazała jana.
Cichanoŭskaja taksama paŭtaryła zaklik adroźnivać biełaruski režym i biełaruski narod.
Ciapier čytajuć
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ30
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary