Statkievič zmadelavaŭ padziei, što mohuć razharnucca ŭ Biełarusi ŭvosień

Statkievič spačatku nahadvaje pra svoj artykuł za 19 maja, dzie jon razhledzieŭ varyjanty praciahu Maskvoj vajny suprać Ukrainy: 1) Mabilizacyja; 2) Pašyreńnie linii bajavych sutyknieńniaŭ za košt Biełarusi; 3) Prymianieńnie taktyčnaj jadziernaj zbroi.

«Analiz ich pierśpiektyŭ ja ŭžo zrabiŭ u tym tekście, ale ciapier źjaŭlajecca šmat dadatkovaj infarmacyi, pa jakoj možna mierkavać, da jakoha z varyjantaŭ praciahu vajny schilajucca ŭ Kramli. Prynamsi, pakul, — piša jon, —

U Rasii rychtujucca da novaj mabilizacyi paśla vybarčaj parłamienckaj kampanii ŭ vieraśni.

Pa roznych mierkavańniach ukrainskich vajennych analitykaŭ, u RF moža być mabilizavana ad paŭmiljona da miljona novych sałdat, jakija ŭžo ŭ listapadzie pačnuć nakiroŭvacca na front. Taksama, ŭkrainski bok zajaŭlaje, što na biełaruskaj terytoryi kala miažy z Ukrainaj viadziecca intensiŭnaje budaŭnictva vajennaj infrastruktury. Z ulikam hetaha možna prahnazavać, što Maskva płanuje nakiravać častku svaich vojskaŭ na našu terytoryju, kab znoŭ pasprabavać atakavać Ukrainu z poŭnačy i, jak minimum, adciahnuć jaje vajskovyja siły ź inšych na «Biełaruski» front.

A taksama, pasprabavać paŭtaryć praryŭ 2022 hoda na Kijeŭ.

Apošniaje, z ulikam bałocistaj miascovaści na bolšaj častcy biełaruska-ŭkrainskaj miažy dy pieravahi Ukrainy ŭ dronach, maje mała šancaŭ na pośpiech. Ale z našaj terytoryi rasijskija vojski zdolejuć nanosić pa Ukrainie masavyja dakładnyja pavietranyja ŭdary dronami i rakietami, kab prymusić jaje zdacca.

Ukrainskija vojski ŭ adkaz pačnuć nanosić masavyja ŭdary pa rasijskich vajennych kamunikacyjach, technicy, składach, punktach kiravańnia, miescach dysłakacyi ŭ nasielenych punktach. Pad udarami apynucca našy darohi, masty, harady, vajennyja i naftachimičnyja pradpryjemstvy.

Asabliva, ŭ pałasie dasiažnaści najbolš dziejsnych zaraz ukrainskich dronaŭ siaredniaj dalnaści Hornet sa štučnym intelektam — 150 kiłamietraŭ ad ukrainskaj miažy.

U hetaj pałasie znachodziacca Homiel, Brest, Mazyr, Pinsk i šmat mienš bujnych haradoŭ i miastečak. Kali ž rasijcy pačnuć znoŭ nanosić udary pa abjektach enierhietyki Ukrainy, jak heta ŭžo było minułaj zimoj, ale i z našaj terytoryi, to my atrymajem «lusterkavy» adkaz — dalnabojnyja ŭdary pa našych anałahičnych abjektach pa ŭsioj terytoryi Biełarusi.

Razbureńni budynkaŭ u nasielenych punktach, pramysłovaści dy infrastruktury, achviary siarod hramadzianskaha nasielnictva, bujnyja harady biez elektryčnaści i ciapła — takaja budzie płata tolki za pasiŭny saŭdzieł u ahresii. A jość jašče nastupstvy ad prostaha znachodžańnia čužych vojskaŭ na našaj ziamli padčas vajny.

Sałdaty, jakija viedajuć, što ich čakaje śmierć siarod paleskich bałotaŭ, i jakija chočuć napaśledak «hulnuć». I jakija ŭpeŭnieny, što ŭsio miascovaje nasielnictva pavinna za «abaronu ad «ukranacystaŭ» vykonvać ich lubyja žadańni. Tym bolej, što im ničoha dadatkovaha nie pahražaje za zabojstvy, rabavańni, zhvałtavańni «miascovych». Bo, kali sprava i dojdzie da suda, što sumnieŭna, to ź jaho jany adpraviacca nie ŭ turmu, a, znoŭ ža, na front.

U historyi Biełarusi ŭžo byŭ dośvied doŭhaterminovaha znachodžańnia maskoŭskich vojskaŭ na našaj terytoryi padčas maskoŭska-biełaruskaj vajny 1654—1667 hadoŭ, jakuju ŭ Rasii potym saramliva nazvali «polskaj», i ŭ jakoj zahinuła bolej za pałovu biełarusaŭ.

Ja nie budu tut pisać pra ŭsie žachi toj vajny – ich apisańnie zojmie vialikuju knihu, piša Statkievič. — Ale pryviadu adzin prykład. U 1654 hodzie maskoŭskija vojski asadzili Mahiloŭ. Asada była niadoŭhaj, bo pieravažna pravasłaŭnyja haradžanie sami adčynili varoty horada «adnaviercam». Potym, bližej paznajomiŭšysia z «bratami pa viery», u 1661 hodzie hetyja mirnyja ludzi padniali paŭstańnie i amal pahałoŭna vyrazali siamitysiačny harnizon «vyzvalicielaŭ».

Nu a ŭ siońniašniaj situacyi jość jašče doŭhaterminovyja nastupstvy, bo vyvieści rasijskija vojski z našaj ziamli, navat paśla zamireńnia pamiž Rasijaj i Ukrainaj, budzie nadzvyčaj składana. Nie zdoleŭšy zachapić vialikuju krainu, vyrašać prychapić choć mienšuju, kab apraŭdać hibiel i kalectvy sotniaŭ tysiač svaich sałdat u vačach prostych rasijcaŭ i kab było što abjavić pieramohaj.

Biezumoŭna, režym, jaki panuje ŭ Biełarusi, jak moža ŭpirajecca, kab paźbiehnuć takoha scenaru. Ale, pry hłabalnaj zaležnaści ad Maskvy, admovicca ad vykanańnia «sajuznaha» abaviazku robicca ŭsio ciažej.

Za dziesiacihodździ ŭtrymańnia va ŭładzie raniej ci paźniej prychodzicca płacić. «Za tak» padobnych bonusaŭ nie dajuć.

Raniejšaja płata našaj movaj, historyjaj i kulturaj tolki stvaryła pieradumovy dy abudziła apietyt da poŭnaha pahłynańnia ciapier užo «iskusstviennoj nacii, kotoraja hovorit na odnom s nami jazykie». Tym bolej, što Maskvie patrebny novyja sałdaty i vajenny płacdarm dla nastupnych vojn.

Tak što ciapier płataj za «praciah bankieta» dla adnoj siamji mohuć stać losy našaj dziaržavy, nacyi i miljonaŭ biełarusaŭ», — napisaŭ Mikałaj Statkievič.

• 33
• 1
• 2
• 1
• 3
• 4
• 1
• 0