Statkievič: Jadziernaja treniroŭka ŭ Biełarusi — heta pahroza, najpierš, Jeŭropie

«Kali raniej rasijskaja aficyjnaja prapahanda niejak jašče mahła padtrymlivać u svaich spažyŭcoŭ vieru ŭ chutkuju pieramohu nad Ukrainaj, to paśla ździeklivaha dazvołu prezidenta Zialenskaha na skukožanaje śviatkavańnie sakralnaj dla rasijcaŭ daty 9 maja i masavaha zvarotnaha ŭdaru ŭkrainskich bieśpiłotnikaŭ pa Maskvie ŭtojvać realny stan rečaŭ stała niemahčymym.

Pa aŭtarytecie Kramla ŭ vačach paddanych byŭ naniesieny mahutny ŭdar, što ŭ vačach nasielnikaŭ Kramla źjaŭlajecca hańbaj i pahrozaj adnačasova. Mahčyma, hetyja padziei prymusiać ich bolš realna aceńvać chadu i pierśpiektyvy vajny.

Hałoŭnaja z vysnoŭ — Ukraina zdoleła pieravieści vajnu na inšy technałahičny ŭzrovień, dzie, dziakujučy dapamozie svaich jeŭrapiejskich sajuźnikaŭ, enierhii svajho volnaha biźniesu i talentu inžynieraŭ, atrymlivaje pieravahu.

Niaciažka acanić pierśpiektyvy raźvićcia padziej. Pamyłka ŭ acency matyvaŭ jeŭrapiejskich krain, jakija ad pačatku kanfliktu ličylisia Maskvoj tolki pakorlivymi maryjanietkami Vašynhtona, viadzie da taho, što ich padtrymka Ukrainy nie spyniajecca, niezaležna na spadziavańni Kramla na źmieny ŭ pazicyi Amieryki.

Heta značyć, što finansavaja, vajennaja, technałahičnaja i palityčnaja dapamoha Kijevu budzie tolki narastać, nie zvažajučy na pazicyju Vašynhtona.

Heta značyć, što technałahičnaja pieravaha Ukrainy na poli boju, abapirajučysia na praktyčna nieabmiežavanaje zabieśpiačeńnie finansami, elektronnymi, a pry patrebie, i miechaničnymi kampanientami budzie tolki raści.

Heta značyć, što ŭkraincy ŭ chutkim časie zdolejuć nivieliravać za košt pavietranych i naziemnych dronaŭ kolkasnuju pieravahu Rasii, na jakuju tak spadziavałasia Maskva.

Heta značyć, što USU zdolejuć užo ŭ nastupnym zimnim siezonie nanosić ničym nie abmiežavanyja ŭdary ŭłasnymi balistyčnymi rakietami pa enerhietyčnych abjektach RF, što va ŭmovach rasijskaj zimy, nie raŭnuj našmat bolš chałodnaj za ŭkrainskuju, moža pryvieści da maštabnych humanitarnych katastrof u Rasii.

Heta značyć, što Ukraina chutka zdoleje razharnuć ułasnyja arbitalnyja hrupoŭki spadarožnikaŭ dla vyviedki i suviazi.

Urešcie, usio heta značyć tupikovuju vajennuju situacyju dla Maskvy, kali tam nie buduć znojdzienyja novyja, bolš efiektyŭnyja varyjanty praciahu vajny.

Jakija heta mohuć być varyjanty:

1) mabilizacyja. Ale va ŭmovach rostu technałahičnaj pieravahi Ukrainy na poli boju jana moža pryvieści tolki da rezkaha pavieličeńnia bajavych strat, niezadavolenaści ŭ hramadstvie, emihracyi mužčyn, rostu vydatkaŭ na vypłaty siemjam zahinułych, źmianšeńnia kolkaści zaniatych u ekanomicy.

2) Pašyreńnie linii bajavych sutyknieńniaŭ za košt Biełarusi. Paŭtor apieracyi 2022 hoda pry adsutnaści faktaru raptoŭnaści i hatoŭnaści ŭkrainskaha boku nie atrymajecca. Prymušeńnie da ŭdziełu ŭ vajnie biełaruskaha režymu vialikaj karyści nie pryniasie, bo navat napad usich 23 tysiač suchaputnych vojskaŭ Biełarusi pry adsutnaści ŭ ich bajavoha dośviedu, navykaŭ masavaha bajavoha prymianieńnia dronaŭ, dy i nieabchodnaj kolkaści samich dronaŭ pryviadzie tolki da źniščeńnia naftapierapracoŭčych zavodaŭ, bližejšych čyhunačnych stancyj dy błakavańnia maršrutaŭ zabieśpiačeńnia hrupoŭki ŭvarvańnia. I ŭ vyniku — da jaje źniščeńnia. Šmatlikija «śpiecnazy» ŭnutranych vojskaŭ, navučanyja dla razhonu biazzbrojnych demanstrantaŭ dy zatrymańnia ŭzbrojenych kuchonnym nažom pjanych złamyśnikaŭ, tolki padvysiać lik bajavych strat. Masavaja ž mabilizacyja ludziej, jakija ŭ svajoj masie chočuć palityčnych pieramien, moža pryvieści tolki da masavaj zdačy ŭ pałon ci pierachodu cełych padraździaleńniaŭ na supraćlehły bok, ci, navat, da ŭzbrojenych miaciažoŭ. Karaciej, lepš i nie sprabavać.

3) Prymianieńnie taktyčnaj jadziernaj zbroi. Pahrozy hetaha ŭžo prahučali napiaredadni paradu 9 maja. Nie sumniajusia, što «dazvoł» Zialenskaha na parad 9 maja rasiejskija hienierały ŭžo traktavali svajmu hałoŭnamu načalniku jak vymušany stracham pierad pahrozaj jadziernaj zbroi. Tamu hetyja pahrozy buduć praciahvacca.

Najbolš efiektyŭnym vidam takich pahroz u Kramli ličać treniroŭki pa bajavym prymianieńni jadziernaj zbroi. Zvyčajna jadziernyja bojehałoŭki ŭ rasijskim vojsku, adrozna ad NATO, zachoŭvajucca ŭ centralizavanych schoviščach, adno ź jakich chutkimi tempami budavałasia ŭ Biełarusi kala Kryčava.

Pierad ich prymianieńniem bojehałoŭki kałonami zakrytych hruzavych aŭtamabilaŭ pad achovaj razvoziacca da srodkaŭ ich prymianieńnia — samalotaŭ ci rakiet. Sama heta dastaŭka pieryjadyčna trenirujecca.

Ale takija treniroŭki majuć i inšy sens. Vyvaz niečaha z centralizavanych schoviščaŭ adrazu ž vyjaŭlajecca srodkami kaśmičnaj vyviedki krain NATO. Adrazu ž uźnikaje pytańnie, što jany vyvoziać — sapraŭdnyja bojehałoŭki ci ich makiety. Usie ž razumiejuć, što pačatak jadziernaha napadu budzie zamaskiravany pad takuju treniroŭku. Tamu sama treniroŭka ŭžo źjaŭlajecca pahrozaj jadziernym napadam. Paśla pačatku rasijska-ukrainskaj vajny Pucin nieadnarazova abjaŭlaŭ takija treniroŭki ŭ maštabach usioj Rasii, kab napałochać Zachad i prymusić jaho spynić padtrymku Ukrainy. Ale jadziernaja treniroŭka tolki ŭ Biełarusi heta pahroza, najpierš, Jeŭropie. U pieršuju čarhu, Ukrainie i susiednim krainam NATO.

ZŠA hetaja pahroza nie tyčycca, bo navat madyfikavany pad «Arešnik» «Jars» tudy ź Biełarusi prosta nie dalacić. Tak robicca ŭ spadziavańni, što pry siońniašniaj administracyi Amieryka nie ŭmiašajecca pry jadziernym napadzie na jeŭrapiejskija krainy NATO ci Ukrainu. Pry papiaredniaj administracyi nie paśmieli b, a ciapier ličać, što možna. Asablivaść častych pahroz u tym, što jany źnižajuć psichałahičny paroh ich realizacyi i tamu raniej ci paźniej mohuć być ździejśnieny. Pra nastupstvy dla Biełarusi i pahrozu krainam Bałtyi ja ŭžo pisaŭ na hetym kanale adrazu paśla vyzvaleńnia.

Ciapier nakont niebiaśpieki dla Ukrainy. Na moj pohlad, mažlivyja dva varyjanty jadziernaha ŭdaru pa joj. Kala linii frontu, kab demaralizavać ci źniščyć abaronu. Ale jak rabić heta na Danbasie, jaki, zhodna z rasijskaj Kanstytucyjaj, ličycca ŭžo častkaj RF. Rabić nieprydatnaj dla žyćcia častku RF — jaki tady sens u takim «vyzvaleńni»?

Nanieści ž udar pa «centrach pryniaćcia rašeńniaŭ», heta značyć źniščyć centr i śviatyni «macieri haradoŭ ruskich». A jak ža z rasijskim histaryčnym mifam? Sievastopalskija «navaroby» nie ŭ lik. I pomnik kniaziu Uładzimiru z Maskvy pryjdziecca prybrać.

Ź inšych arhumientaŭ suprać udaru — poŭnaja mižnarodnaja izalacyja RF, ale ž jana i tak blizkaja da taho. Pra maralnyja abmiežavańni zaraz lepiej i nie ŭzhadvać.

Ja vymušany rabić takija strašnyja prahnozy, kab pamienšyć imaviernaść ich realizacyi. Mienš za ŭsio chacieŭ by, kab jany spraŭdzilisia», — zaklučyŭ Mikałaj Statkievič.

• 2
• 0
• 0
• 0
• 0
• 0
• 0
• 0