Novaja pres-sakratarka Trampa praviała pieršy bryfinh — i ŭ Biełym domie ŭžo sumniavajucca, ci doŭha jana pratrymajecca
Keci Zakaryja na pieršym bryfinhu pierabłytała prezidenta z mužam, skončyła bryfinh praz 14 chvilin i nie zmahła adkazać na pytańnie pra pieradaču raźvieddanych Ukrainie. Niekatoryja supracoŭniki Biełaha doma ŭžo sumniavajucca, kolki jana pratrymajecca na pasadzie. Sam Tramp jaje debiut pachvaliŭ.
Keci Zakaryju pryznačyli pres-sakratarkaj Biełaha doma 9 kastryčnika. Pieršy bryfinh jana praviała 13 kastryčnika — jon doŭžyŭsia ŭsiaho kala čverci hadziny.
Bolšuju častku času Zakaryja čytała padrychtavany tekst ź pieralikam dasiahnieńniaŭ Donalda Trampa. Na pytańni zastałosia kala piaci z pałovaj chvilin. Słova atrymali pradstaŭniki vydańniaŭ, prychilnych da amierykanskaha prezidenta.
Kali Zakaryja raskazvała pra siamju, jana ahavaryłasia: «Moj prezident… prabačcie, moj muž».
A na pytańnie karespandenta Fox News, ci spynili ZŠA pieradaču raźviedvalnaj infarmacyi Ukrainie, adkazała: «Mnie daviadziecca viarnucca da hetaha pytańnia».
Niekalki supracoŭnikaŭ administracyi ŭ razmovie z CNN nazvali vystupleńnie niazhrabnym i skavanym. Adzin z daradcaŭ Trampa ličyć, što pierad vychadam da žurnalistaŭ joj varta było dva tydni treniravacca adkazvać na składanyja pytańni. Bryfinhi jaje papiarednicy Kerałajn Levit u siarednim doŭžylisia kala 45 chvilin.
Ananimny pradstaŭnik Biełaha doma ŭ kamientary MS NOW papiaredziŭ: «Joj treba vielmi chutka stać značna lepšaj, inakš jana pabje rekord Skaramučy». Havorka pra Entani Skaramučy, jaki ŭ 2017 hodzie pratrymaŭsia na pasadzie dyrektara pa kamunikacyjach Biełaha doma ŭsiaho 11 dzion.
Da krytyki dałučylisia i ahladalniki. Aŭtar The Guardian napisaŭ, što Zakaryja prademanstravała «stolki ž ciepłyni, mudraści i palityčnaha sprytu, kolki avatar štučnaha intelektu».
Adnak publična Tramp padtrymaŭ novuju pres-sakratarku: «Na maju dumku, jana vystupiła vielmi dobra».
Kamientary