Sali Runi spyniaje pastaŭki svaich knih u Brytaniju. Piśmieńnica padtrymlivaje zabaronienuju Palestine Action

Papularnaja irłandskaja piśmieńnica Sali Runi zajaviła, što jaje knihi bolš nie buduć pastaŭlacca ŭ brytanskija kniharni, pakolki jana finansava padtrymlivaje arhanizacyju Palestine Action, zabaronienuju ŭ Vialikabrytanii jak terarystyčnuju, piša Bi-bi-si.

Palestine Action, aktyvisty jakoj ładzili akcyi na vajskovych bazach i inšych abjektach, źviazanych, na ich dumku, z padtrymkaj Izraila, była pryznanaja terarystyčnaj arhanizacyjaj letaś na padstavie Zakona ab teraryźmie 2000 hoda. Za siabroŭstva ŭ joj abo publičnuju padtrymku arhanizacyi praduhledžana kryminalnaje pakarańnie ažno da 14 hadoŭ pazbaŭleńnia voli. Pry hetym pakul nivodnaha čałavieka nie było asudžana za padtrymku Palestine Action.

Letaś aŭtarka ramana «Narmalnyja ludzi» zajaviła, što maje namier i nadalej nakiroŭvać aŭtarskija adličeńni ad prodažu svaich knih na padtrymku hetaj arhanizacyi.

U zajavie, nakiravanaj Bi-bi-si, Runi paviedamiła, što dalejšaje raspaŭsiudžvańnie jaje tvoraŭ u Vialikabrytanii moža ŭjaŭlać saboj «surjoznaje kryminalnaje złačynstva». Tamu jana damoviłasia sa svaim vydaviectvam Faber ab spynieńni pastavak jaje knih u krainu.

«Ja prykłała ŭsie namahańni, kab adkryta raskazać hramadstvu pra svaje pierakanańni i namiery, i całkam hatovaja pryniać nastupstvy», — zajaviła piśmieńnica.

Elektronnyja viersii knih Runi ŭžo źniatyja z prodažu ŭ Brytanii, ale ŭ mnohich kniharniach pa-raniejšamu jość drukavanyja asobniki z raniejšych pastavak.

U najbujniejšaj brytanskaj sietcy kniharniaŭ Waterstones paćvierdzili Bi-bi-si, što vydaviectva Faber nie ŭvodziła abmiežavańniaŭ na prodaž asobnikaŭ, jakija ŭžo jość u kniharniach. Pavodle źviestak NielsenIQ BookData, va ŭsim śviecie pradadziena bolš za šeść miljonaŭ asobnikaŭ knih Runi, u tym liku 2,3 miljona — u Vialikabrytanii.

Raman «Narmalnyja ludzi» vyjšaŭ u 2018 hodzie, a praz dva hady pavodle jaho źniali papularny telesieryjał, dziakujučy jakomu akciory Poł Mieskał i Dejzi Edhar-Džons atrymali šyrokuju viadomaść i faktyčna pačali paśpiachovuju karjeru.

Runi taksama napisała ramany «Intermiecca», «Razmovy ź siabrami» i «Pryhožy śviet, dzie ž ty».

U zajavie dla Bi-bi-si vydaviectva Faber paviedamiła: «Z-za brytanskaha zakanadaŭstva skłałasia situacyja, pry jakoj Faber nie moža pieraličvać Sali Runi dachody ad prodažu jaje tvoraŭ u Vialikabrytanii».

«Pracavać z knihami piśmieńnika, nie majučy mahčymaści vypłačvać jamu naležnyja dachody, — całkam nieprymalnaja situacyja dla vydaviectva, — taksama havorycca ŭ zajavie. — Tamu pa poŭnym uzhadnieńni z Sali my pryniali rašeńnie spynić pastaŭki jaje tvoraŭ u Vialikabrytaniju ŭ lubym farmacie».

«My pa-raniejšamu hanarymsia tym, što vydajom jaje vydatnyja tvory, i praciahniem pradavać ich u inšych krainach», — dadali ŭ Faber.

• 1
• 1
• 1
• 3
• 0
• 0
• 0
• 0