Pamior biznesmien Łučanski, jakoha časopis Time u 1990‑ch nazvaŭ «samym niebiaśpiečnym niazłoŭlenym złačyncam u śviecie»

U Vienie pamior pradprymalnik Hryhory Łučanski — zasnavalnik mižnarodnaj syravinnaj hrupy Nordex, adzin ź pieršych postsavieckich multymiljanieraŭ i šmathadovy partnior maskoŭskich uładaŭ, piša «Ahienctva».

Jaho imia fihuravała ŭ mižnarodnych rasśledavańniach ab arhanizavanaj złačynnaści i admyvańni hrošaj, a publikacyi pra jaho stanavilisia pradmietam hučnych sudovych raźbiralnictvaŭ. Dadzienyja «Prajekta» taksama źviazvajuć Łučanskaha z vysokapastaŭlenymi čynoŭnikami maskoŭskaj meryi.

Łučanski pamior 20 kastryčnika va ŭzroście 81 hoda. Raźvitańnie adbudziecca 25 kastryčnika na Jaŭrejskich mohiłkach u Ryzie.

Hryhory Łučanski naradziŭsia ŭ 1945 hodzie ŭ Taškiencie. Paśla zakančeńnia Maskoŭskaha instytuta stali i spłavaŭ atrymaŭ raźmierkavańnie ŭ Łatvijskuju SSR, dzie kiravaŭ respublikanskim štabam studenckich budatradaŭ i pracavaŭ prarektaram Łatvijskaha dziaržaŭnaha ŭniviersiteta.

U 1983 hodzie Łučanskaha asudzili na siem hadoŭ pazbaŭleńnia voli za kradziež univiersiteckaj majomaści. U 1985 hodzie jaho vyzvalili ŭmoŭna-daterminova. Sam Łučanski tłumačyŭ kryminalnuju spravu intryhami tahačasnaha kiraŭnika KDB Łatvii Barysa Puha.

Hrupa Nordex była zarehistravanaja ŭ Aŭstryi ŭ 1990 hodzie. Užo ŭ 1993 hodzie Nordex uvajšła ŭ piaciorku najbujniejšych eksparcioraŭ naftapraduktaŭ z krain SND. Jaje abarot aceńvaŭsia prykładna ŭ 2 młrd dalaraŭ.

U 1993 hodzie Nordex udzielničała ŭ pastaŭkach rasijskaj nafty va Ukrainu ŭ abmien na charčavańnie. Kampaniju abvinavačvali ŭ zavyšeńni koštu pastavak i atrymańni 30 młn dołaraŭ prybytku.

Nordex była źviazana i ź dziejnaściu kampanii «Kałumb», jakuju abvinavačvali ŭ niezakonnym vyvazie z Rasii 30 tysiač ton rafinavanaj miedzi ŭ siaredzinie 1990-ch. Łučanski śćviardžaŭ, što žadaŭ dapamahčy skulptaru Zurabu Cereteli i zachavać dobryja adnosiny z meram Maskvy Juryjem Łužkovym. Paźniej hetaje siabroŭstva apyniecca ŭ centry jašče adnaho skandału.

Z 2003 pa 2011 hod padkantrolnaja Łučanskamu Maskoŭskaja aŭtamabilnaja kampanija (MAK) kiravała ZIŁam. Paśla skasavańnia damovy ZIŁ zapatrabavaŭ ad MAK praz sud kala 1,1 młrd rubloŭ, ale prajhraŭ spravu.

U 1993 hodzie Łučanski sustrakaŭsia z prezidentam ZŠA Biłam Klintanam na mierapryjemstvie pa zbory srodkaŭ dla Demakratyčnaj partyi, a ŭ 1995 hodzie atrymaŭ zaprašeńnie na novuju viačeru z prezidentam, jakoje zatym adklikali z-za padazreńniaŭ u suviaziach biznesmiena z arhanizavanaj złačynnaściu.

U siaredzinie 1990‑ch Łučanskaha zapadozryli ŭ datyčnaści da niezakonnaj pieravozki zbroi na transpartnym samalocie An-124, jaki naležaŭ Nordex. Pradprymalnik śćviardžaŭ, što nikoli nie handlavaŭ zbrojaj.

U 1994 hodzie namieśnik ministra ŭnutranych spraŭ Rasii Michaił Jahoraŭ zajaviŭ u Sienacie ZŠA, što Nordex faktyčna ŭznačalvaje čačeniec pa imieni Umar, brat jakoha źviazany z narkamafijaj. Paźniej MUS zajaviła pra pamyłku.

U 1996 hodzie amierykanski časopis Time u rasśledavańni ab rasijskaj arhanizavanaj złačynnaści nazvaŭ Łučanskaha čałaviekam, «jakoha mnohija ličać samym niebiaśpiečnym złačyncam u śviecie, jakomu nie pradjaŭleny abvinavačańni». U 1999 hodzie brytanskaja hazieta The Times źviazała jaho z admyvańniem hrošaj i arhanizavanaj złačynnaściu. Łučanski padaŭ na hazietu ŭ sud i vyjhraŭ spravu ab paklopie.

U svaim rasśledavańni 1996 hoda Time apisvaŭ kantakty Łučanskaha z premjeram Rasii Viktaram Čarnamyrdzinym, vice-premjeram Aleham Saskaŭcom i pradstaŭnikami administracyi Barysa Jelcyna.

U 2021 hodzie Łučanski śćviardžaŭ, što na pačatku 1993 hoda finansava padtrymaŭ Haŭryiła Papova i Jahora Hajdara.

• 0
• 1
• 2
• 1
• 1
• 1
• 0
• 0