85-гадовы акцёр просіць кіношнікаў не марудзіць, зважаючы на свой паважны ўзрост.
Яшчэ ў чэрвені брытанскі акцёр, які сыграў чараўніка ва ўсіх папярэдніх фільмах па творах Джона Р. Р. Толкіна, намякаў у інтэрв'ю The Times, што чуў пра новую экранізацыю і быў бы зацікаўлены ў вяртанні да сваёй улюбёнай ролі. «Калі яшчэ буду жывы».
Цяпер у інтэрв'ю The Big Issue Мак-Келен распавёў, што яму ўсё ж прапанавалі гэтую ролю.
«Цікаўнасць да «Валадара Пярсцёнкаў» і не думае згасаць. На жаль, не магу сказаць больш за гэта. Зусім нядаўна мне сказалі, што з'явяцца новыя фільмы і Гандальф там фігуруе, таму яны вельмі спадзяюцца, што я яго сыграю.
Калі менавіта? Не ведаю. Што там са сцэнарам? Яго яшчэ не напісалі. Так што лепш ім не марудзіць», — падзяліўся акцёр.
У маі Warner Bros. Discovery анансавала, што акцёр і кінарэжысёр Эндзі Сёркіс, які выканаў у арыгінальнай трылогіі ролю Голума, зрэжысуе першы з двух запланаваных поўнаметражных фільмаў. Плануецца, што першы фільм пад працоўнай назвай «Валадар Пярсцёнкаў: Паляванне на Голума» выйдзе ў кінапракат у 2026 годзе.
Над сцэнарам фільма будуць працаваць Фрэн Уолш і Філіпа Боенс, якія былі сааўтарамі арыгінальнай трылогіі, а таксама Фібі Гітынс і Арці Папагеоргіу, сцэнарысты анімацыйнага фільма «Валадар Пярсцёнкаў: Вайна рахірымаў» (The Lord of the Rings: The War of the Rohirrim), прэм'ера якога адбудзецца 11 снежня 2024 года. Прадзюсарам новай экранізацыі выступіць сам Пітэр Джэксан, аўтар арыгінальнай трылогіі.
Мак-Келен выконваў ролю Гандальфа ва ўсіх арыгінальных фільмах Джэксана (2001-2003 гг.) і трылогіі «Хобіт» (2012-2014 гг.), таму яго вяртанне да гэтай ролі было б вялікім поспехам для Сёркіса.
Нядаўна акцёр страціў раўнавагу на сцэне і атрымаў пералом запясця. Мак-Келен сцвярджае, што ўжо цалкам фізічна аднавіўся пасля гэтага выпадку, аднак, вырашыў узяць адпачынак да канца года. Існуе вялікая імавернасць, што канец ягонага адпачынку супадзе з пачаткам працы над новым «Валадаром Пярсцёнкаў».
Наконт сваіх творчых планаў Мак-Келен запэўніў, што не збіраецца кідаць акцёрскую кар'еру і будзе працаваць «пакуль працуюць ногі, лёгкія і розум».
Цяпер чытаюць
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары