Рэжысёрка канцэртаў для Лукашэнкі святкавала Новы год і Раство ў Вялікабрытаніі — шмат ФОТА

З 1993 па 2018 год Анжаліна Мікульская працавала на тэлебачанні (апошнія 10 гадоў — на пасадзе Дырэктара дырэкцыі спецыяльных праектаў тэлеканала АНТ). Яна вядомая як аўтарка і прадзюсарка тэлепраектаў «Я спяваю!», «Талент краіны», «Акадэмія талентаў», «Гонар нацыі».

У якасці рэжысёркі Мікульская ставіла канцэрты да Дня Незалежнасці каля стэлы «Мінск — горад-герой», Рэспубліканскага фестывалю нацыянальных культур у Гродне, фестывалю «Музычныя вечары ў Мірскім замку», фінальнага шоу конкурсу прыгажосці «Міс Супернэшэнл 2013», канцэрт пасля выбараў у 2015-м. Таксама Анжаліна рэжысавала музычныя прэміі «Песня года Беларусі». Традыцыйнымі канцэртамі ў Александрыі, дзе Лукашэнка любіць святкаваць Купалле, яна таксама займалася.

Шоу «Героі» на БТ, у якім сярод вядучых была ўнучка Лукашэнкі Дар’я, — гэта таксама вынік працы Анжаліны, бо яна была сааўтаркай і рэжысёркай-пастаноўшчыцай тэлепраекта.

Разам з сям’ёй Мікульская сустракала Новы год у Велікабрытаніі.

Пачалася вандроўка з Лондана, дзе Анжаліна пайшла ў тэатр «Дамініён» глядзець мюзікл «Д'ябал носіць Прада» (прэм’ера адбылася летась у кастрычніку), арыгінальную партытуру да якога напісаў Элтан Джон.

Павялічыць

Мікульская была ў захапленні ад мюзікла і напісала, што гэта неверагодная пастаноўка: «Якія шыкоўныя рэжысёрскія рашэнні ў спектаклі! Вучуся і вучуся!»

Пры гэтым рэжысёрка здзіўлялася правілам у англійскім тэатры: здымаць мюзікл нельга, а быць у зале ў паліто, з ежай і напоямі можна. Але забарона на здымкі яе не спыняла — Анжаліна зрабіла шмат відэа для сторыс у інстаграме.

Павялічыць

Наступным пунктам вандроўкі стала Шатландыя — сям’я паляцела ў Эдынбург, каб сустрэць там Новы год і паўдзельнічаць у факельным шэсці.

— Гэта адна з нямногіх краін, дзе ярка і з традыцыямі святкуецца менавіта Новы год (астатнія больш увагі надаюць Раству). Тут ёсць знакамітая на ўвесь свет вечарынка Хогманай — шатландскае свята, праводзіны адыходзячага года. Гуляюць некалькі дзён. Захапляльная феерыя факельнай працэсіі кожны год збірае ля Эдынбургскага замка больш за сто тысяч людзей з усяго свету.

Здзіўляла Анжаліну на чужыне тое, што, нягледзячы на ​​халодны клімат, шатландцы ў мінусавую тэмпературу спакойна могуць быць на вуліцы з голымі нагамі (нават дзеці). А яшчэ шакаваў дзіўны дэсерт — смажаны ў фрыцюры шакаладны батончык «Марс». Такое кулінарнае вынаходства рэжысёрцы спадабалася.

Пасля Эдынбурга сям’я зноў вярнулася ў Лондан, каб наведаць спектакль «Гензель і Грэтэль» у Каралеўскай оперы «Ковент-Гардэн».

Павялічыць

Наступны пункт праграмы — Ліверпуль. Там былі дом-музей сэра Пола Маккартні, музей «Бітлз», а таксама шпацыр да дамоў Джона Ленана і Рынга Стара.

Павялічыць

Святкавала Раство сям'я ў шыкоўным рэстаране Ліверпуля.

Павялічыць

Толькі ўчора Анжаліна вярнулася да працы ў Беларусі. Цікава, ці пабачым мы ў будучым недзе ў Александрыі мюзікл «Д'ябал носіць Элему».

• 3
• 4
• 10
• 13
• 5
• 0
• 31
• 0