На сустрэчы Лукашэнкі з бізнэсменамі нікому з іх не далі сказаць ні слова? А цэнтральнай задачай было запалохаць Кім
Прадстаўнікі мінскай бізнэс-супольнасці лічаць, што асноўны сэнс сустрэчы Лукашэнкі з бізнэсам быў у чарговым прагаворванні пагроз, а асноўным адрасатам была ўласніца «Вайлдберыз», расіянка Таццяна Кім, якая нядаўна атрымала вялікія льготы.
Сустрэча, якая падавалася як дыялог Лукашэнкі з прадстаўнікамі камерцыі, падобна, ніякім дыялогам не з'яўлялася.
«Наша Ніва» не змагла адшукаць на БелТА ці ў «Пуле першага» ніводнай цытаты кагосьці з запрошаных на мерапрыемства бізнэсменаў. Выглядае, што гаварылі выключна Аляксандр Лукашэнка і першы віцэ-прэм'ер Мікалай Снапкоў, а бізнэсмены толькі слухалі без магчымасці выступіць.
Снапкоў нават ад імя бізнэсу — хоць з'яўляецца пры гэтым чыноўнікам — заявіў пра агульнае адабрэнне таго, што старшыні райвыканкамаў цяпер будуць узгадняць кіраўнікоў прыватных кампаній.
У маналогу Лукашэнкі, які прыводзіцца на афіцыйных рэсурсах, вылучаецца традыцыйны набор пагроз і зняваг у бок прысутных. Вось асноўныя:
— «Мы кантралюем [бізнэс], ды яшчэ як. Ну так і вас будзем кантраляваць, калі вы гэта заслугоўваеце»;
— «Вы не святыя і мы на вас, як на абразЫ, маліцца не збіраемся»;
— «Калі яны (бізнэсмены — НН) нешта недзе зрабілі не так… Не проста парушылі, а растапталі закон, ну дык у нас шмат свабодных месцаў [у турме] — я пра гэта шчыра кажу»;
— «У нас тут няма недзяржаўных прадпрыемстваў»;
— «Любое прадпрыемства мусіць працаваць на Беларусь, на дзяржаву. Тады ў мяне ніякіх не будзе да вас прэтэнзій»
— «Ніхто ў вас бізнэс не адбярэ, ніхто вас нахіляць не будзе, дзяліць нешта не будзе. Гэта я вам гарантую. Але дзяржаўны інтарэс перш за ўсё»;
— «Паглядзім яшчэ на пытанні вашай работы ў плане вываду валюты за мяжу, а то ў нас некаторыя, асабліва замежныя кампанііі… Людзі тут карачацца, а кіраўнікі выводзяць за мяжу. […] Калі вы хаваеце за мяжой грошы, заробленыя тут, то маё стаўленне да вас якое павінна быць?» і гэтак далей.
Часцей за Лукашэнку і Снапкова паказвалі толькі Таццяну Кім.
Адзін са старажылаў мінскага дэвелапмента, якога «Наша Ніва» папрасіла патлумачыць, што ён зразумеў з маналогу Лукашэнкі, адказаў, што пасля абмеркавання дэталяў з калегамі яны разам спыніліся на думцы, што ўсё мерапрыемства было арганізавана толькі для таго, каб папалохаць самую багатую жанчыну Расіі, Таццяну Кім. Яна ўлезла ў вялікі бізнэс-праект у Беларусі, «але можа не аддаваць яшчэ сабе справаздачы, што тут не робіцца чысты бізнес, і на кожны рубель ільготы спрос на два».
Уласніца «Вайлдберыз» запусціла праект па будаўніцтве вялікага лагістычнага хаба ў індустрыяльным парку Вялікі Камень.
Анансаваны аб'ём інвестыцый блізкі да $120 мільёнаў, на 27 гектарах зямлі пад Мінскам вырасце размеркавальны цэнтр на 140 тысяч квадратных метраў. Умовы, на якіх Кім атрымала зямлю, пакуль невядомыя і з'яўляюцца прадметам спекуляцый у сталічных бізнэс-колах.
Па гэтым праекце «Вайлдберыз» будзе цалкам вызвалены ад падатку на прыбытак цягам 10 год з моманту з'яўлення прыбыткаў, а пасля гэтага перыяду і да 2026 года будзе плаціць толькі палову ад стандартнай стаўкі. Да 2026 года таксама не будзе выплачвацца падатак на нерухомасць і зямельны падатак. Першыя пяць год таксама не будзе падатку на дывідэнды. ПДВ на тавары, вырабленыя на тэрыторыі ЕАЭС, выплачваць таксама будзе не трэба. Можна будзе эканоміць і на заробках персаналу, таму што ў Вялікім Камені падаходны падатак на супрацоўнікаў меншы, ён складае 9%.
«Я так разумею, што чытаць натацыі і яшчэ раз прагаворваць правілы гульні толькі адной Кім было б непрыгожа, бо яна ўсё ж не мясцовая.
Таму склікалі нейкую салянку «блатных і жабракоў», дзе большасць не з'яўляецца ні вялікімі працадаўцамі, ні фінансавымі вараціламі. А калі гэтых людзей што і аб'яўдноўвае, дык тое, што яны яшчэ не сядзелі.
І ім зачыталі натацыі і агульную інфармацыю пра тое, як у нас добра жывецца — Снапкоў пацвердзіць. Мы гэта ўсё чуем ужо 30 гадоў і новага не прагучала літаральна нічога. Таму мы схіляемся да думкі, што спектакль ставіўся толькі для адной расіянкі.
Збор гэты, дарэчы, планаваўся яшчэ да выбараў, і пра гэта ўсе ведалі, нават канкрэтную дату.
Запрошаныя насіліся па горадзе і казалі, што іх запрасілі да Лукашэнкі: «А што яму трэба казаць? А дайце парады».
Але ў Кім не атрымлівалася да выбараў — перанеслі. Правялі толькі тады, калі ў яе атрымлівалася.
І тое, што з усіх губернатараў краіны там быў толькі губернатар Міншчыны (як быццам бы ў іншых абласцях няма камерцыі), таксама пацвярджае наша меркаванне. Гэта так усе і зразумелі. Папалохалі яе, ну і заадно іншых», — дадаў яшчэ адзін сталічны прадпрымальнік з багатай бізнэс-біяграфіяй.
***
Таццяна Кім (Бакальчук) — заснавальніца анлайн-рытэйлера «Вайлдберыз». Самая багатая жанчына Расіі з капіталам $7,4 мільярда. З нядаўняга часу актыўна інвестуе ў Беларусі.
Каментары