Кампанія «БелДжы» 23 траўня ўпершыню афіцыйна паказала электрамабіль Geely EX-5, які сёлета пачалі збіраць у Беларусі.
Прэзентацыя прайшла ў новым аўтасалоне «Точка». Гэты аўтацэнтр стаў чарговым дылерам марак Geely і Belgee, паведамляе Office Life.
На дату прэзентацыі ў аўтасалоны краіны паступіла 169 электракараў.
Па словах генеральнага дырэктара «БелДжы» Генадзя Свідзерскага, з нарошчваннем аб'ёмаў выпуску ніхто спяшацца не будзе. Па-першае, трэба вывучыць попыт на навінку ў Беларусі. А па-другое, каб продажы беларускага электракара пайшлі і на расійскі рынак, трэба гарманізаваць патрабаванні да электрамабіляў у дзвюх краінах.
Тэхнічна Geely EX-5 — кампактны красовер даўжынёй каля 4,6 метра. Батарэя на 60,2 кВт⋅г дазваляе праехаць без падзарадкі да 430 км. Машына цалкам сертыфікавана ў Беларусі, вытворца дае на яе працяглую гарантыю — 6 гадоў.
Цяпер у продажы дзве камплектацыі па цане ад 73,9 тысячы да 79,9 тысячы рублёў.
У больш дарагім варыянце дадаткова да базавых опцый прадугледжаны: аўтаматычнае вечка багажніка, панарамны дах, масаж і вентыляцыя пярэдніх сядзенняў, больш дарагая гума і некаторыя электронныя памочнікі.
Што тычыцца новага аўтацэнтра, то яго ўладальнікам з'яўляецца Кампанія «РК Паўэр Мотарс». Гэта новы гулец на беларускім аўтарынку. Дырэктарам «Точкі» стаў Дзмітрый Ігнатовіч — у мінулым топ-менеджар аднаго з аўтацэнтраў «Атлант-М».
Адносна перспектыў вытворчасці электрамабіляў Генадзь Свідзерскі сказаў, што гэта будзе залежаць у асноўным ад магчымасці паставак у Расію. Тэарэтычна ў гэтую краіну «БелДжы» гатовая прадаваць каля тысячы Geely EX-5. Што тычыцца беларускага рынку, то аб'ёмы продажаў на ім будуць залежаць ад таго, захаваюць ільготы на ўвоз імпартных электрамабіляў у Беларусі ці не.
Дарэчы, сёлета на «БелДжы» пачнуць зборку гібрыдаў. Цяпер гэты аўтамабіль праходзіць выпрабаванні, і да канца года яго ўжо плануюць вывесці на рынак.
Каментары
[Зрэдагавана]
Правильно: - китайская машина собранная в Беларуси по лицензии.