Кіраўніцтва канцэрна Volkswagen Group ухваліла маштабную праграму рэструктурызацыі пад назвай «План будучыні — 2030». Яна прадугледжвае істотнае скарачэнне колькасці працоўных месцаў і мадэляў аўтамабіляў, а таксама змяненне структуры бізнэсу, піша Deutsche Welle.
Назіральная рада Volkswagen аднагалосна падтрымала план, падрыхтаваны кіраўніцтвам канцэрна. Яго называюць найбуйнейшай праграмай аздараўлення ў гісторыі нямецкага аўтавытворцы.
Volkswagen разлічвае ў будучыні прадаваць каля 9 мільёнаў аўтамабіляў у год і давесці гадавы аперацыйны прыбытак да 31 мільярда еўра. Пры гэтым у 2027—2031 гадах кампанія плануе ўкласці каля 135 мільярдаў еўра ў інвестыцыі, даследаванні і распрацоўкі.
Адным з галоўных пунктаў праграмы стане істотнае скарачэнне мадэльнага шэрагу. Да 2035 года Volkswagen плануе прыкладна ўдвая паменшыць колькасць мадэляў, а колькасць варыянтаў іх камплектацыі — на 75 працэнтаў. У кампаніі лічаць, што меншая колькасць мадэляў дазволіць выпускаць кожную з іх большымі накладамі і такім чынам знізіць сабекошт за кошт выкарыстання аднолькавых дэталяў і тэхналогій.
Пакуль Volkswagen не паведаміў, якія канкрэтна мадэлі могуць знікнуць з вытворчасці. Рэшта аўтамабіляў павінна зацікавіць купцоў сучасным дызайнам і тэхналогіямі, адаптаванымі да розных рынкаў.
Асобна канцэрн плануе скараціць каля 50 тысяч працоўных месцаў, у тым ліку кіраўнічыя пасады. Пакуль не ўдакладняецца, закране гэтае скарачэнне толькі прадпрыемствы ў Германіі ці таксама пад яго трапяць заводы і падраздзяленні Volkswagen у іншых краінах.
Пры гэтым кампанія пакуль не плануе непасрэдна закрываць заводы. У Volkswagen прызнаюць, што вытворчыя магутнасці канцэрна ў Еўропе цяпер перавышаюць патрэбы. Таму пад пытаннем знаходзіцца будучыня чатырох прадпрыемстваў у Германіі — заводаў у Эмдэне, Цвікаў і Гановеры, а таксама прадпрыемства Audi ў Некарзульме. У 2030‑х гадах ім можа быць складана забяспечыць дастатковую загрузку, якая дазваляла б заставацца канкурэнтаздольнымі. Канцэрн мае намер шукаць для гэтых аб'ектаў іншыя спосабы выкарыстання.
Раней з'яўлялася інфармацыя, што Volkswagen абмяркоўваў магчымасць перапрафілявання аднаго са сваіх заводаў у Аснабруку, у тым ліку для вытворчасці вайсковай прадукцыі.
Значныя змены чакаюць і міжнародны бізнэс канцэрна. У Кітаі Volkswagen плануе прыстасаваць сваю дзейнасць да мясцовага рынку, дзе ў апошнія гады асабліва хутка растуць продажы электрамабіляў. У Паўночнай Амерыцы, наадварот, кампанія хоча засяродзіцца на найбольш прыбытковых сегментах, паколькі попыт на электрамабілі там у 2025 годзе знізіўся ў параўнанні з папярэднім годам.
Акрамя таго, Volkswagen мае намер павялічыць экспарт аўтамабіляў, вырабленых у Германіі, у краіны так званага глабальнага Поўдня. Канцэрн таксама плануе прадаць або рэарганізаваць частку сваіх актываў, перагледзець нерухомасць і зрабіць структуру бізнэсу больш кампактнай.
Неабходнасць маштабнай рэструктурызацыі ў Volkswagen тлумачаць зніжэннем прыбыткаў. Раней чакалася, што канцэрн можа скараціць да 100 тысяч працоўных месцаў па ўсім свеце, таму цяперашні план прадугледжвае меншы маштаб звальненняў.
Разам з тым становішча Volkswagen на некаторых рынках застаецца моцным. Па выніках 2025 года канцэрн быў найбуйнейшым прадаўцом электрамабіляў у Еўропе, а ў пачатку 2026 года здолеў зноў заняць лідарскую пазіцыю на аўтамабільным рынку Кітая.
Сусветныя аўтавытворцы адзін за адным страчваюць прыбытак. Ва ўсім вінаваты пераход на электрамабілі?
Нямецкая эканоміка паламалася, а «плана Б» ні ў кога няма
Дызель можа перамагчы электрамабілі? Як еўрапейскі аўтапрам аказаўся на мяжы крызісу
Кітай упершыню стаў сусветным лідарам на рынку аўто. Як так атрымалася?
Цяпер чытаюць
Лукашэнка: Што творыцца ў краіне, у нас усе гэтую гусь круцяць8
Лукашэнка: Што творыцца ў краіне, у нас усе гэтую гусь круцяць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5656
Каментары
"По данным Немецкого экономического института (IW), к 2036 году нехватка кадров в стране может вырасти до 4,3 миллиона человек. Острейший дефицит ощущается в IT-секторе, инженерии, строительстве, на железнодорожном транспорте, а также в медицине и уходе за пожилыми людьми."
И нет, ваши сладкие хотелки высылки русских граждан Германии (также, как и белорусских, украинских) НИКОГОДА не осуществятся. Это топ ценнейшей квалифицированной рабочей силы.