Lubčanski zamak bolš za hod adnaŭlajuć biez prajekta. Paśpieli pabudavać viežu i hłuchija ścieny

Toje, što pomnik architektury nacyjanalnaha značeńnia ŭzvodziać biez zaćvierdžanaha prajekta, vyśvietliłasia tolki paśla zvarotu aktyvistaŭ. 

Mietaličny karkas pad hłuchuju ścianu ź biarvieńnia, jakaja zakryje vid na Nioman. Fota: telehram-kanał «Spadčyna».

Pra heta paviedamlaje telehram-kanał «Spadčyna».

Aktyvisty źviarnuli ŭvahu na toje, što novyja zbudavańni na terytoryi zamka istotna adroźnivajucca ad taho, što było pakazana na rendarach uzhodnienaha prajekta.

Za apošni čas uźviedzieny paŭnočnaja vieža ź fihurnym kupałam i muravanaja paŭnočna-zachodniaja ściana, jakaja złučaje jaje z bramaj-viežaj. Akramia taho, u poŭnuju vyšyniu vymuravana paŭnočna-ŭschodniaja, «draŭlanaja» vieža, i pačali budavać ad jaje.

Paŭnočnaja vieža i susiedniaja ściana, jakija vyklikali padazreńnie ŭ aktyvistaŭ, pavodle Ministerstva kultury, uźviedzieny pa prajekcie. Fota: telehram-kanał «Spadčyna».

Pavodle aktyvistaŭ, paŭnočnaja i ŭschodniaja ścieny pavinny byli być paŭprazrystymi, žaluzijnymi, kab nie razburać vizualnuju suviaź zamka z pryrodnym atačeńniem i dalinaj Niomana. Ale zamiest hetaha źjavilisia hłuchija ścieny ź mietaličnaha karkasu, zakładzienaha biarvieńniem, a praporcyi i detali viežaŭ dalokija ad histaryčnych.

Hłuchija ścieny ź mietaličnaha karkasu i biarvieńnia, zamiest jakich musili być paŭprazrystyja žaluzijnyja. Fota: telehram-kanał «Spadčyna».

Kab vyśvietlić, ci ŭsio robicca pavodle prajekta, aktyvisty źviarnulisia ŭ Ministerstva kultury. U viedamstvie adkazali, što pracy pa paŭnočna-zachodniaj ścianie i paŭnočnaj viežy adpaviadajuć uzhodnienamu prajektu pieršaj čarhi.

Paŭnočna-ŭschodniaja («draŭlanaja») vieža, była vymuravana z cehły na poŭnuju vyšyniu biez uzhodnienaha prajekta. Fota: telehram-kanał «Spadčyna».

Adnak usia astatniaja častka — druhaja čarha, heta značyć ścieny z boku Niomana i «draŭlanaja» vieža — navat nie była padadzienaja na ŭzhadnieńnie. Inšymi słovami, usio, što ciapier uźviedziena, nie maje nijakaha dačynieńnia da navukovaj restaŭracyi i robicca pa inicyjatyvie ŭłaśnika, pavodle jaho asabistych ujaŭleńniaŭ pra toje, jakim musić być zamak.

U vyniku Lubčanski zamak pastupova pieratvarajecca ŭ fantaziju Ivana Piačynskaha. Niahledziačy na vyjaŭlenaje parušeńnie, aktyvisty apasajucca, što ŭźviedzieny «samapał» mohuć lehalizavać, uzhadniŭšy toje, što nabudavaŭ ułaśnik postfaktum.

Rendar Lubčanskaha zamka, jakija pakazvali raniej. Fota: telehram-kanał «Spadčyna».

Kamientary da artykuła