Maks Korž vypuściŭ klip pa matyvach skandalnaha kancerta ŭ Varšavie. Heta vyhladaje jak manifiest

Maks Korž apublikavaŭ videa, jakoje stała refleksijaj na rezanansnyja padziei vakoł jaho vystupu na varšaŭskim stadyjonie 9 žniŭnia. Toj vystup sabraŭ kala 80 000 čałaviek z usioj postsavieckaj prastory i skončyŭsia hučnym skandałam u Polščy. 

Klip spałučaje ŭ sabie kadry sutyknieńniaŭ z achovaj i zatrymańniaŭ z manałohami artysta pra vajnu, kaštoŭnaść žyćcia, siłu jednaści.

U roliku vykarystany navinavyja ŭstaŭki pra biesparadki, padčas jakich palicyja zatrymała bolš za sto čałaviek, u tym liku 6 biełarusaŭ, častku ź jakich polskija ŭłady departavali.

«Žyćcio — nichto nie viedaje, što jano nam pryhatavała. Ale ŭ adnym ja ŭpeŭnieny dakładna: hety «stadyk» adździalaje nas ad žyviolnaha śvietu. Śvietu, u jakim z nas robiać ličby i raboŭ», — kaža Korž. Tamu — «Rabicie dźviž, chłopcy».

Centralnaj temaj videa stali zakliki Karža da spynieńnia vajny, bierahčy adzin adnaho, niahledziačy na miežy i kulturnyja adroźnieńni:

«Jak spynić heta, kali ŭ załožnikach vielizarnaja kolkaść ludziej, cełaja kraina ŭ załožnikach? Kali ludzi, jakija nie padpisvalisia na heta, hnijuć i pamirajuć u akopach? Nichto nie naradžajecca na hetaj ziamli, kab być zabitym. Nichto! Nivodzin baćka nie vychoŭvaje syna, kab addać jaho na pahibiel. Kožny baćka ŭkładvaje ŭ dzicia maksimum taho, čaho nie zmoh zrabić sam. Chto dobraachvotna moža heta addać? Heta treba spynić!»

Taksama artyst kaža, što «samy hałoŭny vorah kožnaha naroda — heta prostaja manipulacyja».

Korž havoryć, što paasobku ludzi rastvarajucca ŭ šerym śviecie: «Paasobku my rastvarajemsia ŭ hetym śviecie, ale kali my razam, usio, što zastałosia zzadu, vyhladaje prosta biessensoŭnym, šerym i nudnym. Bo ŭ kožnym z nas žyvie adzin i toj ža vajb — asablivy vajb», — kaža Korž.

Kamientary da artykuła