Pahromy — adziny srodak dla biełaruskich čynoŭnikaŭ prabić žaleznuju vizavuju zasłonu.
U sakaviku majho znajomaha abłamali z francuskaj vizaj. Spatkaŭ jaho paśla na «Ŭzvyššy», dzie jon, zapivajučy kryŭdu, roŭ: «Nia treba nam bierah turecki!» U sp.Čarhinca nie takija mocnyja nervy. Zamiest taho kab mužna nažercisia paśla taho, jak jaho kinuli ź vizaj u ZŠA, aŭtar «Vam — zadańnia» zaklikaŭ MZS bolš žorstka padychodzić da pytańnia ab nadańni prava ŭjezdu ŭ krainu zamiežnym palitykam.
Efekt demaršu naŭrad ci budzie mocny. Kali dapuścić, što Toni Błer viadzie dziońnik, nia dumaju, što na minułym tydni ŭ im źjaviŭsia zapis: «10.11.05. Paśla zajavy Čarhinca nikoli ŭ žyćci nie zmahu ŭbačyć svaich kumiraŭ z «Zornaha dyližansu».
Na miescy «nieŭjaznych» ja b źviarnuŭsia da vopytu abaryhienaŭ paryskich pradmieściaŭ. Chiba jany nie takaja ž kasta «niedatykalnych», jak i našy mandaryny? Tak jany j žyli ŭ svaim hieta, pakul nie pačali ŭzbuchać. Naturalna, ciapier ich prablemy zaŭvažyli. Pahromy — adziny srodak dla čynoŭnikaŭ prabić žaleznuju vizavuju zasłonu. Chočacie ŭ Šenhien? U takim razie vypuski «Eŭrańjus» sama mieniej miesiac pavinny pačynacca repartažam: «Praciahvajucca antyšyrakaŭskija pahromy ŭ mienskim pryharadzie Drazdy. Pavodle čutak, ich pryčynaj stała niaščasnaje zdareńnie: kavavarka francuskaj firmy «Moulinex» stuknuła tokam adnaho z deputataŭ pałaty pradstaŭnikoŭ. Heta stała apošniaj kroplaj dla zaciukanych eŭrapiejskimi sankcyjami biełaruskich kiraŭnikoŭ. Načami deputaty pałaty i členy ŭradu, uzbroiŭšysia kluškami, biehajuć pa kvartale i palać tački. Specnaz biaśsilny».
Naturalna, spačatku zachodniaja presa budzie aśviatlać pahromy ŭ Drazdach u tym ža duchu, u jakim «Saŭbiełka» aśviatlaje chvalavańni ŭ Francyi. Pisać, što «pahromščykam u EZ treba adnaho: pałapać blandynak». Kab zamaŭčać praŭdu, u chod pojdzie bajka ab relihijnaj zmovie. «Bandy pažyłych pravasłaŭnych ateistaŭ siońnia teraryzujuć Drazdy. Zaŭtra — katalickaja Eŭropa?» Jaki-niebudź chvacki pisaka, jak i jaho kaleha ŭ «SB», zakliča vyrašyć pytańnie «chirurhičnym srodkam» — departavać drazdoŭskuju španu z Eŭropy na histaryčnuju radzimu — u Kieniju, dzie ŭ Ałduvajskaj dalinie, jak ličycca, źjaviŭsia pieršy homa sapijens.
Adnak, pakolki ŭ eŭrapiejskim dyskursie pieravažajuć sentymentalnyja levyja, chutka nastroj źmienicca. Pačnucca pieramovy, padački i narešcie doŭhačakanyja, pryjemna pachnučyja vizy.
Dyk što, sp.Čarhiniec, budziem dalej zajavy prymać ci ŭ kramu — kuplać kluški?
Kamientary