17 vieraśnia na telekanale «Biełaruś 1» byŭ pakazany vystup kandydata ŭ prezidenty Taćciany Karatkievič. Palityk vystupała ź bieł-čyrvona-biełym ściažkom z vyjavaj «Pahoni». Jana pramaŭlała biez papierki, a skončyła vystup, vyjšaŭšy z-za trybuny i frazaj «Žyvie Biełaruś!»
Kandydat u prezidenty Taćciana Karatkievič zaklikaje padtrymać jaje na vybarach i prahałasavać za źmienu «staroj, niekampetentnaj, biezadkaznaj kamandy». Pra heta jana zajaviła padčas svajho pieršaha pieradvybarčaha vystupu pa kanale «Biełaruś-1» 17 vieraśnia.
Pa słovach Karatkievič, za ŭsie hady ŭrady Łukašenki «nie prydumali ničoha novaha, akramia jak žyć za košt Rasii, ale na spravie atrymlivajecca, što Rasija nažyvajecca na nas».
«Z 2006 hoda my płacim ekanamičnuju canu za nieabchodnaść palityčnaha pryznańnia našych vybaraŭ.
Łukašenka asabista abiacaŭ, što Jeŭrazijski sajuz zabiaśpiečyć našym pradpryjemstvam roŭnyja ŭmovy na rasijskim rynku. Ale hetaha da hetaha času niama, a paśla ŭstupleńnia ŭ Jeŭrazijski sajuz ekspart u Rasiju biełaruskich traktaroŭ i hruzavikoŭ, stankoŭ i bytavoj techniki niaŭchilna skaračajecca. Nam abiacali, što zachavajuć i adrodziać našu ciažkuju pramysłovaść, ale siońnia ŭsie našy pradpryjemstvy zakładniki rasijskich bankaŭ, u daŭhach, jak u šaŭkach.
Łukašenka nie zdolny damahčysia ad Rasii spraviadlivych umovaŭ handlu. I ŭsio tamu, što abapirajecca na Rasiju va ŭmacavańni asabistaj ułady. Jon raspłačvajecca našym dabrabytam za svajo palityčnaje daŭhalećcie!» — padkreśliła jana.
Kandydat u prezidenty ličyć, što vychad «sa składanaj situacyi jość». «I my hatovy jaho realizavać. Hety vychad daŭno viadomy na prykładzie inšych krain, jaho viedajuć našy ekśpierty i ŭrad taksama. My zatrymalisia z reformami, a tamu možam acanić čužy dośvied, kab pamienšyć kolkaść pamyłak i niehatyŭnych nastupstvaŭ reformaŭ», — skazała jana.
Karatkievič ličyć, što «jość čatyry zadačy, jakija my pavinny nieadkładna vykanać: spynić rost cenaŭ, vyciahnuć pramysłovaść z kryzisu, dać svabodu dziełavoj inicyjatyvie i pryciahnuć inviestycyi».
«Pierad tym jak pryjści siudy, ja sustrełasia z hrupaj rabočych i inžynieraŭ MAZa. Były honar krainy siońnia ŭ žałasnym stanie. Usim zrazumieła, što treba rabić, ale śpiecyjalistaŭ nichto nie choča čuć. Ministerstva pramysłovaści chvalujecca tolki ab płanavych ličbach i honić vypusk pradukcyi, jakuju niemahčyma pradać. Z 90-ch hadoŭ minułaha stahodździa my dobra pamiatajem, da čaho pryvodzić takoje kiravańnie ekanomikaj: da deficytu praduktaŭ, nizkich zarobkaŭ — da krachu.
Zavody pavinny pierastać vyrablać pradukcyju dla ptušački pa zamovie čynoŭnika. Treba dać svabodu dyrektaram pradpryjemstvaŭ, vyzvalić ad dyktatu biurakrataŭ.
Naš padychod — reforma vytvorčaści, aryjentacyja na rynak, svaboda dla inicyjatyvy. My raspracujem antykryzisny płan dla kožnaha prablemnaha zavoda i pad hetyja płany pryciahniem inviestycyi. Zaprosim novyja kamandy ŭ kiravańnie z novymi idejami i mietadami pracy», - zajaviła Karatkievič.
Kandydat u prezidenty źviarnułasia da ludziej z zavodaŭ-bankrutaŭ:
«Nie bojciesia. My zabiaśpiečym pieranavučańnie i pierapadrychtoŭku, damo lhotnyja kredyty tym, chto zachoča pačać svaju spravu, i na praciahu šaści miesiacaŭ paśla skaračeńnia budziem vypłačvać 75% zarobku. Pryvatny siektar budzie raźvivacca i stvarać novyja pracoŭnyja miescy. Nikoha nie vykinuć na vulicu, jak adbyvajecca siońnia».
«Hetaha patrabuje pieršy artykuł našaj Kanstytucyi. Tam skazana: Biełaruś — sacyjalnaja dziaržava. Tolki nas daviali da takoha stanu, što siońnia zachvareć, stracić pracu — samaje strašnaje, bo kali nie ty sam, to nichto pra ciabie nie pakłapocicca. Sacyjalnaja abarona źviedziena da minimumu. Zastałasia na ŭzroŭni słoŭ, dekłaracyj i ŭ repartažach BT. My vierniem jaje ŭ realnaje žyćcio», — zajaviła Karatkievič.
Apytanka
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała30
Kamientary