Pajechaŭ na adpačynak z žonkaj i dočkami, ale dadomu nie viarnuŭsia. U avaryi ŭ Hruzii zahinuŭ 38‑hadovy minčuk Siarhiej
U strašnaj avaryi, jakaja zdaryłasia 12 žniŭnia na hornaj darozie ŭ Hruzii, zahinuli čaćviora biełarusaŭ. Siarod ich — Siarhiej Rybałaŭ.
Na adpačynak jon pryjechaŭ razam z žonkaj Luboŭju i dźviuma maleńkimi dočkami. Jany taksama znachodzilisia ŭ mikraaŭtobusie, jaki na spusku z vysakahornaha kurorta Homismta sarvaŭsia ŭ ciaśninu.
Siarhiej Rybałaŭ pracavaŭ u AAT «Hazprom transhaz Biełaruś». Jahonaja žonka Luboŭ rodam z Hrodna, joj 35 hadoŭ. Siamja žyła ŭ Minsku i vychoŭvała dźviuch maleńkich dačok.
U sacsietkach Siarhieja zachavalisia zdymki z padarožžaŭ, u tym liku pa Jeŭropie, a taksama fota na zaśniežanym vadajomie, kala praśvidravanaj pałonki i ledabura. Miarkujučy pa hetym, zimovaja rybałka była adnym ź jahonych zachapleńniaŭ.
U Hruziju na adpačynak jany pajechali ŭsioj siamjoj.
Uviečary 12 žniŭnia hrupa biełaruskich turystaŭ viartałasia z Homismty — vysakahornaha kurortnaha pasiołka ŭ hruzinskim rehijonie Huryja. Homismtu nazyvajuć «kurortam nad abłokami». Ludzi padymajucca tudy dziela vidaŭ na hory, zachodaŭ sonca i Čornaha mora. Ale daroha da pasiołka i nazad prachodzić praz stromkija schiły i sierpancin.
Na 16‑m kiłamietry darohi ŭ bok Azurheci mikraaŭtobus źjechaŭ z prajeznaj častki, palacieŭ u ciaśninu i ŭrezaŭsia ŭ dreva. U sałonie znachodzilisia 19 hramadzian Biełarusi. Čaćviora ź ich zahinuli, jašče 15 atrymali traŭmy. Siarod paciarpiełych byli šaściora dziaciej.
Akramia Siarhieja Rybałava, achviarami avaryi stali 21‑hadovy Hleb Mielnik i jahonaja 20‑hadovaja niaviesta Nastaśsia Filuk z Bresta. Maładyja ludzi źbiralisia ažanicca i pajechali ŭ vandroŭku paśla zaručyn. Čaćviortaj zahinułaj stała 55‑hadovaja Žanna.
Pavodle śviedčańniaŭ vidavočcaŭ, padčas padzieńnia mikraaŭtobusa Siarhieja vykinuła praz łabavoje škło. Jon apynuŭsia nižej na schile i zahinuŭ nie adrazu. Naviersie zastavalisia jahonaja žonka i dočki. Jany bačyli Siarhieja, ale ničoha nie mahli zrabić.
Ratavalnaja apieracyja ŭ ciaśninie praciahvałasia niekalki hadzin. Častka pasažyraŭ vylecieła praz vokny, inšyja akazalisia zacisnutyja ŭ paškodžanym mikraaŭtobusie. Paciarpiełych dastavili ŭ balnicy Batumi, Azurheci i Čachataury. Spačatku dvoje znachodzilisia ŭ reanimacyi, adnak miedyki paviedamlali, što niepasrednaj pahrozy ich žyćciu niama. Da 16 žniŭnia z balnic vypisali 12 biełarusaŭ, u tym liku piaciarych dziaciej. Jašče troje zastavalisia pad nahladam daktaroŭ.
Adrazu paśla trahiedyi ŭ hruzinskich i biełaruskich miedyja źjavilisia supiarečlivyja viersii pavodzinaŭ kiroŭcy. Niekatoryja vydańni śćviardžali sa spasyłkaj na miascovych žycharoŭ, što jon paśpieŭ vyskačyć z mašyny. Vidavočcy avaryi, naadvarot, kažuć, što kiroŭca nie pakidaŭ mikraaŭtobus na chadu i sam atrymaŭ ciažkija traŭmy. U aficyjnym paviedamleńni hruzinskaj prakuratury pra skačok kiroŭcy nie havorycca.
Vyśvietliłasia, što ŭ kiroŭcy nie było katehoryi paśviedčańnia, nieabchodnaj dla pieravozki takoj kolkaści ludziej.
Kiroŭca taksama byŭ traŭmavany. 15 žniŭnia jaho dastavili z balnicy ŭ Azurhiecki rajonny sud. Sud pastanaviŭ pakinuć mužčynu pad vartaj. Jaho abvinavačvajuć u parušeńni pravił biaśpieki ruchu, jakoje pryviało da śmierci bolš jak dvuch čałaviek. Maksimalnaje pakarańnie pavodle hetaha artykuła — dziesiać hadoŭ pazbaŭleńnia voli.
Apošniaje viartańnie ŭ Minsk
17 žniŭnia cieły ŭsich čatyroch zahinułych adnym rejsam dastavili ŭ Minsk.
Siarhieja Rybałava pachavali ŭ Minsku ŭ sieradu, 19 žniŭnia.
Płanavali viasielle, ale nie viarnulisia z adpačynku. U avaryi ŭ Hruzii zahinuli 21‑hadovy Hleb i 20‑hadovaja Nastaśsia z Bresta
U Hruzii ŭ avaryi zahinuli čatyry biełarusy
«Dreva napałovu bus złamała». Stali viadomyja novyja padrabiaznaści trahičnaha zdareńnia ź biełaruskimi turystami ŭ Hruzii
Jašče vaśmiora paciarpiełych u DTZ u Hruzii biełarusaŭ vypisanyja z balnic
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks15
Kamientary
[Zredahavana]