U Biełarusi padymali avijacyju praz rasijskija hibrydnyja drony «Banderol». Zalacieli 12 bieśpiłotnikaŭ
Adrazu niekalki ŭkrainskich manitorynhavych kanałaŭ paviedamili, što ranicaj 22 žniŭnia na terytoryju Biełarusi zalacieli sama mieniej 12 rasijskich dronaŭ «Banderol», zaŭvažyła «Svaboda». Zhodna ź infarmacyjaj ukrainskich kanałaŭ, z aeradroma Baranavičaŭ padymali vajskovy samalot. U toj ža čas niama źviestak pra toje, jak rasijskija bieśpiłotniki abiasškodzili — źbili ci ŭździejničali srodkami radyjoelektronnaj baraćby.
U jakich kirunkach ruchalisia rasijskija drony
Pavodle Telegram-kanałv «Rinda monitoriť», «Banderoli» pačali ruchacca ŭ bok Biełarusi z 4‑j ranicy. Infarmacyja pra pieršy dron, što lacieŭ u kirunku źlikvidavanaj paśla čarnobylskaj katastrofy vioski Čykałavičy Brahinskaha rajonu Homielskaj vobłaści, źjaviłasia a 04:01.
A 04:04 — na viosku Ułasy Baranavickaha rajonu Bresckaj vobłaści.
A 04:06 i 04.15 — dźvie «Banderoli» — na Naroŭlu (Homielskaja vobłaść). Adna ź ich adrazu ŭziała kurs na Mazyr.
Ab dronie na Pietrykaŭ (Homielskaja vobłaść) infarmacyja źjaviłasia a 04:24.
Dron u kirunku ahraharadka Skryhałaŭ (Brahinski rajon, Homielskaja vobłaść) «Banderol» zafiksavali a 04:28.
A 04:28 — jašče adzin dron na Pietrykaŭ, a 04:36 — na Radkaŭ Pietrykaŭskaha rajona Homielskaj vobłaści, a 04:41 — na Kapatkievičy Pietrykaŭskaha rajona.
A 04:45 źjaviłasia infarmacyja ab «Banderoli», što ruchałasia ŭ bok miastečka Azaryčy Kalinkavickaha rajona Homielskaj vobłaści. Pavodle ŭkrainskaha manitorynhu, mienavita tam u pavietra padniali źniščalnik Su-30.
Praź dźvie hadziny paśla hetaha — a 06:22 źjaviłasia infarmacyja ab rasijskim dronie ŭ rajonie Jelska (Homielskaja vobłaść), a 06:30 — na Mazyr.
Jašče adzin ukrainski manitorynhavy kanał a 04:33 ab dronie ŭ rajonie raki Pcič paviedamiŭ i a 04:40 — u Kapatkievičach (imavierna, heta toj ža dron, ab jakim a 04:41 paviedamlaŭ pieršy kanał).
Pavodle kanału «JeRadar», a 04:42 z aeradromu ŭ Baranavičach u pavietra padniaŭsia jašče adzin vajskovy samalot.
Što viadoma pra rasijskija drony «Banderol»
Drony «Banderol» — hibryd małahabarytnaj kryłataj rakiety i reaktyŭnaha ŭdarnaha drona. Jon maje chutkaść da 650 kiłamietraŭ na hadzinu i zdolnaść pierahružać supraćpavietranuju abaronu.
Dalokaść palotu hetaha drona składaje 500 kiłamietraŭ, jon moža nieści da 50 kiłahramaŭ vybuchoŭki.
U siłach supraćpavietranaj abarony Ukrainy nieadnarazova zajaŭlali, što hałoŭnaja niebiaśpieka «Banderolaŭ» u tym, što ich praz reaktyŭny ruchavik i vysokuju chutkaść składana pierachapić mabilnymi hrupami.
Dla źbićcia hetaha vidu bieśpiłotnikaŭ patrebnyja bolš składanyja zienitnyja kompleksy.
Aproč taho, hetyja rakiety-drony majuć vialikuju płošču askiepkavaha paražeńnia celaŭ.
Viadoma sama mieniej dva vypadki, kali «Banderoli» zalatali na terytoryju Małdovy. U adnym vypadku jon paceliŭ u dreva, ale ad vybuchovaj chvali tady mocna paciarpieli pryvatnyja budynki adnaho z nasielenych punktaŭ. Paśla hetaha vypadku Kišynioŭ adklikaŭ svajho pasła z Rasii.
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary