«Tolki ŭ nas usio jašče modna chadzić u salaryi i abharać». Kaśmietołah pra toje, jak pravilna kantaktavać z soncam
Pierad siezonam letnich adpačynkaŭ my sustrelisia z kaśmietykam miedycynskaha centra «Łade» Luboŭju Sakałovaj, kab rasstavić ŭsie kropki nad «i» ŭ adnosinach z soncam i salaryjami.
Kali vy jašče nie viedali, što salaryi — daŭno nie modna i nie karysna, a nanosić soncaabaronny krem varta nie tolki kala vady ŭ kupalniku, a i štodzionna (viasnoj, letam, a niekatorym ludziam — navat zimoj), to čytajcie ŭvažliva.
Što adbyvajecca z našaj skuraj padčas zaharu?
Zahar — heta abaronnaja reakcyja arhanizma ŭ adkaz na ŭltrafijaletavaje vypramieńvańnie. Paśla ŭździejańnia ŭltrafijaleta miełanacyty (kletki epidermisu) pačynajuć vypracoŭvać pihmient miełanin. Kali kazać pra typy skury, to ŭ biełarusaŭ jana ŭ asnoŭnym śvietłaja ci siaredniaja — my vielmi lohka zharajem.
Zaharać pravilna — heta jak?
U vypadku z zaharam padčas adpačynku samyja kamfortnyja hadziny — z 8.00 da 11.00 i paśla 16.00
Darečy, mała chto viedaje, što samy žorstki, niebiaśpiečny ŭltrafijalet — mienavita viasnovy (letam my chacia b bolš-mienš razumiejem, što treba karystacca kremam). Ź pieršym źjaŭleńniem soniejka my starajemsia padstavić jamu tvar, papieścicca i atrymać porcyju vitaminu D, ale kali nie karystacca kremam chacia b ź minimalnym SPF-faktaram, možna nažyć prablemy.
U asablivaj hrupie ryzyki ludzi, skura jakich schilnaja da pihmientacyi (viasnuški, chłaazmy). Ich soniejka moža «dastać» navat vosieńniu ci zimoj (letam ža praces pihmientacyi tolki nakoplivajecca).
Tamu pažadana vykarystoŭvać śpiecyjalnyja kremy i ŭ chałodny siezon. Darečy, pryčynami źjaŭleńnia hipierpihmientacyi moža być nie tolki praciahłaje znachodžańnie na soncy. Pryvodzić da ich mohuć i harmanalnyja źmieny, pryjom peŭnych antybijotykaŭ, kaśmietyčnyja srodki, zachvorvańni piečani.
Kab pierastrachavacca, raju ludziam, jakija časta znachodziacca letam i viasnoj u horadzie, pierad vychadam na vulicu vykarystoŭvać krem z SPF 25-30. Dla mora ci adpačynku za horadam pažadana abarona z SPF 50. Taki krem ekraniruje UVA- (viaduć da pihmientacyi) i UVB-pramiani (mohuć pryvieści da rakavych zachvorvańniaŭ).
Pamiatajcie, što ŭ luboha kremu jość termin dziejańnia, i navat kali napisana, što jon vodaŭstojlivy, to ŭsio adno častkova zmyvajecca. Tamu paśla kožnaha vychadu z vady nanoście jaho znoŭ.
Jaki soncaabaronny krem abrać navičku?
Lepš prakansultavacca z kaśmietołaham. Jak minimum, na pryjomie ŭ śpiecyjalista vy možacie vyprabavać na sabie pradukt peŭnaj prafiesijnaj linii. A zhodna z vašym typam skury prafiesijanał padbiare toje, što najbolš joj pasuje.
Kali nie atrymajecca pryjści da kaśmietołaha, to ja raju nabyvać takuju kaśmietyku chacia b u aptekach — tam jana dakładna budzie nie padroblenaj, ź siertyfikatami, a farmaceŭt prakansultuje vas lepš, čym pradaviec u kramie z mas-markietam.
Kali ja karystajusia dekaratyŭnaj kaśmietykaj, jak spałučać jaje z kremam SPF?
Siarod siońniašnich praduktaŭ možna abrać SPF-kremy, jakija mohuć dadatkova słužyć i dla dohladu: z efiektam uvilhatnieńnia ci vitaminami. I kali raniej ich struktura pry vysokim SPF stvarała na tvary efiekt maski, to ciapier jość šmat varyjantaŭ, jakija vyhladajuć naturalna.
Akramia taho, u skład šmatlikaj dekaratyŭnaj kaśmietyki filtry ŭklučanyja sami pa sabie: niekatoryja tanalnyja kremy i pudry źmiaščajuć 25 SPF. Ale kali vy karystajeciesia kaśmietykaj na mory, to praz hadziny dźvie-try jaje lepš zmyć, a paśla nanieści novuju porcyju.
Ci možna zaharać toples?
Ź dziacinstva nas vučać, što peŭnyja ŭčastki cieła padčas zaharu lepš zakryvać. Ale kali ŭsio ž dziaŭčyna vyrašyła zaharać bieź vierchniaj častki kupalnika, to abaviazkovaje naniasieńnie kremu z vysokim SPF. Saski ž treba zakryvać chacia b nalepačkami.
Dadamo, što pierš čym vyrašycca na takuju aktyŭnuju insalacyju, treba abśledavacca ŭ daktaroŭ. Bo ź miestapatyjaj, pry lubych padazreńniach na hiniekałahičnyja i skuranyja zachvorvańni zaharać takim čynam zabaroniena. Pacyjentam, jakija majuć bujnyja radzimki, lepš pierad soniečnymi vannami ich zaklejvać ci ŭvohule nie ryzykavać: dabrajakasnyja ŭtvareńni mohuć chutka pieraŭtvarycca ŭ złajakasnyja.
Što rabić z vusnami?
Z vusnami letam adbyvajecca toje samaje, što i zimoj: jany pierasušvajucca. Tolki kali zimoj u hetym vinavaty maroz i avitaminoz, to letam — ultrafijalet. Vykarystoŭvajcie śpiecyjalnyja hihijeničnyja pamady, jakija taksama ŭtrymlivajuć SPF. Dadatkova skažu, što treba abaraniać i vałasy: isnuje šmat dobrych sprejaŭ z SPF-faktarami. Ź ich dapamohaj vy, pa-pieršaje, zachavajecie svoj koler vałasoŭ. Pa-druhoje — vilhotnaść. Hałaŭny ŭbor pry hetym nichto nie admianiaŭ.
Zahareły — značyć zdarovy? Daloka nie zaŭsiody
Čamuści ŭ našym mientalitecie da hetaha zakładziena: viarnuŭsia z mora nie zahareły — značyć, nie adpačyvaŭ. Navat mnie, viedajučy pra maju śpiecyjalnaść, znajomyja ci pacyjenty mohuć zadavać pytańnie: «Čamu vy viarnulisia biełaj?».
A ja viedaju, što nie budu hvałtavać svajo cieła i naŭmysna nanosić jamu škodu. Zaharać zdarova možna i ŭ cieniu. A kali skura biełaja, to jak ni kruci, pry praciahłym znachodžańni na soncy vy pačyrvaniejecie i atrymajecie apioki.
Nazapašvańnie ŭ ciele ŭździejańnia pramianioŭ moža nie adčuvacca adrazu, ale adhukniecca paźniej: karyčnievymi plamami i pastarełym tvaram z marščynami (jość takoje paniaćcie jak fotastareńnie — vy možacie rabić karysnyja pracedury i maski, a paśla adnym macham pierakreślić ich efiekt biazdumnym znachodžańniem na soncy).
Kali pacyjenty prychodziać da mianie na pryjom z apiokami i vialikimi pihmientnymi plamami, jany ŭžo hatovyja chadzić u skafandrach, kab tolki heta nie paŭtaryłasia.
Ale tut užo prychodzicca vypraŭlać nastupstvy: vykarystoŭvać łaziernyja pilinhi. I na žal, pracedura pry mocnych paškodžańniach skury nie zaŭsiody daje stoadsotkavy vynik.
Mahu ja papoŭnić zapasy vitaminu D lekami i z dapamohaj salaryja?
Pierad tym, jak pačynać pić luby vitamin, treba prakansultavacca z doktaram. Zdać analizy i ŭbačyć, čaho sapraŭdy nie chapaje vašamu arhanizmu. Bieskantrolna pić vitaminy, jak i lubyja inšyja miedycynskija preparaty, nielha.
Što tyčycca salaryjaŭ, to kaśmietołahi suprać.
Va ŭsim śviecie ad ich admaŭlajucca, i tolki ŭ nas mocna zamacavałasia luboŭ da ich. Kali vielmi chočacca być zaharełym na niejkuju padzieju, vykarystoŭvajcie aŭtazahar. A kali idziacie na ryzyku z salaryjam, chacia b nie zabyvajciesia ŭžyvać śpiecyjalnuju liniejku kremaŭ dla znachodžańnia tam, na saski — nalepki, na hałavu — šapačku.
Padčas łaktacyi, ciažarnaści, ludziam ź vialikaj kolkaść radzimak naviedvać salaryi nielha ni ŭ jakim razie.
Kali ŭsio ž abhareŭ, što rabić?
Našy babuli i dziaduli ŭ takich vypadkach lubili dastavać z chaładzilnika chałodnyja śmiatanu i kiefir. Siońnia my nie rekamiendujem pacyjentam źviartacca da kisła-małočnyja praduktaŭ: usio ž skura paškodžanaja, jość uvachodnyja varoty dla infiekcyi (asabliva kali pradukty nie pieršaj śviežaści).
Kali treba chutka źniać efiekt hareńnia, vaźmicie lod ci prymicie chałodnuju vannu, duš. A paśla biažycie ŭ apteku pa pantenoł.
Kamientary