Amierykanskija navukoŭcy raspracavali vakcynu suprać reŭmatoidnaha artrytu
Amierykanskija navukoŭcy raspracavali ekśpierymientalnuju vakcynu suprać reŭmatoidnaha artrytu — balučaha aŭtaimunnaha zachvorvańnia, jakoje na dadzieny momant nie paddajecca lačeńniu. Artykuł z apisańniem apublikavany ŭ časopisie Proceedings of the National Academy of Sciences.
Reŭmatoidny artryt uźnikaje, kali ŭłasnaja imunnaja sistema arhanizma atakuje i razburaje zdarovyja tkanki, u pieršuju čarhu sustavy kiściaŭ, zapiaściaŭ, halonkastupniovych sustavaŭ i kaleniaŭ.
«Niahledziačy na vysokuju raspaŭsiudžanaść, lekaŭ ad hetaha zachvorvańnia niama, i my nie da kanca viedajem, što jaho vyklikaje. Zrešty, heta słušna amal dla ŭsich aŭtaimunnych zachvorvańniaŭ, što abciažarvaje ich lačeńnie abo prafiłaktyku», — pryvodziacca ŭ pres-relizie Univiersiteta Taleda ŭ štacie Ahaja słovy kiraŭnika daśledavańnia doktara Rytu Čakravarci (Ritu Chakravarti), dacenta kaledža miedycyny i navuk ab žyćci.
Čakravarci na praciahu mnohich hadoŭ vyvučała białok pad nazvaj 14-3-3 dzieta i jaho rolu ŭ imunnych patałohijach, uklučajučy anieŭryzmy aorty, a taksama interlejkin-17-cytakin, źviazany z aŭtaimunnymi zachvorvańniami. Daśledčyki vyjavili, što vydaleńnie białku 14-3-3 dzieta z dapamohaj technałohii redahavańnia hienaŭ vyklikaje raźvićcio ciažkaha artrytu ŭ łabaratornych žyvioł.
Hruntujučysia na zdahadcy ab tym, što białok 14-3-3 dzieta abaraniaje ad reŭmatoidnaha artrytu, navukoŭcy raspracavali vakcynu na asnovie ačyščanaha białku, vyhadavanaha ŭ bakteryjalnaj kletcy. U nastupnych ekśpierymientach na žyviołach aŭtary dakazali, što vakcyna spryjaje mocnamu, nieadkładnamu i praciahłamu adkazu z boku pryrodžanaj imunnaj sistemy arhanizma, što zabiaśpiečvaje abaronu ad chvaroby.
«Na naša vialikaje ździŭleńnie, reŭmatoidny artryt całkam źnik u žyvioł, jakija atrymali vakcynu, — kaža Čakravarci. — Kali my zmožam paśpiachova davieści hetuju vakcynu da kliničnych vyprabavańniaŭ, heta budzie revalucyjna».
Akramia padaŭleńnia raźvićcia artrytu, vakcyna taksama značna palepšyła jakaść kostak, što praduhledžvaje dadatkovyja doŭhaterminovyja pieravahi paśla imunizacyi.
U ciapierašni čas reŭmatoidny artryt lečać u asnoŭnym kortykasteroidami, imunadepresantami šyrokaha śpiektru dziejańnia abo bolš novymi bijałahičnymi preparatami, jakija nakiravany na kankretny zapalenčy praces. Choć hetyja terapieŭtyčnyja srodki palahčajuć bol i zapavolvajuć prahresavańnie zachvorvańnia, jany taksama robiać pacyjentaŭ bolš uraźlivymi dla infiekcyj, da taho ž jany časta vielmi darahija.
«U nas zusim inšy padychod. Stratehija na asnovie vakcyny, jak my spadziajomsia, moža nie tolki lačyć, ale i praduchilać reŭmatoidny artryt. Patencyjał tut vielizarny», — adznačaje navukoviec.
-
Donar z ankahiennaj mutacyjaj staŭ baćkam amal 200 dziaciej u Jeŭropie — niekatoryja ŭžo pamierli ad raku
-
Mužčyna niečakana vylekavaŭsia ad VIČ paśla pierasadki zvyčajnych stvałavych kletak
-
Čym kavid adroźnivajecca ad prastudy, kali biehčy da doktara, a kali možna lačycca doma — top parad ad terapieŭta na pieryjad prastud
Kamientary