Juryst: Zvyšpaŭnamoctvy UNS mohuć vyklikać pierakos u pracy dziaržaŭnych orhanaŭ i spravakavać kanstytucyjny kryzis
Učora faktyčna było paćvierdžana, što Usiebiełaruski narodny schod budzie mieć status supierorhana. Pa słovach sudździ Kanstytucyjnaha suda Volhi Siarhiejevaj, UNS płanujuć nadzialić pravam admieny luboha rašeńnia dziaržaŭnaha orhana i pravavoha akta. Vyklučeńnie — sudovaje rašeńnie. Ci nie źjaŭlajecca heta pravavym kazusam? A što nakont źmienaŭ u samoj Kanstytucyi? «Naša Niva» źviarnułasia za kamientaryjem da advakata Andreja Mačałava, jaki byŭ pazbaŭleny ŭ Biełarusi licenzii.
«U apublikavanym prajekcie źmienaŭ u Kanstytucyju hetaja prapanova ŭklučanaja ŭ artykuł 89-5, — źviartaje ŭvahu juryst. — Ja razhladaju jaje chutčej jak nieracyjanalnuju. Sprava ŭ tym, što ŭ kožnaha dziaržaŭnaha orhana jość peŭny paradak pryniaćcia rašeńniaŭ, i ŭ vypadku najaŭnaści paŭnamoctvaŭ — vydańnia pravovych aktaŭ. Praduhledžany miechanizm skasavańnia rašeńniaŭ i aktaŭ vyšejstajačym dziaržaŭnym orhanam, sudom ci Kanstytucyjnym sudom. Uklučeńnie ŭ normatvorčy łancužok jašče i UNS, asabliva pry niapeŭnaści nakont struktury i paŭnamoctvaŭ hetaha orhana, ujaŭlajecca nieabhruntavanym».
Jak ličyć advakat, heta vyklikaje pierakos u pracy dziaržaŭnych orhanaŭ i nieabhruntavana nadzielić UNS zvyšpaŭnamoctvami, što supiarečyć ahulnym kanstytucyjnym pryncypam.
Paŭstaje łahičnaje pytańnie, ci nie dezavuiruje novaŭviadzieńnie zakonatvorčaść. Jaki sens, kali ŭsio moža być admieniena rosčyrkam piara?
«Bolš vierahodna, što heta moža dezavuiravać normatvorčaść u peŭnych śfierach, najpierš stratehičnych, jakija buduć bolš cikavyja dla UNS», — ličyć Andrej Mačałaŭ.
Pa słovach jurysta, historyja viedaje mnostva takich precedentaŭ, ale samyja blizkija dla nas prykłady — źjezdy KPSS: «Mnie heta vielmi nahadvaje UNS u redakcyi Kanstytucyi, što nam prapanoŭvajuć. Nie treba być historykam, kab razumieć, jak heta adbiłasia na raźvicii Biełarusi, i čym abiarnułasia dla našaj krainy».
Remarka Volhi Siarhiejevaj nakont admieny luboha pravavoha akta prahučała nastolki biezapielacyjna, što ŭźnikła pytańnie, a ci možna źmianić rašeńniem UNS jaki-niebudź artykuł Kanstytucyi.
«Tut jość vielmi surjoznaja supiarečnaść, i ŭ budučym, kali prapanoŭvajemaja redakcyja budzie pryniataja, heta moža spravakavać kanstytucyjny kryzis, — ličyć Andrej Mačałaŭ. — Z adnaho boku, UNS prapanujuć nadzialić paŭnamoctvam skasoŭvać pravavyja akty. Siońnia zakanadaŭstva Biełarusi adnosić da narmatyŭnych pravavych akty ad techničnych da Kanstytucyi. Tearetyčna, heta moža pahražać demakratyčnym pryncypam krainy. Z druhoha boku, raździeł VIII Kanstytucyi (jak dziejučaj, tak i toj, što prapanoŭvajuć) praduhledžvaje, što Kanstutycyja moža być źmienienaja dvumia sposabami — parłamientam ci na refierendumie».
Čytajcie taksama:
Ci zmoža prezident zajmać pasadu staršyni UNS? Nie, nie zmoža. Ale Łukašenka — zmoža
Ciapier čytajuć
Ofis pra skandał ź Cichanoŭskim: Brytanskaja viza była apłačanaja, ale jon tak i nie padaŭsia na zdaču adbitkaŭ palcaŭ18
Kamientary