Safija Sapieha znachodzicca zaraz u Tajłandzie

Safija Sapieha, pamiłavanaja dniami Łukašenkam, znachodzicca ŭ Tajłandzie z baćkam.

«My z Aleham Mikałajevičam (hubiernatar Prymorja. — «NN») damovilisia, što nam patrebna pieradyška. Dačka ciapier śpić», — skazaŭ baćka Safii Andrej, paviedamlaje «PrimeMedia. Prymorje».

Vydańnie zaznačaje, što klučavuju rolu ŭ vyzvaleńni dziaŭčyny syhraŭ Žan Kuźniacoŭ.

«Nie tamu, što jon mianie paprasiŭ ci ja chaču raskłaniacca pierad im. Prosta heta fakt, i treba addać naležnaje Alehu Mikałajeviču Kažamiaku.

Pravadnikom pamiž nami vystupiŭ Žan Anzorjevič Kuźniacoŭ — ministr sportu Prymorskaha kraju, moj samy blizki siabar i chrosny baćka Safii. Mienavita jon arhanizavaŭ našu sustreču», — raspavioŭ baćka Safii Andrej Sapieha.

«My sustrelisia ŭ aeraporcie i havaryli ŭsiaho 5—10 chvilin, ale da taho momantu Aleh Mikałajevič [Kažamiaka] ŭžo paśpieŭ źviazacca z Alaksandram Ryhoravičam. Jon vielmi ciopła adreahavaŭ na moj zvarot, pastaviŭsia pa-čałaviečy. Skazaŭ: «Mnie ŭsio zrazumieła, mianie hetaja situacyja kranuła. Ja dapamahu». I na hetym usio. Potym my praktyčna nie razmaŭlali asabista. Ale ja atrymaŭ infarmacyju pa svaich kanałach, u tym liku ad pres-sakratara Alaksandra Ryhoraviča. Jana raspaviadała, što pry kožnym zručnym vypadku Aleh Mikałajevič sprabuje vyrašyć hetaje pytańnie. I heta davała nadzieju. Choć, viadoma, my raspačali i inšyja dziejańni, sprabavali sami prasić ab pamiłavańni. Ja pamiataju niekalki momantaŭ, kali havaryłasia, što Safija jaho atrymaje, bo było vidavočna, što va ŭsioj hetaj situacyi jana… (…)

Jana prosta nie paśpieła «saskočyć» z hetaha ŭ našym vypadku samalota, choć ja na hetym nastojvaŭ śpiecyjalna, kali daviedaŭsia pra jaje znajomstva z Pratasievičam. Ja adrazu skazaŭ, što znajomstva taksičnaje i da dobraha nie pryviadzie. Kali dačka źbirałasia ŭ Hrecyju, ja nie viedaŭ, što ŭ hetuju pajezdku jany laciać razam. Safija kazała, što narešcie ź im razyšłasia. Toje, što heta niapraŭda, vyśvietliłasia z publikacyi pra pasadku samalota. Viadoma, dla mianie heta byŭ šok», — raspavioŭ baćka.

***

Nahadajem, što pamiłavanuju Alaksandram Łukašenkam Safiju Sapiehu pieradali 7 červienia z papraŭčaj kałonii ŭ Homieli delehacyi Prymorskaha kraju, jakuju ŭznačalvaŭ hubiernatar Aleh Kažamiaka.

Safija Sapieha razam z Ramanam Pratasievičam byli zatrymanyja 23 maja 2021 hoda ŭ vyniku prymusovaj pasadki ŭ Minsku samalota Ryanair rejsam Afiny — Vilnia. 

6 maja 2022 hoda Sapiehu asudzili da šaści hadoŭ kałonii. Sud pryznaŭ jaje vinavataj u raspalvańni sacyjalnaj varožaści, źlivie danych siłavikoŭ (sprava «Čornaj knihi Biełarusi»). Hod jana praviała ŭ homielskaj kałonii, dzie padviarhałasia cisku.

Raman Pratasievič byŭ asudžany 3 maja 2023 hoda na 8 hadoŭ kałonii ŭzmocnienaha režymu pa spravie Nexta. 22 maja jon byŭ pamiłavany. 

• 18
• 0
• 3
• 2
• 0
• 5
• 5
• 0