Łatvijskija deputaty padtrymali novuju kancepcyju nacbiaśpieki, adzin z punktaŭ jakoj praduhledžvaje zabaronu na ruskuju movu ŭ hramadskich ŚMI z 2026 hoda.
Deputaty Siejma Łatvii ŭchvalili prajekt Kancepcyi nacyjanalnaj biaśpieki, adzin z punktaŭ jakoj praduhledžvaje zakryćcio łatvijskich hramadskich ŚMI na ruskaj movie, piša Deutsche Welle.
Za prajekt prahałasavali 68 parłamientaryjaŭ, suprać vystupili 10 deputataŭ. U adnym z raździełaŭ kancepcyi, jakuju padtrymaŭ parłamient krainy, havorycca, što z 2026 hoda hramadskija miedyja možna budzie vydavać tolki na łatyšskaj movie abo na inšych movach ES, Jeŭrapiejskaj ekanamičnaj zony i movach krain — kandydataŭ na ŭstupleńnie ŭ ES.
«Dziaržava, spyniŭšy finansavańnie padtrymki na ruskaj movie, zavieršyć praces stvareńnia adzinaj infarmacyjnaj prastory. U svaju čarhu, utrymańnie na ruskaj movie ŭ kamiercyjnych miedyja za pryvatnyja srodki praciahnie prysutničać», — skazana ŭ kancepcyi.
Łatvijskaje radyjo i Łatvijskaje telebačańnie (LTV) raniej vystupili suprać uklučanaj u prajekt kancepcyi zabarony na stvareńnie ruskamoŭnaha kantentu ŭ hramadskich ŚMI. U LTV takuju prapanovu nazvali «blizarukaj» i dyjamietralna procilehłaj pastaŭlenaj mecie — umacavańniu biaśpieki infarmacyjnaj prastory.
«Spadziavacca, što ŭsie ludzi, jakija štodnia spažyvajuć miedyjakantent na ruskaj movie, 1 studzienia 2026 hoda pieraklučacca na ŚMI, jakija viaščajuć na łatyšskaj movie, — heta myśleńnie žadańniaŭ, a nie rašeńnie, zasnavanaje na daśledavańniach pra zvyčki spažyvańnia pradukcyi ŚMI», — skazana ŭ publičnaj zajavie dla ŚMI.
Rada hramadskich elektronnych ŚMI taksama zaklikała ŭłady admovicca ad zabarony, padkreśliŭšy, što jakasny kantent na ruskaj movie patrebny dla achopu ruskamoŭnych ludziej, jakija žyvuć u krainie «z metaj umacavańnia pačućcia prynaležnaści da Łatvii».
Stanam na 2023 hod, ruskich u Łatvii žyło 23 pracenty, ukraincaŭ i biełarusaŭ — pa try pracenty. Adnak u Ryzie ruskich 34 pracenty, ukraincaŭ — 4,86%, biełarusaŭ — 3,48%. U Daŭhaŭpiłsie (Dźvinsku) łatyšy składajuć usiaho 21 pracent, palaki — 13 pracentaŭ.
Kamientary
https://dck8xvlq18iei.cloudfront.net/327277