«Paśla słužby imknusia dadomu da žonki Volhi i syna, jakoha liču svaim rodnym». Bałaba raspavioŭ pra novy šlub
Kamandzir minskaha AMAPa Dźmitryj Bałaba daŭ intervju «Minskaj praŭdzie», u jakim siarod prapahandysckaj rytoryki raskazaŭ pra svajo asabistaje žyćcio.
Bałaba kaža, što abodva jaho syny słužać u AMAPie.
«Ja ich nie pierakonvaŭ u hetym i nie nastojvaŭ. Starejšy syn zajmaŭsia handbołam, i jamu było 13 hadoŭ, kali pastaviŭ mianie pierad faktam, što budzie pastupać u Suvoraŭskuju vajskovuju vučelniu. Musić, ja pakazaŭ svaim prykładam, časta braŭ z saboj na palihony, stralbu. Darečy, unuka taksama chacieŭ uziać z saboj na kvalifikacyjnyja vyprabavańni. Małodšy syn skončyŭ licej MUS», — kaža Bałaba.
Pieršym miescam pracy jaho małodšaha syna była patrulna-pastavaja słužba.
«Paśla hetaha vopytu prajšoŭ kvalifikacyjnyja vyprabavańni i staŭ uładalnikam zapavietnaha biereta, bajcom padraździaleńnia AMAP», — raspaviadaje Bałaba.
Pra małodšaha ž syna jon raskazaŭ krasamoŭnuju historyju.
«Małodšy zachaplaŭsia muzykaj, na momant 2020 hoda ŭžo słužyŭ u AMAPie. Jamu patelefanavali siabry, ź jakimi jon hraŭ u nievialikim muzyčnym hurcie, i paprasili pahavaryć sa mnoj, kab ja addaŭ rasparadžeńnie i AMAP skłaŭ ščyty. Moj syn adkazaŭ vielmi vyrazna admovaj i paprasiŭ svaich «siabroŭ» jamu bolš nikoli nie telefanavać», — pieradaje vydańnie słovy Bałaby.
Amapaviec dadaje, što na jaho prykładzie syny bačyli nie tolki «śpiecyfiku słužby, fizičnyja i emacyjnyja nahruzki, ale i važnaść nadziejnaha tyłu dla kožnaha supracoŭnika padraździaleńnia — jaho siamji».
«Mahu z honaram skazać, što paśla słužby i składanaha dnia zaŭsiody imknusia dadomu da žonki Volhi i syna, jakoha liču svaim rodnym», — padzialiŭsia Bałaba źviestkami pra svaju druhuju siamju.
Jak možna mierkavać, Volha — heta Volha Maršałovič (Syščanka) — aktyŭnaja ŭdzielnica praŭładnych aŭtaprabiehaŭ.
U Minskim rajonnym sudzie ŭ listapadzie 2021 hoda da adnaho hoda pazbaŭleńnia voli asudzili 34-hadovuju Śviatłanu Saŭčanka. Jaje abvinavacili ŭ chulihanstvie za toje, što 2 vieraśnia 2020 hoda na praŭładnym aŭtaprabiehu ŭ Novaj Baravoj jana sarvała z mašyny płastmasavaje dreŭka i niekalki razoŭ stuknuła pa mašynie Land Rover, jakaja ŭdzielničała ŭ im.
Paciarpiełaj pa spravie pryznanaja adna z arhanizatarak praŭładnych aŭtaprabiehaŭ Volha Maršałovič (Syščanka).
U kancy 2021 hoda kibierpartyzany apublikavali źliŭ, u jakim Bałaba skardziŭsia namnačalnika Kastryčnickaha RUVD Dźmitryju Bieliku, kab toj pryniaŭ miery suprać Antona Matolki, na sajcie jakoha była apublikavanaja infarmacyja pra pryvatnaje žyćcio Bałaby. U toj ža hutarcy Bałaba raspavioŭ, što jon raźvioŭsia sa svajoj byłoj žonkaj i padzialiŭ ź joj majomaść.
Ciapier čytajuć
Łukašenka sprabavaŭ vyśvietlić, chto nastukaŭ Pucinu pra hieorhijeŭskija stužki12
Kamientary