Siońnia Michału Aniempadystavu było b 60 hadoŭ

Michał Aniempadystaŭ naradziŭsia ŭ Miensku 16 sakavika 1964 hoda. Dyzajnier, fatohraf, hrafik, paet, publicyst. Siabra Biełaruskaha sajuzu dyzajnieraŭ i Biełaruskaha PEN-kłuba. Navučaŭsia ŭ Mienskaj mastackaj vučelni, pracavaŭ u žanrach užytkovaj hrafiki, ilustracyi, płakatu, fatahrafii. Udzielničaŭ u kalektyŭnych i piersanalnych vystavach za miažoj i ŭ Biełarusi.

Jahonyja vieršy stali pieśniami N.R.M., «Novaha Nieba», Źmitra Vajciuškieviča, IQ48 i inšych, jon byŭ aŭtaram kancepcyi i mnohich tekstaŭ słavutaha «Narodnaha alboma» (pryznanaha «Albomam hoda» na «Rok-karanacyi — 1997»), pierakładaŭ polskija rok-chity dla biełaruskich śpievakoŭ. «Narodny albom» na doŭhija hady staŭ admietnaj padziejaj dla ajčynnaj muzyki.

Pieśni z «Narodnaha alboma» vykonvali takija zorki biełaruskaj sceny, jak Lavon Volski, Kasia Kamockaja, Alaksandr Pamidoraŭ i inšyja.

Aniempadystaŭ zavajavaŭ premiju «Čałaviek hoda — 2006» pa viersii internet-partału «Tuzin hitoŭ». U 2013 hodzie vydaŭ zbornik svaich vieršaŭ «Hłyboka, hłyboka, na dnie filižanki kavy».

Taksama Aniempadystaŭ stvaraŭ vokładki dla muzyčnych albomaŭ. Vioŭ na sajcie kampanii «Budźma biełarusami!», dla jakoj stvaryŭ łahatyp, kałonku «Prostyja rečy».

Kniha «Koler Biełarusi», jakuju jon napisaŭ, stała kultavaj. Heta ŭnikalny ahlad farmavańnia koleravaj śviadomaści biełarusaŭ tvorčym vokam mastaka. U knizie jak apisańni koleraŭ, ich bytavańnia ŭ mastactvie, relihii, bytavym žyćci narodu, tak i dziasiatki ŭnikalnych fotailustracyjaŭ, jakija śviedčać pra ŭplecienaść razhladanaha koleru ŭ palitru navakolla.

Adzin ź piśmieńnikaŭ kazaŭ, što Michał skanstrujavaŭ novuju DNK biełaruskaj kultury, inšy nazvaŭ Aniempadystava «ikonaju stylu».

Michał Aniempadystaŭ byŭ udzielnikam biełaruskaha adradženckaha ruchu jašče z «Biełaruskaj majstroŭni« pačatku 1980-ch. Hienieravaŭ i ŭvasablaŭ vobraznyja idei dla biełaruskich hramadskich i palityčnych kampanijaŭ — «Barani svajo», «Budźma biełarusami», «Vybiraj!». Jak mastak i śviadomy mieścič Aniempadystaŭ baraniŭ ad razbureńnia viadomy rajon svajho rodnaha Mienska Asmałoŭka. Abaranić rajon udałosia, i jon zachavaŭsia pa siońnia.

Paśla raptoŭnaje śmierci mastaka źjaviłasia kniha ŭspaminaŭ pra jaho «Prostyja słovy. Michał Aniempadystaŭ». Nazvu abrali niezdarma — pieśnia «Prostyja słovy» z «Narodnaha alboma» stała sapraŭdnym hitom, jaje j dahetul śpiavajuć u darozie, pry vohniščy, na siabroŭskich biasiedach i inšaziemcam, znajomiačy ich ź biełaruskaj kulturaj. U knizie sabranyja cikavyja i mienš viadomyja fakty pra Aniempadystava, jahonyja vieršy i pieśni dla «Narodnaha albomu» i hurtu «Novaje nieba», raniej nie publikavany scenar «Narodnaha albomu» dla polskaj televizii, unikalnyja fotazdymki i «mahičnaja mapa» Aniempadystava, a taksama ŭspaminy pra jaho bolš jak 60 čałaviek.

Michała Aniempadystava nie stała ŭ studzieni 2018 hoda.

U 2019 hodzie ŭ pamiać pra paeta, mastaka, fatohrafa, kulturołaha, zasnavali premiju jahonaha imia. Joju vyrašyli adznačać najlepšuju vokładku biełaruskaj knihi. Inicyjatyva naležyć Biełaruskamu PEN-centra sumiesna ź Biełaruskim sajuzam dyzajnieraŭ i «Latučym univiersitetam», a taksama polskim partnioram TAA «H&L» i fondam «Adkrytaja kultura».

Paśla śmierci Michała Aniempadystava biełarusy tałakoj pieravydali «Koler Biełarusi».

• 9
• 0
• 1
• 0
• 1
• 6
• 1
• 0