«Apošnim časam dziaŭčaty, jakija traplali ŭ ŠIZA, kazali, što nie čuvać tam hołasu Kaleśnikavaj» — byłaja źniavolenaja
Alesia vyzvaliłasia z Homielskaj žanočaj kałonii zusim niadaŭna. Na ŭmovach ananimnaści žančyna pahadziłasia raskazać Radyjo Svaboda, što tam ciapier adbyvajecca.
Homielskaja kałonija. Fota: Radyjo Svaboda
Alesia prosić nie nazyvać jaje sapraŭdnaha imia i proźvišča. Žančyna vyzvaliłasia z Homielskaj žanočaj kalonii minułaj zimoj. Niahledziačy na całkam adbytaje pakarańnie, jana pa-raniejšamu turbujecca za ŭłasnuju biaśpieku, a taksama za svaich rodnych. Za kraty Alesia trapiła ŭ 2022-m za aktyŭnaść u sacsietkach.
Pakarańnie mahło być značna bolš suvorym. Surazmoŭca ličyć, što joj pašancavała. Jana paćviardžaje infarmacyju krynic Svabody pra niaprosty stan Maryi Kaleśnikavaj.
Surazmoŭca dadaje, što paśla skančeńnia terminu ŭtrymańnia ŭ pamiaškańni kamernaha typu (heta 6 miesiacaŭ) na Maryju Kaleśnikavu składajuć novyja raparty za «parušeńni režymu» i znoŭ karajuć PKT.
«PKT i ŠYZA znachodziacca ŭ adnym pamiaškańni, ich kamery pobač. Uzajemadziejničać tam nielha. Ale raniej, kali dziaŭčaty traplali ŭ ŠYZA, to jany čuli hołas Kaleśnikavaj. Jana ci adkazvała na pytańni kanvojnych, ci vitałasia ź imi, kazała im «Dobraha ranku, dobry dzień» ci śpiavała niešta. Apošnim časam usie dziaŭčaty, jakija traplali ŭ ŠYZA, kazali, što nie čuvać tam hołasu Maryi. Ci jana stamiłasia, ci zamknułasia… Hetaha my nia viedajem», — tłumačyć surazmoŭca.
Jana dadaje, što, niahledziačy na ŭvieś nehatyŭny dośvied źniavoleńnia, maje pazytyŭnyja ŭražańni ad vialikaj kolkaści cudoŭnych ludziej, ź jakimi paznajomiłasia ŭ kalonii. Alesia zhadvaje znajomstva z Irynaj Leŭšynaj (eks-dyrektarka infarmacyjnaj kampanii BiełaPAN), pravaabaroncaj Marfaj Rabkovaj, žurnalistkami Kaciarynaj Andrejevaj (Bachvałavaj) i Irynaj Słaŭnikavaj. Pa słovach surazmoŭcy, nichto ź ich nie źniavieryŭsia i trymajecca za kratami hodna.
Pres-atrad dla 75-hadovaj «palityčnaj»
Pa słovach surazmoŭcy, u kalonii jana paznajomiłasia z 75-hadovaj palitźniavolenaj Natallaj Taran z Babrujsku. Pensijanerku asudzili za «abrazu» Łukašenki i «paklop» na jaho na 3,5 hoda kalonii.
«Nakolki ja viedaju, jana staviła «padabajki» ŭ sacyjalnych sietkach pad roznymi dopisami. Voś tak na jaje «paviesili» niekalki artykułaŭ. Joj vielmi ciažka ŭ kalonii. Natalla Viačasłavaŭna maje dyjabet, jana insulinazaležnaja, dyj zdaroŭje ŭžo nia toje, zrazumieła», — uspaminaje surazmoŭca.
Alesia kaža, što paśla taho, jak Natallu Taran pieraviali ŭ kaloniju, jaje źmiaścili ŭ tak zvany «pres-atrad». Jon adroźnivajecca ad inšych horšymi ŭmovami ŭtrymańnia «palityčnych» i ździekami ź ich kryminalnikaŭ. Pa słovach Alesi, tam Natalli było vielmi ciažka, žančyna časta płakała. Razam z tym, śćviardžaje surazmoŭca, kali na inšych palityčnych administracyja kalonii ciśnie, kab pisali «pamiłavańnie», to ad Natalli Taran nie chacieli brać takoj zajavy.
«Jany, administracyja, doŭha ciahnuli z pryjomam «pamiłavańnia» ad jaje. To načalnik atradu nia moh napisać charaktarystyku, to toje, to druhoje, i tak hod. U vypadku z Natallaj nichto b i słova nie skazaŭ, nie asudziŭ by jaje — usie viedali, u jakim ciažkim jana stanie. Ale čamu administracyja nie chacieła adpraŭlać ad jaje imia prośby ab pamiłavańni, nia viedaju», — kaža Alesia.
Jana taksama narakaje na samaŭpraŭstva z boku administracyi kalonii. Pa słovach Alesi, asudžanyja, asabliva palityčnyja, časam nia majuć mahčymaści napisać skarhu i vysłać jaje z kalonii.
«Časam skarhi, praŭda, vychodzili. Ale nikudy nie dachodzili», — dadała byłaja źniavolenaja.
Pakajańnie paśla siužetu na BT
Surazmoŭca raskazvaje, što ŭ kalonii pakazvali «interviju» dziaržaŭnaj televizii z palitźniavolenaj Palinaj Šarendaj-Panasiuk. Pa słovach Alesi, načalnik aperatyŭnaha adździełu Mikita Alochin asabista chadziŭ i praviaraŭ, kab usie źniavolenyja jaho pahladzieli.
«Niadaŭna ŭ pamiaškańni dla vychavaŭčaj raboty ŭstalavali jašče i kamery nazirańnia, tak što «kino» z Palinaj musili hladzieć usie», — kaža Alesia.
Jana dadaje, što «pryznańni» Paliny dla inšych palitźniavolenych žančyn z homielskaj kalonii vyhladali dziŭna.
«Palina ŭvieś čas mužna trymałasia, atrymlivała i ŠYZA, i PKT, i dadatkovy termin. Tut da vyzvaleńnia ŭ traŭni zastavałasia joj niašmat, i takoje «kino». Jaŭna niešta nia tak. Moža, joj pahražali novym terminam, kryminalnymi «karuselami». My ŭ kožnym vypadku nie asudžali jaje, spačuvali. Ale byli i takija reakcyi, jak ad adnoj zečki. Jana niešta tam niedačuła ŭ «kino» ci niedabačyła i pačała aburacca na Palinu: «Zdradnica, Bieraście chacieła addać!». Tak u jaje niešta ŭsio pierakruciłasia ŭ hałavie dziŭnym čynam», — pryhadvaje Alesia.
Surazmoŭca dadaje, što načalnik aperatyŭnaj častki Mikita Alochin potym źviarnuŭsia da palityčnych: «Voś vy pahladzieli, to biarycie prykład, kajciesia, vy ŭsie pavinny raskajacca!». Alesia kaža, što Alochin «strašny i ślizki čałaviek», jon zapałochvaje źniavolenych, manipuluje, namahajecca ich złamać psychalahična.
«Jamu prosta padabajecca łamać ludziej», — pierakananaja byłaja źniavolenaja.
Cenzura pierapiski i emocyj «palityčnych»
Pa słovach surazmoŭcy, u Homielskaj žanočaj kalonii, u adroźnieńnie ad SIZA, žorstkaja cenzura na pierapisku. Pa-pieršaje, pisać možna tolki blizkim, pa-druhoje, napisanaje pilna praviarajuć.
«Pa sutnaści, pisać možna tolki neŭtralnaje: «Soniejka śviecić, u mianie ŭsio dobra». Listy z važnaj infarmacyjaj nie dachodziać ani ŭ toj bok, ani ŭ hety. Naprykład, ja pytałasia infarmacyju pra svajho advakata, ale taki list nie prajšoŭ», — kaža byłaja źniavolenaja.
Alesia raskazvaje, što pad kantrolem u žanočaj kalonii i emocyi asudžanych palityčnych. Im nielha aburacca, dapamahać inšym, dzialicca chacia b cukierkaj ci piečyvam. Usio heta ličycca parušeńniem, choć na tyja samyja dziejańni z boku asudžanych pavodle niepalityčnych kryminalnych artykułaŭ administracyja asabliva nie źviartaje ŭvahi.
«Nam zabaroniena ŭsio. Naprykład, pakul my na pracy, supracoŭniki administracyi mohuć uvarvacca ŭ «kapciorku» i pravieści «šmon». Jany raskidajuć tvaje rečy, sapsujuć, pałomiać ich, kinuć na padłohu pradukty, patopčucca, ale ty musiš maŭčać. Aburacca, vykazać niešta ty nia možaš — atrymaješ rapart», — kaža Alesia.
Jana zaznačaje, što asabliva ciažka było ŭvieś čas dušyć usie emocyi ŭ sabie, nie prajaŭlać ich, bo za heta budzie pakarańnie.
«Raz na niekalki miesiacaŭ heta ŭsio praryvałasia biespryčynnymi ślaźmi, u mnohich tak było. Ciapier ja viedaju, što mnie jašče treba budzie doŭha pracavać z psycholaham. Ja adčuvaju, što ja trochi złamany čałaviek», — dadała Alesia.
Surazmoŭca zhadvaje słovy Hajnrycha Biola: «Kali chočaš daviedacca pra krainu — pasiadzi ŭ jaje turmie».
«Ja pahladzieła. Toje, što ŭbačyła, mnie nie spadabałasia», — zaznačyła byłaja źniavolenaja.
24 krasavika byŭ dzień narodzinaŭ Maryi Kaleśnikavaj. Čaćviertyja narodziny, što sustrakaje mužnaja žančyna za kratami
Historyja škłoŭskaj kałonii, za try kiłamietry ad jakoj niekali žyŭ Łukašenka
Jak elitnaja kałonija dla byłych čynoŭnikaŭ i siłavikoŭ pieratvarajecca ŭ palityčnuju turmu. Historyja «Vićby-3»
Svaja krama, paśpiachovaja vytvorčaść, čytańnie knih praź videasuviaź. Što viadoma pra kałoniju, dzie siadzić Źmicier Daškievič
Samaja brudnaja i samaja žorstkaja. Što viadoma pra kałoniju, dzie trymajuć Alaksandrava, Babaryku, Kuźniečyka, Łosika, Pačobuta
Kamientary
Kaleśnikavu i inšych fsbešnych ahientaŭ ŭtrymlivajuć asobna ŭ lepšych ŭmovach z dobrym charčavaniem i lepšym režymam.
Tamu ich i nie čujuć inšyja viaźni.