Kinastudyi ŭsio čaściej zdymajuć trochhadzinnyja filmy. Čamu?

Režysior Andrej Kašpierski razvažaje, što vydzielić hałoŭnuju pryčynu papularnaści doŭhich filmaŭ składana. Adna ź ich u tym, što za režysiory zdymajuć daŭžeznaje kino — bo takoje dazvolać zusim nie kožnamu.

«Jość peŭnaja ŭłada ŭ režysioraŭ-hihantaŭ. Kali Nołan, Skarseze, Kviencin Tarancina zdymajuć kino na try hadziny, nichto na studyi nie ryzyknie ŭziać mantažnyja nažnicy. Im dajuć poŭny kart-błanš, bo ich imiony prynosiać miljony dalaraŭ prybytku i «Oskary».

Ja b padrezaŭ i Skarseze, i moža navat Nołana», — kaža Kašpierski.

Nakolki ž doŭhija filmy ŭ tych režysioraŭ? Naprykład, Marcin Skarseze pradstaviŭ u 2023‑m film «Zabojcy kvietkavaha Miesiaca», jaki išoŭ 3 hadziny 26 chvilin. U tym ža hodzie vyjšaŭ znakamity «Apienhiejmier» Krystafiera Nołana z praciahłaściu try hadziny.

Dla paraŭnańnia — kultavy «Terminatar» 1984 hoda doŭžyŭsia 107 chvilin, a «Ludzi ŭ čornym» 1997 hoda majuć praciahłaść 98 chvilin. Navat hrandyjoznaja «2001: Kaśmičnaja adysieja», jakuju vypuściŭ Kubryk u 1968-m, doŭžycca 2 hadziny 29 chvilin.

Možna zhadać «Tytanik» 1997 hoda: maŭlaŭ, toj šedeŭr doŭžycca 3 hadziny 14 chvilin. Ale heta vyklučeńnie, jakoje paćviardžaje praviła, i viadoma, što kinastudyja vielmi nie chacieła vypuskać u prakat film z takoj šakujučaj daŭžynioj.

Kašpierski adznačaje, što kinastudyi ciapier pa-inšamu padychodziać da prodažu filmaŭ aŭdytoryi — jany prapanujuć nam pachod u kinateatr jak padzieju.

«Kvitki i papkorn daražejuć, doma ŭ kožnaha jość televizar i dostup da stryminhaŭ. Kab vyciahnuć čałavieka ŭ kinateatr, studyi i režysiory robiać vyhlad, što pradajuć hledaču niešta manumientalnaje i vielmi važnaje, jak u vypadku z «Avataram» ci «Adysiejaj» Nołana.

Doŭhi film padśviadoma apraŭdvaje ŭ hałavie hledača košt taho pachodu — maŭlaŭ, za try hadziny i hrošaj nie škada», — tłumačyć režysior.

Taksama Andrej bačyć techničnuju pryčynu ŭ pierachodzie da doŭhich filmaŭ. Raniej kino zdymali na plonku, jaje kolkaść była abmiežavanaja, a ceny vialikija, tym bolš u vypadkach ź niekatorymi vidami plonki. Filmy raspaŭsiudžvali na videakasietach ci DVD-dyskach, a tam prosta nie chapała miesca na kino ŭ adnosna vysokaj jakaści, daŭžejšaje za dźvie hadziny.

Ciapier kino zdymajuć i zachoŭvajuć u ličbavym farmacie, a terabajty pamiaci kaštujuć kapiejki ŭ paraŭnańni ź plonkaj. 

Źmianilisia i sami kinateatry:

«Raniej karotkija filmy možna było pakazać bolš razoŭ i, adpaviedna, bolš zarabić, tamu praciahłaść była važnaja. A ciapier kinateatry šmatzalnyja, tamu možna puścić trochhadzinny błakbastar adnačasova ŭ troch‑čatyroch załach u rozny čas, i nie budzie nijakich strat».

Andrej nahadvaje, što i sieryjały pryvučyli hledača da doŭhich farmataŭ. Niechta lubić hladzieć adrazu pa niekalki sieryj, a ŭ niekatorych prajektach i adna sieryja moža być jak ceły film. Tak atrymałasia, naprykład, ź finałam sieryjała «Vielmi dziŭnyja spravy» — apošniaja sieryja prajekta doŭžyłasia 128 chvilin.

Sam Kašpierski i jak režysior, i jak hladač vystupaje za karaciejšyja filmy — varta ž canić svoj čas. Jon kamientuje niadaŭniuju stužku Styviena Śpiłbierha «Dzień vykryćcia»:

«Hladziš na heta i dumaješ, što ŭžo składana ŭsprymać — maŭlaŭ, navošta vy, chłopcy, tak razduvajecie film? I pry hetym ja prosta kajfuju ad taho, što robić Aki Kaŭryśmiaki ci Kanten Dziupjo. Hetyja režysiory mohuć ukłaścisia ŭ 60‑70 chvilin i skazać usio, što treba».

Andrej zhadvaje dźvie dobryja stužki apošnich miesiacaŭ, dzie niama havorki pra vialiki chranamietraž. Naprykład, heta film Alivii Uajld «Zaprašeńnie», jon prosta ciapier idzie ŭ kinateatrach, i jaho daŭžynia — 107 chvilin. Ci inšy chit, «Voś heta drama!» z Robiertam Pacinsanam i Ziendejaj, što doŭžycca 105 chvilin. Papularnyja ciapier chorary «Absesija» i «Zakuliśsie» taksama zaŭvažna karaciejšyja za try hadziny.

• 3
• 0
• 2
• 2
• 1
• 0
• 0
• 0