Uładalnik aršanskaj kaviarni trapiŭ u strašnuju avaryju z łasiom — tydzień lažaŭ u reanimacyi i ničoha nie pamiataŭ pra toje
U pačatku červienia aršaniec Anton Maisiejeŭ z žonkaj vypadkova źbili łasia. Mašyna raźbitaja ŭščent, ale pasažyry ščaślivyja, što ŭvohule zastalisia žyvyja.
Avaryja zdaryłasia 5 červienia ŭ 23 hadziny ŭ Krupskim rajonie na trasie Brest — Minsk — miaža RF. Ź lesu raptoŭna vybieh łoś, i Maisiejeŭ z žonkaj vypadkova źbili jaho na svaim «Opieli». I Antona, i jaho žonku advieźli ź miesca avaryi ŭ balnicu.
Ciapier Maisiejeŭ trochi raskazaŭ pra avaryju ŭ Threads:
«Paśla taho, što zdaryłasia, prajšoŭ tydzień. Ja tady lažaŭ u reanimacyjnym adździaleńni i daviedaŭsia pra toje, što zdaryłasia, z raskazu blizkaha čałavieka, jaki da mianie pryjšoŭ.
Mnie raskazali, paśla jakich padziej ja tut lažu i čamu. Bo ja nie pamiataju ni łasia, ni toje, adkul jon vyjšaŭ — ničoha pra momant avaryi. Jak kažuć miedyki, ja adrazu straciŭ prytomnaść».
U pačatku lipienia Antonu pryvieźli na evakuatary jaho «Opiel» — dakładniej, toje, što zastałosia ad mašyny. Mužčyna piša, što pryblizny košt adnaŭleńnia składaje nie mienš za 13 tysiač rubloŭ. Nabyć padobnuju novuju mašynu budzie nie našmat daražej, tamu Anton pakul jašče nie vyrašyŭ, ci budzie adnaŭlać «Opiel». Zbory na mašynu jon užo adkryŭ i dziakuje ŭsim, chto pryjšoŭ na dapamohu.
Anton — uładalnik aršanskaj kaviarni Smile Coffee. U kamientarach užo prapanavali padtrymać jaho miesca. Akramia biznesu, mužčyna ŭdzielničaje ŭ zabiehach, spabornictvach pa tryjatłonie i turnirach pa dziudo siarod vieteranaŭ.
Anton i jaho žonka ŭdziačnyja za toje, što ŭvohule zastalisia žyvyja. Štraf za najezd na łasia, darečy, im nie dali. Za 10 km da miesca avaryi Anton prajechaŭ darožny znak «Dzikija žyvioły», ale na im była adznaka ŭ 5,5 km, tak što na miescy, dzie zdaryłasia avaryja, znak užo nie dziejničaŭ.
Što da strachoŭki, Anton afarmlaŭ u «Biełdziaržstrach» sajuznuju strachoŭku, kab možna było jeździć pa rasijskich i biełaruskich darohach. Jamu ŭžo skazali, što strachoŭka nie pakryje škodu mašynie, ale mohuć kampiensavać apłatu lačeńnia.
«Naša Niva» — bastyjon biełaruščyny
PADTRYMAĆ«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary