Deputatka pra źbityja nad Biełaruśsiu drony: Ukraina bjecca ŭ kanvulsijach i ahonii
10 žniŭnia Alaksandr Łukašenka zajaviŭ pra toje, što nad terytoryjaj Biełarusi byli źbityja niekalki pavietranych celaŭ, jakija, jak śćviardžajecca, lacieli z boku Ukrainy. Ciapier hetuju temu pačała aktyŭna akučvać prapahanda.
Na sajcie haziety Administracyi Łukašenki «SB. Biełaruś siehodnia» vyjšaŭ kamientar namieśnicy staršyni Pastajannaj kamisii Pałaty pradstaŭnikoŭ pa pravach čałavieka, nacyjanalnych adnosinach i srodkach masavaj infarmacyi Iryny Daŭhała. Žančynie chapiła ličanych hadzin, kab biez anijakich rasśledavańniaŭ i jašče da źjaŭleńnia vizualnych dokazaŭ adšukać vinavatych. Nu, i viadoma, ščodra absłužyć Łukašenku.
Dla Daŭhała «całkam vidavočna», što parušeńnie miežaŭ pavietranaj prastory Biełarusi bieśpiłotnikami (deputatka ŭpeŭnienaja, što heta ŭkrainskija BPŁA) — heta praciah, kali nie skazać paharšeńnie, padziej apošnich dzion u Kurskaj vobłaści.
«Nie treba być prafiesijnym vajskoŭcam, kab nie bačyć toje, što ŭkrainskija siłavyja struktury nie pakidajuć sprob u čarhovy raz pravieści blickryh. Bolš baluča ad taho, što hinuć prostyja mirnyja žychary, u ich na vačach harać ich damy, ludzi zastajucca biez prytułku, adnak jany nie pakidajuć nadziei na bolš chutkaje zaviaršeńnie vajennych dziejańniaŭ i viartańnie ŭ svaje damy», — piša Daŭhała. Losy ŭkrainskich mirnych žycharoŭ jaje chvalujuć nie nadta.
Pa słovach deputatki, u jaje stvarajecca ŭražańnie, što Ukraina bjecca ŭ kanvulsijach, u ahonii, vykarystoŭvajučy ŭsie mahčymaści, jakija im ščodra razdajuć kalektyŭny Zachad i ES. Adbyvajecca heta kab maksimalna nanieści škodu Rasii i jaje sajuźnikam.
«Pry hetym jany zabylisia pra dva vielmi važnyja momanty. Pieršaje: pry parušeńni miež pavietranaj prastory Biełarusi, dy i nie tolki pavietranaj, paśleduje reakcyja ŭ adkaz, ab hetym nieadnarazova adkryta i jasna papiaredžvaŭ naš kiraŭnik dziaržavy, i druhoje — jany vidavočna nie pamiatajuć historyju. Bo ŭ hady Vialikaj Ajčynnaj vajny mienavita na Kurskaj duzie faktyčna zaviaršyłasia najbujnaja ŭ suśvietnaj historyi tankavaja bitva, jakaja prosta pachavała ŭpeŭnienaść i nadzieju nacysckaj Hiermanii na pieramohu ŭ Druhoj suśvietnaj vajnie i zabiaśpiečyła pieramohu Čyrvonaj armii», — źviazvaje roznyja histaryčnyja epochi Iryna Daŭhała.
U kancy svajho kamientara deputatka rassypałasia ŭ kamplimientach pierad Łukašenkam i zhadała jaho zaklik sieści za stoł pieramovaŭ.
«Niachaj nichto nie sumniavajecca, naš lidar zaŭsiody trymaje ruku na pulsie, ale adkaz budzie, jak kažuć, «mała nie pakažacca». A patrabavańnie dla ŭsich biełarusaŭ adno — «nam treba tut, na ziamli pracavać, jak raniej havaryli, nie pakładajučy ruk, i davać adpaviednyja vyniki».
Ciapier čytajuć
Poŭny śpis palitviaźniaŭ, vyzvalenych 13 śniežnia7
Kamientary