Aryštavali ŭ Polščy i departavali ŭ Kijeŭ ukrainskaha palitołaha, pastajannaha ŭdzielnika rasijskich prapahandysckich šou
Palityčny ekśpiert z puła aliharcha Miadźviadčuka nakiroŭvaŭsia z Rasii ŭ Hiermaniju, kab atrymać premiju ad deputataŭ Bundestaha.
Pra zatrymańnie palitołaha Kiryła Małčanava stała viadoma 31 sakavika. Pieršym pra heta ŭ svaim telehram-kanale paviedamiŭ były premjer-ministr Ukrainy Mikałaj Azaraŭ. Jon ža napisaŭ, što palitołah «zajmaŭsia sistemnym infarmavańniem jeŭraparłamientaryjaŭ i deputataŭ Bundestaha», a tyja «ŭ znak udziačnaści zaprasili jaho ŭ Bierlin dla ŭručeńnia premii i hranta.
Pavodle infarmacyi ź inšych krynic, palitołah palacieŭ u Bierlin tranzitam praz Turcyju i Polšču. U vyniku, jak paviedamlaje aficyjny kanał Słužby biaśpieki Ukrainy, u miežach sumiesnaj apieracyi z Słužbaj źniešniaj raźviedki i pravaachoŭnymi orhanami Polščy, jon byŭ zatrymany.
SBU adznačaje, što heta pieršaja z pačatku paŭnamaštabnaha ŭvarvańnia pieradača rasijskaha ahienta, jaki dziejničaŭ suprać Ukrainy ŭ infarmacyjnaj śfiery.
«Zaraz jon znachodzicca ŭ adnym z kijeŭskich SIZA. Fihurantam spravy źjaŭlajecca «palityčny ekśpiert» ź miedyjnaha puła padazravanaha ŭ dziaržaŭnaj zdradzie Viktara Miadźviedčuka. Pavodle materyjałaŭ spravy, złamyśnik byŭ zavierbavany i pracavaŭ adnačasova na dźvie śpiecsłužby krainy-ahresara: FSB i źniešniuju raźviedku Rasiju», — paviedamlaje SBU.
Jak viadoma, Kirył Małčanaŭ u 2022 hodzie vyjechaŭ u Rasiju. Tam jon staŭ adnym z klučavych ideołahaŭ kramloŭskich prapahandysckich prajektaŭ «Darahaja Ukraina» i «Hołas Jeŭropy», častym hościem tok-šou Sałaŭjova.
SBU nazyvaje Małčanava arhanizataram vuličnych akcyj na terytoryi ES z zaklikami da zhortvańnia mižnarodnaj padtrymki Ukrainy. Palitołaha taksama abvinavačvajuć u publičnych zaklikach da padrychtoŭki zakaznych teraktaŭ va Ukrainie.
Na padstavie sabranych dokazaŭ śledčyja SBU paviedamili Małčanavu ab padazreńni ŭ ździajśnieńni złačynstvaŭ, źviazanych z apraŭdańniem, pryznańniem pravamiernaj, admaŭleńniem uzbrojenaj ahresii Rasii suprać Ukrainy, hieraizacyjaj jaje ŭdzielnikaŭ i kałabaracyjanisckaj dziejnaściu (častka 3 artykuła 436-2 i častka 6 artykuła 111-1 Kryminalnaha kodeksa Ukrainy). Jamu pahražaje da 12 hadoŭ turmy.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj31
Kamientary