Były kamandujučy suchaputnymi vojskami i namieśnik ministra abarony Polščy hienierał Skšypčak raskazaŭ, što jaho ździviła ŭ vajnie Rasii suprać Ukrainy, zaklikaŭ vučycca ŭ ukrainskich vajskoŭcaŭ i praanalizavaŭ varyjanty harantyi biaśpieki dla Ukrainy.
Zahadki i niečakanaści vajny
Analizujučy try hady vajennych dziejańniaŭ, hienierał Valdemar Skrypčak zaŭvažaje, što jaho ździvili značnyja pośpiechi rasijan na paŭdniovym kirunku na pieršym etapie vajny.
«Rasijanie dajšli praz Chiersonščynu až da Mikałajeva. I heta, na moj pohlad, zahadka hetaj vajny — pieršaja zahadka, ale nie apošniaja. Jak im udałosia pierapravicca praz Dniapro, jaki byŭ vydatnym vodnym barjeram, i dajści da Mikałajeva?»
Druhoj zahadkaj dla hienierała źjaŭlajecca chutki adychod rasijskich vojsk z akupavanaha Chiersona na levy bierah Dniapra ŭ listapadzie 2022 hoda.
«Raptam, za adnu noč, kala 20 tysiač rasijskich sałdat pierajšli z zachodniaha bieraha na ŭschodni, biez bajoŭ. Nahadaju, što bai za hety płacdarm išli doŭha, kaštavali Ukrainie vialikich namahańniaŭ, kab vyšturchnuć rasijskija vojski, i dla ŭsich było niečakanaściu, što za adnu noč ukraincy zmahli dajści da Dniapra. Ja zadaŭ sabie pytańnie: što adbyłosia z tymi 20 tysiačami rasijskich sałdat, jakija abaraniali hety płacdarm? Heta zastajecca zahadkaj dla mianie», — havoryć hienierał.
Skrypčak zaŭvažaje, što isnuje mierkavańnie, što, mahčyma, amierykancy pierakanali ŭkraincaŭ dać rasijanam mahčymaść adstupić, kab źmiakčyć varožaść pamiž krainami, ale jon u heta nie vieryć. Pavinna było adbycca niešta, što vychodzić za miežy bajavych dziejańniaŭ, mahčyma, niejkija damoŭlenaści na vyšejšym uzroŭni, kab stvaryć umovy dla biaśpiečnaha adstupleńnia rasijskich vojsk.
«Aficyjna havaryli, što rasijanie bajalisia akružeńnia i tamu pravodzili evakuacyju, ale jak možna było dazvolić rasijskim vojskam biaśpiečna pierapravicca praz takuju raku?
Nasamreč zadača vojsk, jakija pavinny likvidavać płacdarm, zaklučajecca ŭ tym, kab nie dać vorahu mahčymaści biaśpiečna adstupić. I ŭ hetym vypadku jany mahli b utapić rasijskija vojski ŭ Dniapry, ale hetaha nie adbyłosia. Rasijanie paśpiachova adstupili, i hetyja 20 tysiač sałdat zatym byli pierakinuty na Zaparožža», — vykazvaje svoj pohlad hienierał.
Ździŭlaje polskaha hienierała taksama kontrnastupleńnie ŭkrainskich vojsk u 2023 hodzie. Skrypčak źviartaje ŭvahu, što ŭ čas padrychtoŭki apieracyi prezident Zialenski zajaŭlaŭ, što kontrnastupleńnie budzie nakiravana ŭ Zaparožža, z metaj prarvać suchaputny kalidor, jaki źviazvaje Rasiju z Krymam uzdoŭž uźbiarežža Azoŭskaha mora. Rasijanie, pačuŭšy pra heta, adrazu ŭmacavali svaje abarončyja pazicyi na hłybiniu 25—30 kiłamietraŭ i raźmiaścili tam mocnyja vojski, u tym liku tyja, jakija byli vyviedzieny z Chiersonskaha płacdarma.
«Ja byŭ pierakanany, što heta była apieracyja pa ŭviadzieńni ŭ zman, ale ŭkraincy, naadvarot, pačali nastup mienavita tam, dzie, na maju dumku, atakavać było vielmi ryzykoŭna z-za vysokaj stupieni padrychtoŭki abarony praciŭnika. Heta byŭ, pa sutnaści, pačatak vialikich prablem dla ŭkrainskaha vojska», — davodzić hienierał.
Spałučeńnie staroha i novaha na poli boju
Analizujučy vajennyja dziejańni, Skrypčak adznačaje, što ŭsie čakali, što vajennyja kanflikty XXI stahodździ buduć bolš aŭtamatyzavanymi, zasnavanymi na novych technałohijach, ź mienšym niepasrednym kantaktam sałdat. Ale tut my bačym kanflikt, jakoha, musić, nie čakali ŭbačyć u Jeŭropie.
«Usie my byli ździŭlenyja, tamu što nas rychtavali da sučasnych vojnaŭ, da sučasnych dziejańniaŭ, a akazałasia, što jany majuć šmat supolnaha z vojnami, jakija majuć karani jašče ź Pieršaj ci Druhoj suśvietnaj vajny. (…) Akazałasia, što kłasičnaja artyleryja z takim vializnym raschodam bojeprypasaŭ stała adnym z najvažniejšych elemientaŭ, ad jakoha zaležyć pośpiech na poli boju. (…) Takim čynam, «boh vajny» viarnuŭsia i praciahvaŭ vykonvać svaju misiju na poli boju», —
zaŭvažaje hienierał pry hetym nie admaŭlajučy taho faktu, što ŭ chodzie hetaha vajennaha kanfliktu adbyłasia sapraŭdnaja «revalucyja dronaŭ», jakija stali instrumientam na stratehičnym, apieracyjnym i taktyčnym uzroŭniach.
«Heta sapraŭdnaja revalucyja na poli boju, i drony, padobna, buduć daminavać u pavietranaj prastory nad polem boju jašče šmat hadoŭ», — adznačaje Skrypčak.
«Ja nie bajusia rasijskaj armii»
Adkazvajučy na pytańnie pierśpiektyŭ vajny Rasii suprać krain NATA, były namieśnik ministra abarony Polščy adkazaŭ: «Ja asabista nie bajusia rasijskaj armii» i patłumačyŭ: «Kali ŭkrainskaje vojska, choć i mienšaje, moža supraciŭlacca vializnamu rasijskamu vojsku, navat paśla tych źmienaŭ, jakija adbylisia ŭ apošnija try hady, to, pa vialikim rachunku, my, jak Jeŭropa, možam śćviardžać, što praz dva-try hady dasiahniom takoha vajskovaha patencyjału, što Rasija nie zmoža nam pahražać.
My staniem dla Rasii vielmi niebiaśpiečnymi, tamu što, pa-pieršaje, budziem mieć vajenny patencyjał, supastaŭny, a mahčyma, i macniejšy za rasijski, a pa-druhoje, budziem mieć sajuźnika ŭ asobie ŭkrainskaha vojska. (…) My nie možam dazvolić, kab vojska Ukrainy było skaročanaje pa inicyjatyvie Pucina, tamu što heta budzie katastrofaj i dla Ukrainy, i dla nas».
Jak śćviardžaje Skrypčak, Ukraina nie abaviazkova pavinna być u NATA, ale jana pavinna być sajuźnikam aljansu:
«Tut nie taki važny ściah NATA nad Ukrainaj, jak važny fakt, što my budziem harantam, jaki vyznačaje Ukrainu jak našaha sajuźnika. (…)
Vidavočna, što ŭkrainskaja armija niepieramožnaja. Jana vydatna spraŭlajecca z rasijanami, jakija nie majuć sposabu jaje pieramahčy. Heta dla nas prykład dla pierajmańnia».
Hienierał Skrypčak prapanuje stvaryć niekalki ŭkrainskich rot u Polščy z sałdat, jakija znachodziacca tam na adnaŭleńni.
«Jany pavinny treniravacca z našymi sałdatami, stojačy plačom da plača na palihonach, u akopach, na bajavych mašynach, pieradajučy nam svoj dośvied. Ale hetaha niama, i ja nie viedaju, čamu. Vidać, u Polščy brakuje kamandziraŭ, jakija razumiejuć, što takoje pole boju», — davodzić Skrypčak.
Jak Jeŭropa moža harantavać biaśpieku Ukrainy
Były namieśnik ministra abarony Polščy zaŭvažaje, što nie bačyć šancaŭ na toje, kab vojski NATA ŭsprymalisia jak miratvorcy va Ukrainie z abodvuch bakoŭ. Rasija ŭžo zajaviła, što nie pahadzicca na heta. Adnak mohuć być miratvorcy z trecich krain.
Hienierał vykazvaje sumnieŭ u mahčymaści miru pamiž Rasijaj i Ukrainaj, ale prapanuje niekalki varyjantaŭ rašeńnia kanfliktu.
Pieršy — heta rezalucyja AAN ź miratvorčymi siłami, jakija buduć niejtralnymi dla abodvuch bakoŭ. Druhi — pryciahnieńnie hłabalnaha arbitra, naprykład, Trampa, jaki arhanizuje spynieńnie ahniu i damovicca ab raźmiaščeńni miratvorcaŭ. Treci, samy składany varyjant, zaklučajecca ŭ vykarystańni vajennaha patencyjału NATA dla raźmiaščeńnia sił va Ukrainie dla jaje padtrymki pry ŭmovie spynieńnia ahniu, nie zvažajučy na pratesty Pucina.
U kancy razmovy Skrypčak adznačyŭ, što ličyć zaŭčasnym abmiarkoŭvać adpraŭku vojsk NATA va Ukrainu i zaklikaŭ zasiarodzicca na padtrymcy Ukrainy, kab jana mahła efiektyŭna abaraniacca i zachavać svaju niezaležnaść, što važna dla biaśpieki Polščy.
Kamientary
palicyi kałasalny niedabor. Ludzi dobra žyvuć i nie chočuć pryśviačać žyćcio sałdafonščynie. Jašče raju uspomnić płan abarony Polščy ad hienieralnaha štaba, jaki nie tak daŭno vyklikaŭ skandał u ŚMI: pavodle płana, polskaja abarona nie zmoža vytrymać pieršasnuju ataku rasiei i budzie adstupać až da zachodniaha bieraha Visły, na "bolš vyhodnyja i abstalavanyja pazicyi".