Biełarusy ŭ panicy šturmujuć polskija dziaržaŭnyja słužby — tam bolš nie prymajuć dakumienty na savieckich błankach
«Praviali va ŭžondzie ceły dzień», «Siońnia było pałomnictva biełarusaŭ va Urocłaŭ, bo tam pakul nie patrabavali apastylaŭ», «Poŭnaja dupa, čarhovyja pałki ŭ koły», «My pryjšli va ŭžond zranku, a tam užo nie było navat tałonaŭ», — aburajucca biełarusy nastupstvam novaj polskaj pastanovy, zhodna ź jakoj dakumienty na błankach SSSR i BSSR pieratvarajucca ŭ harbuz.
Ministerstva ŭnutranych spraŭ i administravańnia Polščy vypuściła pastanovu, zhodna ź jakoj dakumienty biełarusaŭ na błankach BSSR ci SSSR bolš nie prymajuć u miascovych administracyjach. Najpierš heta paśviedčańni ab naradžeńni i šlubie, jakija zvyčajna treba pakazać pry atrymańni hramadzianstva ci afarmleńni šlubu (zrabić miascovuju rehistracyju — umiejscowienie —dakumientaŭ). Ciapier pačali patrabavać ich dublikaty na novych błankach ź biełaruskich ZAHSaŭ razam z apastylami MZS Biełarusi. Ale mnohija biełarusy nie mohuć viarnucca na radzimu, kab aśviažyć staryja dakumienty — značyć, jany nie zmohuć lehalizavacca ŭ Polščy?
«Naša Niva» raźbirałasia ŭ pytańni.
Miascovaja rehistracyja (umiejscowienie) praduhledžvaje praceduru zdačy zamiežnych paśviedčańniaŭ ab naradžeńni ci šlubie ŭ polskija administracyi, kab ich dadali ŭ miascovuju sistemu hramadzianskaha stanu. Zamiežniku ŭzamien vydajuć dakumient polskaha ŭzoru. Pierad padačaj dakumientaŭ treba zrabić ich nataryjalny pierakład na polskuju movu.
Zrabić heta možna ŭ luby čas, ale najbolš aktualnaja miascovaja rehistracyja pry padačy na hramadzianstva (u Pamorskim vajavodstvie rehistracyju patrabujuć užo pry padačy na kartu stałaha pobytu ci pry ŭźjadnańni siamji). Pry hetym u niekatorych užondach (miascovych administracyjach) mohuć paprasić nie tolki vaša paśviedčańnie ab naradžeńni, ale i maci. Zhodna z novaj pastanovaj, jano taksama musić być na novym błanku, a nie savieckim. Apošnija ž, viadoma, amal va ŭsich baćkoŭ, a taksama ŭ niekatorych biełarusaŭ, narodžanych u pieršyja hady paśla raspadu SSSR — u 1991-1995.
Biełarusy ŭžo stvaryli admysłovuju tablicu, u jakoj adznačajuć aktualny stan rečaŭ nakont pryjomu starych dakumientaŭ. Zrabić «umiejscowienie» možna ŭ lubym horadzie Polščy niezaležna ad taho, dzie vy žyviacie. Bačna, što na hety momant, naprykład, va Urocłavie prymajuć staryja «zialonyja knižački» i pry hetym nie patrabujuć apastylaŭ. Toje samaje, naprykład, u Krakavie i niekatorych mienšych haradach. A voś žycharam Varšavy, Łodzi i Hdańska ŭžo pryjdziecca pajechać pa rehistracyju ŭ inšy nasieleny punkt.
Dadatkovaja prablema ŭ tym, što ŭ niekatorych užondach navat raniej pryniatyja dakumienty ciapier viartajuć praz adsutnaść apastylaŭ. Prynamsi, taki epizod zarehistravany ŭ horadzie Kanstancin-Jaziorna.
«Siońnia telefanavała supracoŭnica ź miascovaha ŭžonda, skazała, što praz adsutnaść apastylaŭ «umiejscowienie» nie zrobiać i pryniatyja tydzień tamu dakumienty viernuć», — paskardziłasia «Našaj Nivie» adna ź biełarusak.
Pakul častka biełarusaŭ zahadzia panikuje, inšyja vyrašyli ničoha nie rabić, bo «da hramadzianstva jašče daloka».
«Mnie zdajecca, pakul dojdzie sprava da čarhovaha etapu lehalizacyi, usio jašče sto razoŭ pamianiajecca, kali rabić vysnovy z taho, jak usio imkliva pierakručvajecca navat ciaham apošnich miesiacaŭ», — padzialiŭsia adzin z surazmoŭcaŭ.
U kamientary «Našaj Nivie» Pavieł Łatuška jak kiraŭnik biełaruskaj častki ŭ rabočaj hrupie pa pytańniach lehalizacyi biełarusaŭ Polščy, stvoranaj MUS Polščy, raskazaŭ, što 12 žniŭnia źviarnuŭsia da namieśnika ministra ŭnutranych spraŭ Polščy z prośbaj pra ŭvažlivy analiz situacyi.
«U liście da namieśnika ministra ŭnutranych spraŭ Polščy Macieja Duščyka ja źviarnuŭ uvahu, što ŭ adpaviednaści z ukazam Łukašenki ad 4 vieraśnia 2023 hoda №278 atrymańnie dublikataŭ i apastylu mahčyma vyklučna pry asabistaj prysutnaści zacikaŭlenaj asoby na terytoryi Biełarusi albo na padstavie davieranaści, aformlenaj na terytoryi Biełarusi. Vidavočna, što pieravažnaja bolšaść biełarusaŭ, jakija vymušana pakinuli Biełaruś praz represii režymu Łukašenki i praciahvajuć apazicyjnuju dziejnaść u padtrymku demakratyzacyi Biełarusi, nie mohuć vyjechać u Biełaruś dla vykanańnia hetych umovaŭ. Viartańnie na radzimu pahražaje im pazbaŭleńniem svabody i katavańniami».
Pakul ža jurysty rajać da dakumientaŭ dadatkova prykładać apisańnie vašaj situacyi z padrabiaznym tłumačeńniem, čamu vy nie možacie zrabić dublikat i apastyl na terytoryi Biełarusi.
Biełarusam stała składaniej lehalizavacca ŭ Polščy — tam bolš nie prymajuć vydadzienyja ŭ BSSR dakumienty i patrabujuć apastyli
Biełarusa vydalili z bazy Interpała, dapamoh Ofis Cichanoŭskaj
Biełarusy i ŭkraincy sutyknulisia z admovami pry pastupleńni ŭ polskija VNU. Minnavuki Polščy dało tłumačeńni
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju
Kamientary