Biełarusam stała składaniej lehalizavacca ŭ Polščy — tam bolš nie prymajuć vydadzienyja ŭ BSSR dakumienty i patrabujuć apastyli

Apošnimi dniami ŭ čatach biełarusaŭ u Polščy ludzi pišuć, što ŭ ich nie pryniali biełaruskija paśviedčańni ab naradžeńni abo ab zaklučeńni šlubu biez apastylu.

Admietna, što raniej takich patrabavańniaŭ nie było.

Pry admovie prymać dakumienty ŭ polskich dziaržaŭnych ustanovach spasyłajucca na dakumient, vydadzieny polskim MUS 28 lipienia 2025 hoda.

Dakumient adrasavany dyrektaram adździełaŭ hramadzianskich spraŭ i anałahičnych upraŭleńniaŭ vajavodstvaŭ.

U im havorycca, što zhodna ź infarmacyjaj, atrymanaj ad konsuła Polščy ŭ Minsku, u Biełarusi dahetul bieź jakich-niebudź abmiežavańniaŭ zastajucca ŭ zvarocie akty hramadzianskaha stanu, vydadzienyja orhanami byłoj BSSR abo SSSR, kali jany źmiaščajuć čytelnyja źviestki.

U vypadku, kali dakumienty, vydadzienyja orhanami byłoha SSSR abo BSSR, pavinny być vykarystanyja za miežami Biełarusi, zacikaŭlenaja asoba pavinna:

1. Atrymać paŭtorny ekzemplar takoha akta hramadzianskaha stanu va ŭstanovie, jakaja zachoŭvaje adpaviednyja knihi (paŭtorny ekzemplar vydajecca na novym błanku).
2. Zaśviedčyć hety paŭtorny dakumient štampam apastyl u Ministerstvie zamiežnych spraŭ Biełarusi.

Razam z tym, takaja pracedura mahčymaja tolki ŭ vypadku, kali adpaviednaja ŭstanova abo archiŭ maje knihi aktaŭ hramadzianskaha stanu ź pieryjadu BSSR abo SSSR.

Kali knihi abo archivy byli źniščanyja ci bolš nie znachodziacca na terytoryi Biełarusi, pavinna być vydadziena adpaviednaja daviedka, havorycca ŭ liście.

Pavialičyć

Z hetaha dakumienta nie da kanca zrazumieła, ci patrebny apastyl na ŭsie biełaruskija dakumienty abo tolki na dublikaty, jakija zamianiajuć tyja, što byli vydadzieny ŭ BSSR abo SSSR.

Niekatoryja ŭdakładniajuć u čacie, što va ŭžondach pa telefonie im adkazali, što patrebny apastyl na ŭsie dakumienty, vydadzienyja ŭ Biełarusi.

«Telefanavaŭ va ŭžond u Rašynie paŭtary hadziny tamu, tam skazali, što atrymali infarmacyju ad ministra: z 30 lipienia 2025 hoda biełaruskija dakumienty buduć prymać tolki z apastylem Ministerstva zamiežnych spraŭ Biełarusi».

«U Varšavie tolki što admovili va ŭmiaščeńni (pryznańni i rehistracyi zamiežnaha akta hramadzianskaha stanu — NN) z paŭtornym śviedčańniem ab naradžeńni biez apastylu».

Admietna, što ŭ pieršyja hady niezaležnaści ŭ Biełarusi praciahvali vydavać paśviedčańni ab naradžeńni i zaklučeńni šlubu na błankach BSSR, tamu, chutčej za ŭsio, ludzi, narodžanyja ŭ 1991-1994 hadach, taksama pavinny zamianić dakumient na dublikat.

• 0
• 0
• 0
• 0
• 0
• 0
• 0
• 0