Biełarusy i ŭkraincy sutyknulisia z admovami pry pastupleńni ŭ polskija VNU. Minnavuki Polščy dało tłumačeńni
Z pačatku žniŭnia ŭ Polščy dziejničaje novy paradak pryjomu zamiežnych studentaŭ, jaki značna ŭskładniŭ pastupleńnie dla abituryjentaŭ ź Biełarusi i Ukrainy. Novaŭviadzieńni vyklikali niezadavolenaść u častki kandydataŭ, i Ministerstva navuki apublikavała tłumačeńni ab tym, kaho zakranuć źmieny i jakija ekzamieny buduć zaličvacca, piša Most.
Biełarusy i ŭkraincy, jakija ŭžo prajšli ŭnutranyja ekzamieny va ŭniviersitetach i atrymali rašeńni ab zaličeńni, pačuli, što hetych dakumientaŭ niedastatkova. Admovy atrymlivali navat vypuskniki polskich škoł: ich atestat stałaści zaličvajecca tolki jak uzrovień B1. Nie harantavanyja vizy i tym, chto pastupiŭ da 1 žniŭnia: konsuły majuć prava dadatkova praviarać viedańnie movy.
Asabliva ciažkaja situacyja ŭ biełaruskich kandydataŭ — u Biełarusi nielha zdać dziaržaŭny ekzamien pa polskaj: centry zakrytyja, a členy kamisij padvierhlisia represijam.
Z 1 lipienia ŭ Polščy ŭstupiŭ u siłu Zakon ab likvidacyi parušeńniaŭ u vizavaj sistemie. Adna ź mier datyčyłasia pryjomu zamiežnikaŭ u polskija VNU. Jany pavinny paćvierdzić vałodańnie movaj, na jakoj budzie prachodzić navučańnie, na ŭzroŭni nie nižej B2. Ale ŭ hetym zakonie nie było skazana, jakim čynam treba paćviardžać viedańnie. Dla hetaha patrabavałasia pryniać asobnuju pastanovu Ministerstva adukacyi. Adnak da pačatku pryjomnaj kampanii nijakich tłumačeńniaŭ ad Ministerstva jašče nie było. Tady Kanfierencyja rektaraŭ polskich VNU zaklikała ministra narešcie ŭnieści jasnaść u praviły naboru zamiežnikaŭ. Naprykład, dazvolić VNU pravodzić unutranyja testy dla vyznačeńnia ŭzroŭniu viedaŭ.
Dadatkovy ekzamien u listapadzie
U apublikavanych 8 žniŭnia instrukcyjach Ministerstva navuki rastłumačyła, što ŭładalnikam polskaj «matury» (siertyfikatu ab siaredniaj adukacyi — atestat stałaści) nie treba pradstaŭlać asobny siertyfikat. Taksama paćvierdžana, što ŭnutranyja ekzamieny, składzienyja z 1 pa 31 lipienia 2025 hoda, mohuć zaličvacca — kali jany paćviardžajuć viedańnie movy na ŭzroŭni nie nižej B2 i adpaviadajuć unutranym praviłam VNU.
Z 1 žniŭnia pryjom mahčymy tolki pry najaŭnaści vonkavaha siertyfikata, nazvanaha ŭ pastanovie Ministerstva navuki i vyšejšaj adukacyi. U listapadzie adbudziecca dadatkovaja siesija dziaržaŭnaha ekzamienu na ŭzrovień B2, a ŭ dalejšym płanujecca dazvolić anłajn-zdaču.
Pavodle źviestak ministerstva, u 2024/25 navučalnym hodzie na pieršy kurs zaličyli na 4,5 tys. zamiežnych studentaŭ mienš, čym hodam raniej. Amal pałovu ŭsich zamiežnych studentaŭ u Polščy składajuć ukraincy.
Abituryjenty skłali pietycyju
Abituryjenty skłali pietycyju z patrabavańniem pieranieści ŭviadzieńnie novych praviłaŭ na nastupny hod, a pakul pryznavać unutranyja testy VNU.
Aŭtary pietycyi ličać, što vychad novych praviłaŭ užo paśla pačatku pryjomnaj kampanii parušaje asnovatvorny pryncyp prava — što zakon nie maje zvarotnaj siły. Jany źviarnuli ŭvahu Ministerstva adukacyi, što mnohija abituryjenty nie paśpiejuć zdać dziaržaŭny ekzamien, kab paćvierdzić moŭny ŭzrovień.
Kamientary