Rasijskaja raźviedka rezka najechała na kanstancinopalskaha patryjarcha
Rasijskaja Słužba źniešniaj raźviedki vystupiła z rezkaj zajavaj na adras kiraŭnika Kanstancinopalskaha patryjarchatu Varfałamieja, nazvaŭšy jaho «antychrystam u rasie» i abvinavaciŭšy ŭ raskolnickaj dziejnaści. U aficyjnym pres-relizie śćviardžajecca, što jon nibyta «razdrabniŭ pravasłaŭnuju Ukrainu», a ciapier skiroŭvaje svaju dziejnaść na krainy Bałtyi, piša The Moscow Times.
Pavodle SZR, Varfałamiej, jakoha ŭ dakumiencie taksama nazyvajuć «djabłam uva płoci», imkniecca vycisnuć rasijskaje pravasłaŭje ź Litvy, Łatvii i Estonii, stvarajučy tam carkoŭnyja struktury, padparadkavanyja Kanstancinopalu. U rasijskaj raźviedcy zajaŭlajuć, što ŭ hetym jaho padtrymlivajuć brytanskija śpiecsłužby, ułady bałtyjskich dziaržaŭ, a taksama miascovyja nacyjanalisty i nieanacysty.
SZR śćviardžaje, što patryjarch sprabuje adarvać pravasłaŭnyja cerkvy Litvy, Łatvii i Estonii ad Maskoŭskaha patryjarchatu, pieramańvajučy śviataroŭ i viernikaŭ u, jak skazana, štučna stvoranyja marhinalnyja relihijnyja struktury.
Akramia taho, ŭ zajavie havorycca pra namier Varfałamieja nadać aŭtakiefaliju Čarnahorskaj pravasłaŭnaj carkvie, što, na dumku śpiecsłužby, pavinna asłabić Sierbskuju pravasłaŭnuju carkvu. Pres-reliz zaviaršajecca cytataj z Nahornaj propaviedzi pra iłžeprarokaŭ, jakija prychodziać «u aviečaj škury, a ŭnutry — drapiežnyja vaŭki».
Varfałamiej źjaŭlajecca kiraŭnikom Kanstancinopalskaha patryjarchatu i nosić tytuł archijepiskapa Kanstancinopala — Novaha Ryma i Usialenskaha patryjarcha. U 2019 hodzie jon nadaŭ aŭtakiefaliju Pravasłaŭnaj carkvie Ukrainy, što vyklikała rezkaje nieprymańnie z boku Ruskaj pravasłaŭnaj carkvy. Paśla pačatku poŭnamaštabnaha ŭvarvańnia Rasii va Ukrainu 24 lutaha 2022 hoda patryjarch Varfałamiej publična asudziŭ ahresiju.
Kamientary