U Litvie zaćvierdzili niezaležnuju ad Maskvy pravasłaŭnuju carkvu. Siarod śviataroŭ — dvoje biełarusaŭ
U Litvie aficyjna ŭchvalili suisnavańnie dźviuch pravasłaŭnych cerkvaŭ.
U čaćvier Ministerstva justycyi bałtyjskaj krainy zarehistravała novuju strukturu — ekzarchat, jaki budzie padparadkoŭvacca Kanstancinopalskamu patryjarchatu. Razam ź joj u krainie praciahnie dziejničać jeparchija, jakaja znachodzicca ŭ padparadkavańni Maskoŭskaha patryjarchatu, piša Delfi.lv.
Novaja relihijnaja supołka naličvaje dziesiać śviataroŭ i maje namier u bližejšy čas sfarmavać kirujučyja orhany. Ekzarchat uznačaliŭ estonski śviatar Justynus Kiviłoa, jaki ŭ pačatku studzienia ździejśniŭ svaju pieršuju słužbu ŭ Litvie.
Astatnija śviatary raniej słužyli ŭ pravasłaŭnaj carkvie Maskoŭskaha patryjarchatu: šaściora ŭ Litvie, dvoje ŭ Biełarusi (Hieorhij Roj i Alaksandr Kuchta) i adzin u Rasii.
Z-za padtrymki vajny Rasii suprać Ukrainy patryjarcham Kiryłam hetyja dzieviać śviataroŭ ustupili ŭ kanflikt z kiraŭnictvam Ruskaj Pravasłaŭnaj Carkvy (RPC).
U 2022 hodzie mitrapalit Vilenski i Litoŭski Inakiencij adchiliŭ piaciarych ź ich ad słužeńnia i śviatarstva. Usialenski patryjarch Varfałamiej adnaviŭ ich u sanie i pryniaŭ u svaju jurysdykcyju. U sakaviku 2023 hoda Varfałamiej naviedaŭ Vilniu i padpisaŭ pahadnieńnie z uradam Litvy ab stvareńni ŭ hetaj krainie Ekzarchata Kanstancinopalskaha patryjarchata.
U Litoŭskaj jeparchii RPC spakojna pastavilisia da źjaŭleńnia jašče adnoj pravasłaŭnaj carkvy ŭ krainie. Mitrapalit Inakiencij zajaviŭ, što novuju relihijnuju supołku nieabchodna pryniać jak «realnaść našaha času». Jak adznačajuć ŚMI, z pačatku poŭnamaštabnaha vajskovaha ŭvarvańnia Rasii va Ukrainu jeparchija imknułasia da bolšaj niezaležnaści ad Maskoŭskaha patryjarchatu.
U Litvie naličvajecca 105 tysiač pravasłaŭnych viernikaŭ, bolšaść ź ich naležać da ruskamoŭnaj mienšaści.
Biełaruski pravasłaŭny prychod aranduje pamiaškańnie ŭ Vilni pa adrasie Bokšto, 2, što znachodzicca pobač z «Karčmoj1863» i vulicaj Pilies (Zamkavaja). Słužby časam adbyvajucca ŭ Refarmackaj carkvie na Pylimo, 18.
Biełaruski prychod pierajšoŭ na novajulijanski kalandar, jaki supadaje z hryharyjanskim. Ale Paschalija raźličvajecca pa svajoj sistemie.
Rasijski śviatar, pazbaŭleny RPC sanu praz malitvy za mir, pierajšoŭ u Kanstancinopalski patryjarchat
Śviatar Kuchta ŭ «Žyćci-malinie» raskazaŭ pra asablivaści mitrapalita Vienijamina, kantrast dvuch patryjarchaŭ i svaju pracu ŭ IT
«Mama zajaviła, što damoviłasia z baciuškam zamiest nas». Biełarusy raspaviali, jak pieradumali chryścić dziaciej
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju10
Kamientary