ZŠA pačali časova advodzić častku svajho piersanału z vajskovych baz na Blizkim Uschodzie paśla taho, jak Iran papiaredziŭ susiednija krainy, što ŭ vypadku ŭdaru Vašynhtona jahonyja abjekty mohuć być atakavanyja. Heta adbyvajecca na fonie najbujniejšych unutranych pratestaŭ u Iranie za apošnija dziesiacihodździ, piša Reuters.
Pratesty pačalisia jak demanstracyi suprać ciažkaha ekanamičnaha stanovišča, ale chutka pieraraśli ŭ masavyja vystupy suprać klerykalnaha režymu. Pavodle roznych krynic, kolkaść zahinułych składaje ad 2400 da 2600 čałaviek, a zatrymanych — bolš za 18000.
Prezident ZŠA Donald Tramp nieadnarazova pahražaŭ umiašacca ŭ situacyju, padtrymaŭšy pratestoŭcaŭ. Jon abiacaŭ «vielmi mocnyja dziejańni», kali Iran raspačnie represii suprać demanstrantaŭ, i zaklikaŭ irancaŭ praciahvać pratesty dy zachoplivać dziaržaŭnyja ŭstanovy, śćviardžajučy, što dapamoha ŭžo ŭ darozie.
Dakładnyja płany i čas mahčymych udaraŭ zastajucca nievyraznymi, ale niekalki zachodnich aficyjnych asob prahnazujuć, što ŭmiašańnie moža adbycca ŭ najbližejšyja 24 hadziny.
Iranski čynoŭnik na ŭmovach ananimnaści paviedamiŭ, što Tehieran paprasiŭ susiednija krainy — Saudaŭskuju Araviju, AAE i Turcyju — paspryjać, kab ZŠA nie pravodzili ataki, i papiaredziŭ, što amierykanskija bazy ŭ hetych krainach mohuć stać cellu, kali ŭdary ŭsio ž adbuducca. Pramyja kantakty pamiž ministram zamiežnych spraŭ Irana Abasam Arakčy i śpiecpasłańnikam ZŠA Styvam Uitkafam byli prypynienyja.
ZŠA majuć u rehijonie niekalki klučavych abjektaŭ: štab-kvateru Centralnaha kamandavańnia ŭ Katary (Al Udeid) i štab Piataha fłotu ŭ Bachrejnie. Katar zajaviŭ, što častkovy advod piersanału z bazy adbyvajecca «ŭ adkaz na ciapierašniuju napružanaść u rehijonie». Brytanija taksama pačała časova advodzić častku svaich supracoŭnikaŭ z aviabazy ŭ Katary. Pakul, adnak, niama śviedčańniaŭ pra masavy vyvad vojskaŭ, jak heta adbyłosia pierad iranskim rakietnym udaram u minułym hodzie.
Iranskija ŭłady abvinavačvajuć ZŠA i Izrail u stymulavańni pratestaŭ i nazyvajuć udzielnikaŭ «uzbrojenymi terarystami». U toj ža čas jany sprabujuć pakazać, što situacyja zastajecca pad ich kantrolem: dziaržaŭnaje telebačańnie pakazvaje kadry masavych pachavańniaŭ u Tehieranie, Isfachanie, Bušery i inšych haradach, demanstrujučy padtrymku viarchoŭnamu lidaru Ali Chamieniei. U toj ža čas prezident krainy Masud Piezieškijan zajaviŭ, što pakul urad maje padtrymku naroda, usie namahańni vorahaŭ buduć marnymi.
Pavodle acenki zachodnich aficyjnych asob, choć maštab pratestaŭ i ŭzrovień hvałtu ŭražvajuć, situacyja pakul nie śviedčyć pra krach urada. Siłavyja struktury Irana pa-raniejšamu znachodziacca pad kantrolem, a asnoŭnyja struktury biaśpieki dziejničajuć nadziejna. Prablemaj zastajecca abmiežavany dostup da infarmacyi praz adklučeńnie internetu, što ŭskładniaje dakładnuju acenku situacyi.
Pratestoŭcy ŭ Iranie ŭpieršyniu za niekalki dzion zmahli datelefanavacca za miažu i raskazać pra situacyju ŭnutry krainy
Čym ciapierašnija pratesty ŭ Iranie adroźnivajucca ad papiarednich
Tramp zaklikaŭ irancaŭ zachoplivać dziaržaŭnyja budynki. «Dapamoha ŭžo blizkaja!»
ZŠA ŭzvažvajuć nastupny krok u dačynieńni da Irana — i sutykajucca sa składanym vybaram
Tramp zajaviŭ pra pierasiačeńnie Iranam čyrvonaj linii
Donald Tramp apublikavaŭ post pra hatoŭnaść ZŠA dapamahčy Iranu
Iranskija muły ličać umiašańnie ZŠA vielmi małavierahodnym
Kamientary
raschodimsia