Stała viadoma, jak ciapier žyvie były aŭtahonščyk Michael Šumachier

Pavodle słoŭ žurnalista, jaki spasyłajecca na niekalki dobra infarmavanych krynic, 57‑hadovaha eks-spartsmiena kruhłasutačna dahladaje kamanda terapieŭtaŭ i miedsiaścior. Košt takoha dohladu składaje dziasiatki tysiač jeŭra na tydzień.

Častku času Šumachier žyvie ŭ zakrytym raskošnym asabniaku na Majorcy koštam kala 30 miljonaŭ jeŭra, ale asnoŭnaje miesca jaho pražyvańnia — jašče bolš darahi dom na bierazie Ženieŭskaha voziera ŭ Šviejcaryi. Akramia členaŭ siamji, tudy majuć dostup tolki try-čatyry čałavieki, nie źviazanyja ź im svajactvam. Siarod ich — były kiraŭnik kamandy Ferrari Žan Tod, jaki stavicca da Šumachiera jak da syna i amal ničoha nie raskryvaje pra jaho stan, akramia taho, što toj «praciahvaje zmahacca».

Raniej u presie chadzili čutki, što Šumachier moža pakutavać ad sindromu «zamknionaha čałavieka» — ciažkaha nieŭrałahičnaha stanu, kali čałaviek zachoŭvaje śviadomaść, ale nie moža ruchacca i razmaŭlać. Adnak, jak adznačaje aŭtar artykuła, i heta moža być nie całkam dakładna.

Adzin ź ludziej, blizkich da situacyi, na ŭmovach ananimnaści skazaŭ, što nielha być upeŭnienym, nakolki Šumachier usio razumieje: mahčyma, jon ułoŭlivaje častku taho, što adbyvajecca vakoł, ale nie całkam.

Šumachier nie źjaŭlajecca na publicy z 29 śniežnia 2013 hoda, kali atrymaŭ ciažkuju čerapna-mazhavuju traŭmu padčas katańnia na łyžach u francuzskich Alpach. Pa žadańni jaho žonki Karyny dostup da jaho majuć tolki vuzkaje koła davieranych asob i siabroŭ. Za ŭsie hetyja hady nie źjaviłasia nivodnaj fatahrafii Šumachiera ŭ jaho ciapierašnim stanie, chacia byli sproby šantažu i niezakonnaha raspaŭsiudžvańnia zdymkaŭ i miedycynskich danych — za heta niekatorych vinavatych pakarali.

Čas ad času ŭ ŚMI źjaŭlajecca novaja infarmacyja pra jaho zdaroŭje, ale pravieryć jaje dakładnaść amal niemahčyma. Naprykład, u 2025 hodzie žurnalist niamieckaha kanała RTL paviedamiŭ, što Šumachier užo nie moža vykazvać svaje dumki vusna. U dakumientalnym filmie Netflix 2021 hoda jaho žonka i syn taksama kazali, što jon nie zdolny samastojna ruchacca i mieć znosiny z navakolnymi.

Michael Šumachier — siamirazovy čempijon «Formuły-1», jaki zavajavaŭ tytuły ŭ 1994—2004 hadach, piać ź ich — zapar. Jon dahetul zastajecca rekardsmienam pa kolkaści samych chutkich kruhoŭ, a pa ahulnaj kolkaści pieramoh sastupaje tolki Ljuisu Chemiłtanu.

• 1
• 0
• 0
• 3
• 0
• 31
• 0
• 2