Kiraŭnik irłandskaj nizkabiudžetnaj avijakampanii Ryanair Majkł O’Liry zajaviŭ, što vajna vakoł Irana ŭžo naniesła surjozny ŭdar pa avijacyjnaj halinie. Pavodle jaho słoŭ, tolki za krasavik kampanija vydatkavała dadatkova 50 miljonaŭ dalaraŭ na paliva.
O'Liry adznačyŭ, što kali kanflikt zaciahniecca, a košt nafty zastaniecca na ŭzroŭni kala 150 dalaraŭ za barel, to za hod dadatkovyja vydatki Ryanair mohuć vyraści da 600 miljonaŭ dalaraŭ.
Asnoŭnaja prablema, pavodle słoŭ O'Liry, nie tolki vysokija ceny, ale i ryzyka deficytu avijacyjnaha paliva ŭ Jeŭropie ŭžo z červienia. Pastaŭki na maj pakul nie vyklikajuć vialikich aściaroh, ale dalej situacyja niapeŭnaja.
Kiraŭnik Ryanair zajaviŭ, što kali vajna chutka nie skončycca, niekalki jeŭrapiejskich avijakampanij mohuć nie vytrymać finansavaha cisku i zbankrutavać užo vosieńniu. Jon navat nazvaŭ kankretnyja avijakampanii, jakija, na jaho dumku mohuć sutyknucca ź ciažkaściami, — Wizz Air i Air Baltic.
Pry hetym jon adznačyŭ, što jakraz dla Ryanair heta moža stvaryć vyhadu, bo na rynku stanie mienš kankurentaŭ.
Vienhierski łoŭkost Wizz Air u adkaz abvierh słovy O'Liry i zajaviŭ, što maje mocnaje finansavaje stanovišča, dastatkovyja reziervy i dobra padrychtavany da rostu cenaŭ na paliva.
Niahledziačy na składanuju situacyju, Ryanair pakul zachoŭvaje płany rostu. Kampanija čakaje kala 216 miljonaŭ pasažyraŭ u 2026 hodzie i bolš za 220 miljonaŭ u 2027-m.
O'Liry taksama raskrytykavaŭ prezidenta ZŠA Donalda Trampa, abvinavaciŭšy jaho ŭ abvastreńni kanfliktu i niehatyŭnym upłyvie na suśvietnuju ekanomiku. Jon skazaŭ, što dobraja navina ŭ tym, što paśla 2028 hoda Trampa ŭžo nie budzie ŭ Biełym domie.
Asobna kiraŭnik Ryanair zakranuŭ prablemu jeŭrapiejskich padatkaŭ i zboraŭ u aeraportach. Jon ličyć, što vysokija aeraportnyja padatki časam škodziać bolš, čym vojny, bo zastajucca nadoŭha i pavyšajuć košt kvitkoŭ.
Ciapier čytajuć
Siarhiej Cichanoŭski pierabraŭsia žyć u Łos-Andželes52
Kamientary