Chočacie pahulać na viasielli, a siabry nie źbirajucca ŭ ZAHS? Akazvajecca, u Biełarusi ładziać fejkavyja viasielli dla takich vypadkaŭ
Usio čaściej biełarusy praz Threads sprabujuć naprasicca na čužoje viasielle. Niechta navat abiacaje padaryć maładym 500 dalaraŭ — maŭlaŭ, tolki zaprasicie. A vyjście ŭžo prydumali!
Minčanin Mirasłaŭ paskardziŭsia ŭ sacsietkach, što daŭno nie byŭ na viasielli — ale vielmi choča. Prosić nieznajomcaŭ zaprasić jaho na svajo śviata. Jon paabiacaŭ padaryć 500 dalaraŭ, padtrymlivać lubyja tosty i, kali spatrebicca, navat hatovy ŭpisacca ŭ siamiejnyja razborki.
Było niekalki zaprašeńniaŭ, a niekatoryja dziaŭčaty pisali, što z zadavalnieńniem stanuć «+1» dla chłopca, bo taksama chočuć pahulać na viasielli. Adhuknułasia navat ułaśnica sietki francuzskich piakarniaŭ Brioche Halina Karsak: «Aaaaaaa! Ja taksama daŭno chaču pahulać na viasielli! Vaźmicie mianie z saboj!».
Niečakana vyśvietliłasia, što dla ŭsich, chto maryć patusić, ale nie maje siabroŭ, jakija sabralisia ŭ ZAHS, u Biełarusi ładziać fejkavyja viasielli. Heta robić bankietny centr «Kamarova village».
Bližejšaje teatralizavanaje viasielle ŭ ich zapłanavana na 30 maja. Praŭda, tema davoli śpiecyfičnaja — «Viasielle ŭ SSSR». Abiacajuć tematyčnyja fotazonu i dekaracyi, konkursy dy muzyku. Dres-kod taksama patrabujuć u hetym styli. I rekamiendujuć pomnić, što vy idziacie na viasielle, a nie na dyskateku.
U mieniu — sieladziec pad futram, kvašanaja kapusta, katlety, ryba ŭ klary i inšyja kulinarnyja vynachodstvy toj epochi. Ałkahol abmiežavany — pa 100 hram nastojki i pa 100 hram šampanskaha na čałavieka (ale možna prynosić svoj ci dakupić na miescy ŭ bary).
Udzielničać mohuć tolki paŭnaletnija. Kim vy budziecie na viasielli — niaviestaj, śviedkaj ci žonkaj staršyni kałhasa — zahadzia nieviadoma. Usio vyrašajecca na miescy praź losavańnie. Losavańnie robiać asobna dla chłopcaŭ, dziaŭčat i par.
Śviata prachodzić z 15.30 da 23.30. A kaštuje ŭdzieł u im 130 rubloŭ z čałavieka (prosiać papiaredniuju apłatu 30 rubloŭ).
Kamientary
Heta vyhladaje jak niechta ŭ 1970-ch hulaŭ by na "nastalhii" i zamiłavańni Hitleram.