3 lipienia ŭ Połacku adkryli ruch pa abnoŭlenym moście na vulicy Kastryčnickaj. Dziela taho, kab čynoŭniki zmahli ŭračysta pierarezać čyrvonuju stužačku akurat na Dzień Niezaležnaści, budaŭnikam daviałosia hnać terminy i zdavać abjekt na paŭhoda raniej za prajektny hrafik.
Pracy vialisia z kanca 2024 hoda, całkam ruch byŭ pierakryty 8 studzienia 2025 hoda. Hienieralnym padradčykam vystupiŭ «Mastabud» sumiesna ź viciebskim filijałam MBU №5.
Pieršapačatkova płanavałasia, što ramont praciahniecca dva hady (da studzienia 2027 hoda), adnak budaŭnikam udałosia zdać abjekt u ekspłuatacyju na paŭhoda raniej.
Pavodle słoŭ staršyni Viciebskaha abłvykankama Alaksandra Rahožnika, na rekanstrukcyju ź inviestycyjnaj prahramy Viciebskaj vobłaści było vydatkavana 28 miljonaŭ rubloŭ.
Papiaredniaja kanstrukcyja mosta była ŭźviedziena ŭ 1962 hodzie i pierastała adpaviadać sučasnym transpartnym nahruzkam. Padčas rekanstrukcyi staryja žalezabietonnyja apornyja bałki byli całkam zamienienyja na novyja. Daŭžynia zbudavańnia zastałasia raniejšaj i składaje 112 mietraŭ, pry hetym šyrynia abjekta pavialičyłasia ŭdvaja — da 27 mietraŭ. Prajeznaja častka pašyrana ź dźviuch da čatyroch pałos (pa dźvie ŭ kožnym kirunku), pamiž imi ŭładkavany raździalalny astravok biaśpieki.
Na moście ŭkładziena novaje asfaltabietonnaje pakryćcio, zmantavany acynkavanyja aharodžy i dekaratyŭnaja padśvietka z hierbam horada. Dla piešachodaŭ praduhledžany tratuary šyrynioj 2,25 mietra, z adnaho boku abstalavana vieładarožka. Taksama realizavany elemienty biezbarjernaha asiarodździa: panižanyja bardziury i taktylnaja plitka dla ludziej sa słabym zrokam. Akramia abnaŭleńnia samoha mosta, budaŭniki zamianili inžyniernyja kamunikacyi, liŭnievuju kanalizacyju z ačyščalnymi zbudavańniami, abnavili padjezdy da zbudavańnia i źmianili schiemu pracy śviatłaforaŭ.
U cyrymonii adkryćcia ŭziali ŭdzieł staršynia Viciebskaha abłvykankama Alaksandr Rahožnik, staršynia Viciebskaha abłasnoha Savieta deputataŭ Dźmitryj Dziamidaŭ i staršynia Połackaha rajvykankama Vasil Šyłaŭ. Paśla aśviačeńnia abjekta i pierarazańnia čyrvonaj stužki pieršymi pa moście prajechali vychavancy adździaleńnia viełasportu Połackaj SDIUŠAR №2, miascovyja matacyklisty i novy aŭtatranspart.
Uviadzieńnie mosta ŭ ekspłuatacyju dazvolić razhruzić centr horada ad transpartnych zatoraŭ.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii16
Kamientary