Livanskaja armija prychodzić na poŭdzień krainy paśla vyvadu izrailskich vojskaŭ
Livanskija ŭłady paviedamili pra pačatak razhortvańnia svaich vajskovych padraździaleńniaŭ na poŭdni krainy paśla vyvadu adtul izrailskich vojskaŭ. Pieršaj terytoryjaj, jakaja pierajšła pad kantrol livanskaha vojska, stała tak zvanaja «piłotnaja zona» ŭ rajonie nasielenaha punkta Zaŭtar-el-Harbija ŭ pravincyi Nabacija, piša Bi-bi-si.
Stvareńnie «piłotnych zon» praduhledžana ramkavym pahadnieńniem pamiž Livanam i Izrailem, padpisanym u kancy červienia ŭ Vašynhtonie. Dakumient praduhledžvaje paetapny vyvad izrailskich vojskaŭ z poŭdnia Livana. Akramia hetaha, pahadnieńnie źmiaščaje punkt ab razzbrajeńni ŭzbrojenaj hrupoŭki «Chiezbała», jakuju padtrymlivaje Iran.
Razam z tym Izrail raniej zajaviŭ, što jahonyja vojski zastanucca ŭ bufiernaj zonie šyrynioj kala dziesiaci kiłamietraŭ uzdoŭž miažy stolki, kolki paličać nieabchodnym dla harantavańnia biaśpieki paŭnočnych izrailskich nasielenych punktaŭ.
21 lipienia prezident Livana Žozef Aun znachodzicca z aficyjnym vizitam u Złučanych Štatach. U prahramie vizitu zapłanavanaja jaho sustreča z prezidentam ZŠA Donaldam Trampam. Čakajecca, što livanski lidar budzie nastojvać na tym, kab Vašynhton paspryjaŭ poŭnamu vyvadu izrailskich vojskaŭ z astatnich rajonaŭ paŭdniovaha Livana i pieradačy kantrolu nad imi nacyjanalnaj armii.
Napiaredadni Dziaržaŭny departamient ZŠA paviedamiŭ pra pačatak realizacyi prajekta «piłotnych zon» u niekalkich nasielenych punktach. Livanskaja armija paćvierdziła, što ŭžo vykonvaje zadačy na častcy hetych terytoryj. Pry hetym izrailskaje vydańnie Haaretz sa spasyłkaj na svaju krynicu śćviardžaje, što ŭ niekatorych z nazvanych viosak izrailskich vajskoŭcaŭ na momant pieradačy terytoryi ŭžo nie było.
Novy etap supraćstajańnia pamiž Izrailem i «Chiezbałoj» pačaŭsia 2 sakavika paśla rakietnaha abstrełu izrailskaj terytoryi z boku hrupoŭki. U adkaz Izrail pačaŭ nanosić udary pa terytoryi Livana i pravioŭ naziemnuju apieracyju na poŭdni krainy.
U kancy červienia paśla ŭstupleńnia ŭ siłu pieramirja Izrail i Livan padpisali ramkavaje pahadnieńnie. Adnak, niahledziačy na heta, abstreły i łakalnyja bajavyja dziejańni praciahvalisia.
Pavodle livanskich uładaŭ, z pačatku novaha etapu kanfliktu ŭ krainie zahinuli bolš za 4300 čałaviek, u tym liku kala 800 dziaciej, a taksama žančyny i miedycynskija rabotniki. Kolkaść zahinułych bajcoŭ «Chiezbały» aficyjna nie raskryvajecca. Ź izrailskaha boku, pavodle apublikavanych źviestak, zahinuli nie mienš za 37 vajskoŭcaŭ i čatyry mirnyja žychary.
Kamientary