Biełarus pradaje za 30 tysiač rubloŭ paśviedčańnie palaŭničaha-rybaka, jakoje naležała Juryju Łužkovu
Adkul u mužčyny ź Mścisłava ŭziaŭsia dakumient byłoha mera Maskvy?
Na «Kufary» źjaviŭsia cikavy łot. U naźvie abviestki ścipła paznačana: «Paśviedčańnie». Ale košt — ažno 30 tysiač rubloŭ — adrazu vyklikaje pytańni.
Unutry knižački možna pabačyć čorna-biełaje fota byłoha mera Maskvy. Napisana, što paśviedčańnie naležyć Juryju Michajłaviču Łužkovu, jaki naradziŭsia ŭ 1936 hodzie i žyŭ u Maskvie pa adrasie vulica Palikarpava, dom 3, kvatera 23.
Zhodna z zapisami, jon staŭ siabram tavarystva palaŭničych i rybakoŭ 14 studzienia 1974 hoda, a hetaje paśviedčańnie atrymaŭ 14 vieraśnia 1995 hoda.
Darečy, palavańniem Łužkoŭ sapraŭdy cikaviŭsia. Jon raspaviadaŭ u intervju «Ruskamu palaŭničamu časopisu», što ŭpieršyniu pajšoŭ palavać u 15 hadoŭ:
«U baćki była strelba, a dziadźka byŭ tady adnym z samych viadomych palaŭničych Kalininskaj (ciapier Ćviarskoj) vobłaści. Dobra pamiataju pieršuju pajezdku na palavańnie. Heta było zimoj, i my afłažyli vaŭkoŭ i lis. Padčas taho palavańnia naš kalektyŭ palaŭničych zdabyŭ čatyry lisy i adnaho vaŭka. Ale samym vialikim pośpiecham z maim siabram, jakoha taksama ŭziali na palavańnie, było toje, što my zmahli vykapać dvuch žyvych janotaŭ, jakich pryciahnuli dadomu».
Vyhladaje paśviedčańnie Łužkova davoli praŭdapadobna — u im jość adznaki ab apłacie ŭnioskaŭ (pa piać savieckich rubloŭ), a taksama zapisy, zroblenyja ŭ roznyja hady.
Ale ž jak jano mahło trapić u ruki mužčyny ź Mścisłava? Čytačka «Našaj Nivy» źviazałasia z aŭtaram abviestki na «Kufary». Jon śćviardžaje, što niekali chadziŭ na palavańnie z asabistym pamočnikam Łužkova — i toj byccam by padaryŭ paśviedčańnie byłoha kiraŭnika.
Dokazy sapraŭdnaści mužčyna abiacaje prademanstravać pry asabistaj sustrečy. Hatovy handlavacca i skinuć niekalki tysiač rubloŭ.
Ciapier čytajuć
«Źnik bieź źviestak» vielmi małady biełaruski najomnik2
«Źnik bieź źviestak» vielmi małady biełaruski najomnik
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny66
Kamientary