Dyrektara toj samaj studyi, jakaja ŭstanaŭlivała Iharu Turu kuchniu za 23 tysiačy rubloŭ, aryštavali za machlarstva

Stała viadoma pra zatrymańnie dyrektara kampanii, jakaja 15 hadoŭ vyrablała meblu na zamovu, — havorka idzie pra «Kuchni Čery». Uznačalvaŭ jaje Jarasłaŭ Tałočka.

Jak paviedamiła milicyja, u peŭny momant u pradpryjemstva pačalisia finansavyja i vytvorčyja prablemy. Niahledziačy na heta, kiraŭnik praciahvaŭ prymać novyja zakazy, navat kali kampanija ŭžo nie paśpiavała vykonvać raniejšyja, a častka abstalavańnia złamałasia.

Jak miarkuje śledstva, utvoranyja daŭhi dyrektar sprabavaŭ pakryvać za košt hrošaj novych klijentaŭ, vykarystoŭvajučy schiemu, padobnuju da finansavaj piramidy.

Ahulnaja suma škody, naniesienaj paciarpiełym, na hety momant pieravyšaje 1 miljon rubloŭ.

Jašče raniej aburanyja klijenty, jakija nie mahli dačakacca svajoj mebli, zaklikali inšych ludziej nie vieryć stanoŭčym vodhukam — maŭlaŭ, jany ŭsie prapłačanyja.

Pavialičyć

Cvaimi zachapleńniami ad «Kuchni Čery» letaś dzialiŭsia prapahandyst Ihar Tur razam z žonkaj Ksienijaj — kampanija rabiła im premijalnuju kuchniu ŭ novy dom. 

Kab zrazumieć canu pytańnia, adzin z čytačoŭ «Našaj Nivy» pacikaviŭsia ŭ vyrabnika, kolki kaštuje takaja samaja kuchnia, jak na videa.

Pavialičyć

«Časam vizualna padobnyja prajekty mohuć adroźnivacca pa košcie ŭ razy. U hetym vypadku zamoŭca zrabiŭ vybar na karyść materyjałaŭ i furnitury premijalnaha siehmienta. […] Košt prajekta pad kluč skłaŭ 23 018 biełaruskich rubloŭ», — adkazali ŭ kampanii.

Pavialičyć

U videa Ksienija Tur raspaviadaje, što źviarnucca ŭ «Kuchni Čery» im paraili siabry — tyja zamaŭlali kuchniu ŭ hetaj kampanii i zastalisia vielmi zadavolenymi. 

Ihar ža nie mienš badziora kaža:

«Dla mianie jak dla čałavieka, jaki zajmaŭsia finansavańniem usiaho hetaha pytańnia, było vielmi važna, što kampanija «Kuchni Čery» pracuje z zakazčykam, uličvajučy ŭsie jaho intaresy. Ja telefanuju — mnie kažuć: «Tak, kaniečnie, my vam heta zrobim». Na hety momant, užo z ustalavanaj kuchniaj, u mianie jość poŭnaja ŭpeŭnienaść, što, kali niešta pojdzie nie tak ci ŭ hałavie ŭ majoj cudoŭnaj žonki ŭźniknie jašče niejkaja ideja, to «Kuchni Čery» heta zrobiać».

Ksienija śćviardžała, što ad momantu padpisańnia damovy da ŭstanoŭki kuchni prajšoŭ «maksimum miesiac, a moža, navat i mienš».

Ihar paćvierdziŭ: «Na kožnym etapie ŭsio prajšło roŭna i chutka, za što ja «Kuchniam Čery» biaskonca ŭdziačny jak muž vydatnaj žonki».

I Ksienija, i Ihar tady repostnuli rekłamny rolik sabie ŭ storys. Videa nabrała kala 45 tysiač prahladaŭ, a łajknuła jaho navat kaśmičnaja turystka Maryna Vasileŭskaja.

Apošni dopis u instahramie kampanii — heta paviedamleńnie, u jakim supracoŭniki zajavili, što «epocha «Čery» skončyłasia», i paprasili prabačeńnia ŭ klijentaŭ.

Pavodle ich słoŭ, supracoŭniki kampanii na praciahu mnohich miesiacaŭ nie atrymlivali zarobkaŭ, ale praciahvali pracavać, vykonvać abaviazacielstvy pierad klijentami i spadziavacca, što situacyju jašče možna budzie vypravić. Ciapier sami rabotniki taksama akazalisia siarod paciarpiełych.

U sacyjalnych sietkach paviedamlajuć, što prablemy mahli zakranuć bolš za sotniu klijentaŭ kampanii.

Zaraz «Kuchni Čery» znachodziacca ŭ stadyi likvidacyi. 

• 0
• 0
• 0
• 0
• 0
• 0
• 0
• 0