Ivan Kraŭcoŭ raskazaŭ, jak zajmieŭ prablemy paśla traplańnia ŭ brytanski sankcyjny śpis ciozki-rasijanina
Były sakratar Kaardynacyjnaj rady Ivan Kraŭcoŭ na svajoj staroncy ŭ fejsbuku raskazaŭ na ŭłasnym prykładzie, jak na praktycy pracujuć piersanalnyja sankcyi.
6 lipienia Vialikabrytanija ŭniesła ŭ nacyjanalny sankcyjny śpis Ivana Siarhiejeviča Kraŭcova — načalnika 4‑ha navukova-daśledčaha adździeła Nacyjanalnaha centra «Sihnał». Heta maskoŭski instytut, jaki Łondan źviazvaje z raspracoŭkami, źviazanymi z «Navičkom».
Pry hetym u brytanskim sankcyjnym zapisie, akramia imia, imia pa baćku, proźvišča i pasady, niama nijakich inšych identyfikacyjnych źviestak: ni daty naradžeńnia, ni hramadzianstva, ni numara pašparta, ni IPN i navat napisańnia imia i proźvišča kirylicaj. Jeŭrasajuz, darečy, padyšoŭ da hetaj spravy bolš adkazna: uklučyŭšy supracoŭnikaŭ taho ž «Sihnała» ŭ svoj sankcyjny śpis na try dni raniej, jon paznačyŭ dla kožnaha ź ich datu i miesca naradžeńnia, hramadzianstva, IPN, napisańnie kirylicaj i pasadu.
Biełaruski Ivan Kraŭcoŭ 6 lipienia, jak jon miarkuje, mienavita praz brytanskija sankcyi pačaŭ atrymlivać paviedamleńni ab błakavańni svaich akaŭntaŭ. Abmiežavańni zakranuli ŭsie jaho servisy, dzie jość bilinh: Google, Wise, bankaŭskija rachunki i inšyja. Pry hetym OpenAI i Anthropic jaho nie zabłakavali.
Servisy zapatrabavali ad Kraŭcova ŭdakładnić imia pa baćku. Ivan adkazaŭ, što jon Jaŭhienavič, i hetaha akazałasia dastatkova dla razbłakavańnia. Prytym niekatoryja kampanii adnavili dostup prosta paśla adkazu na list i navat nie paprasili paćviardžalnych dakumientaŭ.
Paźniej Kraŭcoŭ sutyknuŭsia z padobnaj prablemaj pry adpraŭcy płaciažu pa SWIFT na niekalki tysiač jeŭra za miežy ES. Banku-karespandentu spatrebiłasia 17 dzion, kab aŭtaryzavać pieravod.
Jon źviartaje ŭvahu na toje, što proźvišča Kraŭcoŭ davoli raspaŭsiudžanaje ŭ Biełarusi, Rasii i Ukrainie, a imia Ivan uvachodzić u lik samych častych mužčynskich imionaŭ. Tamu, na jaho dumku, ludziej ź imiem i proźviščam Ivan Kraŭcoŭ mohuć być tysiačy. Niedastatkova dakładny sankcyjny zapis, takim čynam, moža pryvodzić da taho, što prablemy z dostupam da rachunkaŭ i servisaŭ uźnikajuć u inšych ludziej z takimi ž imiem i proźviščam.
Prytym prablemy mohuć vyłazić u samych niečakanych miescach. Pa słovach Ivana Kraŭcova, niadaŭna anałahičny zapyt jon atrymaŭ i ad aŭtobusnaha pieravozčyka LuxExpress, jaki nie zachacieŭ pradavać jamu bilet biez udakładnieńnia imia pa baćku.
Ivan Kraŭcoŭ raskazaŭ, dzie ciapier pracuje
Kraŭcoŭ rasčaravany, što biełarusy zabyli Kaleśnikavu. «A jana stanovicca ledź nie tvaram №1»
«Nasamreč kamanda nie zaŭsiody była skancentravana na Babaryku. Nie ŭsio syšłosia na im». Kraŭcoŭ vypisvaje Babaryku z «babarykancaŭ»?
Kraŭcoŭ: Ja b nie skazaŭ, što Babaryka dobra razumieje palityčny kantekst. A ŭdzieł u kanfierencyi «Novaja Biełaruś» — słaby chod
Ivan Kraŭcoŭ skłaŭ abaviazki sakratara Kaardynacyjnaj rady. Ciapier budzie delehatam
Kamientary