Экс-рэдактара «Вячэрняга Століна» вінавацяць у садзейнічанні экстрэмісцкай дзейнасці і вымагальніцтве

52-гадовага Аляксандра Ігнацюка зараз трымаюць пад вартай у баранавіцкім следчым ізалятары. Неўзабаве яго пачнуць судзіць, паведамляе БАЖ.

У паведамленні ў афіцыйным тэлеграм-канале МУС сцвярджаецца, што Ігнацюк садзейнічаў дзейнасці «экстрэмісцкага» тэлеграм-канала, адміністратары якога знаходзяцца за мяжой, «сістэматычна імкнуўся дыскрэдытаваць дзяржаўныя органы» і «спрабаваў уладкавацца на працу ў экстрэмісцкія інтэрнэт-крыніцы».

Таксама МУС заяўляе, што затрыманы вырабляў відэаролікі з «кампраматам» на мясцовых прадпрымальнікаў і вымагаў з іх грошы, пагражаючы апублікаваць гэтыя факты ў інтэрнэце. Што нібыта ад дзейнасці блогера пацярпелі трое жыхароў Столінскага раёна.

Павялічыць

Сілавое ведамства паказала і кадры затрымання, якое, як вынікае, было ініцыяванае ГУБАЗіКам. На відэа бачна, як у вясковую хату Ігнацюка ўваходзяць узброеныя і ў поўнай экіпіроўцы байцы АМАП. 

Паводле каментара начальніка аддзела 6-га ўпраўлення (па Брэсцкай вобласці) ГУБАЗіК МУС Паўла Кухнаўца, затрыманага абвінавачваюць па крымінальных справах за вымагальніцтва (арт. 208 КК), за паклёп на Лукашэнку (арт. 367 КК) і ў садзейнічанні экстрэмісцкай дзейнасці (арт. 361-4 КК).

Відэаблогера Аляксандра Ігнацюка затрымалі 18 ліпеня 2023 года. Пра гэта стала вядома выпадкова: ён даўно жыў адзін у аддаленай вёсцы Пінскага раёна, і сябры занепакоіліся пра ягоны лёс пасля таго, як ён цягам некалькіх тыдняў не выходзіў на сувязь.

17 жніўня 2023 года беларуская праваабарончая супольнасць прызнала Ігнацюка палітычным вязнем. У кастрычніку паведамлялася, што яго вінавацяць у паклёпе. На кастрычнцкім відэа Ігнацюк у кайданках казаў, што здымае для канала «грамадска значны палітычны кантэнт», і заяўляе, што яго затрымалі за ўчыненыя ім дзеянні ў 2022 годзе.

«У гэтым годзе я супрацоўнічаў з экстрэмісцкімі фарміраваннямі, аказваў ім садзейнічанне, таму ў дачыненні да мяне распачата крымінальная справа», — кажа Ігнацюк.

Аляксандр Ігнацюк вядомы тым, што напрыканцы 90-х — пачатку 2000-х выдаваў незалежную рэгіянальную газету «Вечерний Столин» і быў яе галоўным рэдактарам.

У 2003 годзе паводле загаду тагачаснага міністра інфармацыі Міхаіла Падгайнага, выпуск газеты прыпыняўся на тры месяцы, бо рэдакцыя нібыта парушыла арт. 5 «Закона аб друку і іншых СМІ». Газета «Вечерний Столин» аднавіла выхад у кастрычніку 2003 года, аднак ужо ў снежні суд прызнаў Аляксандра Ігнацюка вінаватым у абразе былога старшыні Столінскага райвыканкама Уладзіміра Пашкевіча. Тады рэдактара газеты паводле крымінальнага артыкула 369 пакаралі штрафам памерам 30 базавых велічынь, што складала на той час каля 230 долараў. Менавіта гэты выпадак прыгадвае цяпер прэсавая служба МУС, згадваючы, што Ігнацюк «быў асуджаны за абразу прадстаўніка ўлады».

• 0
• 0
• 0
• 0
• 1
• 0
• 6
• 0