Рэдактара Аляксандра Манцэвіча перавялі ў следчы ізалятар у Баранавічах
Галоўны рэдактар «Рэгіянальнай газеты» знаходзіцца ў СІЗА № 6 у Баранавічах ад 27 лістапада. Да таго Аляксандра Манцэвіча ўтрымлівалі ў следчай турме ў Жодзіне, паведамляе БАЖ.
Сёлета 3 лістапада суд Маладзечанскага раёна ў асобе суддзі Аляксея Іршына прызнаў Аляксандра Манцэвіча вінаватым у дыскрэдытацыі Рэспублікі Беларусь (арт. 369-1 Крымінальнага кодэкса). Манцэвіча асудзілі да чатырох гадоў пазбаўлення волі з адбыццём у калоніі ва ўмовах агульнага рэжыму і да штрафу памерам 400 базавых велічынь, што складае 14 800 рублёў.
Сваёй віны асуджаны рэдактар незалежнага СМІ не прызнаў, у сваім апошнім слове на судзе ён казаў пра тое, што ганарыцца сваімі продкамі, сваімі роднымі, сябрамі і «Рэгіянальнай газетай», што была разам са сваімі чытачамі на працягу больш як 25-ці гадоў: «Я не летуценнік, але ўпэўнены, што некалі з'явіцца вуліца імя «Рэгіянальнай газеты», якая мацавала аўтарытэт беларускай нацыі, жыла клопатамі чытачоў і пісала праўду».
У ліпені 2021 года рэдакцыя «Рэгіянальнай газеты», якая асвятляла жыццё Маладзечна і памежжа Мінскай і Гродзенскай абласцей, вымушана прыпыніла выпуск друкаванага выдання і засяродзілася на інтэрнэт-версіі. Пазней Мінінфарм на падставе рашэння суда Маладзечанскага раёна ўнёс сайт і тэлеграм-канал «Рэгіянальнай газеты» ў «Рэспубліканскі спіс экстрэмісцкіх матэрыялаў». Пасля атакі сілавікоў на рэдакцыю і затрымання галоўнага рэдактара сёлета ў сакавіку, той жа суд прызнаў «экстрэмісцкім» яшчэ і кантэнт выдання ў сацсетцы «ВКонтакте».
Рэдактара Аляксандра Манцэвіча затрымалі 15 сакавіка 2023 года пасля ператрусу ў ягоным доме ў Вілейцы, і з таго моманту ўтрымліваюць пад вартай — спачатку змясцілі ў ІЧУ Маладзечна, а пасля 72 гадзін папярэдняга затрымання перавялі ў следчую турму № 8 Жодзіна (Мінская вобласць).
Ператрусы тады правялі таксама ў супрацоўнікаў рэдакцыі. Сілавікі забіралі аргтэхніку і грошы, ва ўсіх узялі падпіску пра неразгалошванне таямніцы следства.
Паводле абвінавачання, Аляксандр Манцэвіч на пасадзе кіраўніка рэдакцыі «Рэгіянальнай газеты» разам з іншымі асобамі з 1 студзеня 2020 года па 15 сакавіка 2023 года нібыта распаўсюджваў у друкаваным выданні і афіляваных інтэрнэт-рэсурсах ілжывыя звесткі, якія дыскрэдытуюць беларускую дзяржаву і яе органы ўлады.
Следства сцвярджала, што «ў артыкулах змяшчалася недакладная інфармацыя, накіраваная на прычыненне істотнай шкоды дзяржаўным і грамадскім інтарэсам, падрыў аўтарытэту краіны і яе органаў улады, нанясенне шкоды нацыянальным інтарэсам, дэстабілізацыю абстаноўкі сярод грамадзян Беларусі, фармаванне ілжывых уяўленняў аб невыкананні ў рэспубліцы правоў і свабод грамадзян».
6 красавіка 2023 года праваабаронцы прызналі Аляксандра Манцэвіча палітычным вязнем. «Лічым, што дзеянні ў дачыненні да яго з’яўляюцца працягам мэтанакіраванай палітыкі ўладаў па абмежаванні распаўсюду непадцэнзурнай інфармацыі ў краіне і працягам наступу на свабоду слова», — гаварылася ў заяве праваабарончай супольнасці.
5 жніўня журналіст сустрэў за кратамі свой 65-гадовы юбілей.
Сваякі, сябры і калегі просяць падтрымаць яго лістамі, пасылкамі і грашовымі пераводамі на адрас:
225413, Брэсцкая вобл., г. Баранавічы, вул. Брэсцкая, 258 В, Следчы ізалятар № 6. Аляксандру Барысавічу Манцэвічу.
Каментары