Палітвязня Наліўку падмануў палітвязень Абрамук — забраў падтрымку, якую той павінен быў атрымаць па вызваленні

Версія Сяргея Наліўкі

Абодва палітвязні праходзілі па брэсцкай «карагоднай справе».

Абрамук запомніўся гучнай гісторыяй: ён закахаўся ў супрацоўніцу хіміі. Каханне ў выніку не атрымалася, а пасля вызвалення Дзмітрый асеў у Варшаве. У лістападзе 2024 яго затрымлівалі падчас матчу «Легіі» з мінскім «Дынама» і забаранілі хадзіць на футбольныя матчы.

Вось, што расказаў «Нашай Ніве» Сяргей Наліўка:

«Калі я вызваліўся 26 кастрычніка 2024 года, то напісаў у «Байсол» наконт матэрыяльнай дапамогі. Мне хутка адказалі, што мне дапамогуць, і выдзелілі грошы, даволі вялікую суму».

Паколькі тады Наліўка яшчэ быў у Беларусі, для атрымання грошай яму было трэба знайсці замежную картку.

«Я ўзгадаў, што Дзмітрый Абрамук, з якім мы разам сядзелі на хіміі, жыве ў Варшаве — пра гэта расказаў іншы хімік.

Я напісаў Абрамуку і запытаўся, ці здолее ён мне дапамагчы. Ён пагадзіўся. Кінуў мне рэквізіты для пераводу, я перакінуў іх «Байсолу» — і яны адразу перавялі грошы. Я пішу Абрамуку: маўляў, правер, ці дайшлі.

Пасля гэтага ён адразу мяне паўсюль заблакаваў. Я зразумеў, што ён мяне кінуў.

Павялічыць

Я напісаў чалавеку, які падказваў мне, што Абрамук у Польшчы. Ён мне адказаў, што Абрамук яго выдаліў з сяброў ды знік. Пасля людзі ў Варшаве спрабавалі яго шукаць, але ніхто не здолеў знайсці. Ён хаваецца ад людзей.

Мне крыўдна, бо я разлічваў на гэтыя грошы зрабіць візу і паехаць за мяжу. А атрымалася, што пасадзілі адны, а як вызваліўся, дык кінулі свае ж».

Андрэй Стрыжак распавёў «Нашай Ніве», што пра складанасці з Абрамуком ён ведае.

«З ім былі праблемы. Доказаў і падцвярджэнняў у мяне няма, але па паводзінах чалавека можна дапусціць, што ён мае праблемы з залежнасцямі і патрабуе дапамогі», — кажа кіраўнік «Байсола».

Знаёмыя Абрамука расказалі, што ў лістападзе 2024 года ён пісаў усім людзям са свайго спіса фэйсбук-сяброў (нават незнаёмым) і прасіў пазычыць грошай.

Павялічыць

Сяргей Наліўка кажа, што ў размове з агульным знаёмым Дзмітрый запэўніваў, што не ведае Наліўку ўвогуле. Сяргей даслаў нам галасавыя паведамленні, у якіх Дзмітрый адмаўляе факт яго знаёмства з ім.

Таксама даслаў нам скрыншоты, якія пацвярджаюць, што ён камунікаваў з Дзмітрыем Абрамуком.

Версія Дзмітрыя Абрамука

У Дзмітрыя Абрамука версія іншая. Ён кажа, што пра «Байсол» яго ніхто ні пра што не папярэджваў і што ў нейкі момант яму проста даслалі грошы на рахунак:

«Мне ніхто не казаў, што прыйдуць нейкія грошы. Нейкі чалавек напісаў, кажа: дай рахунак для атрымання дапамогі «Байсола». Я нават не зразумеў, што гэта Наліўка. Ну і мне ў выніку даслалі грошы — дзякуй, дапамаглі, я палітвязень і маю на гэта права. І вяртаць я нічога не буду.

Я не даваў нікому дазволу атрымліваць грошы на свой рахунак. І чаму ўвогуле са мной не звязаўся «Байсол» папярэдне? Скінулі? дзякуй, што дапамаглі. 

Калі ён прыедзе ў Польшчу, я яго знішчу. Калі будзеце яму пісаць, то скажыце, каб піць кідаў і не казаў, што ведае Абрамука.

Павялічыць

Увогуле ў месцах пазбаўлення волі ён праявіў сябе з вельмі дрэннага боку. Хай раскажа пра тое, што ён з іншымі сваімі сябрамі вытвараў на хіміі і падставіў мяне асабіста. Такіх, як ён, я не паважаю».

Падчас наступнай камунікацыі з журналістам «Нашай Нівы» Абрамук пачаў адмаўляць, што грошы прыходзілі яму на рахунак — маўляў, такога ён увогуле ніколі не казаў.

«Ды і ўвогуле, тое, што мне на рахунак прыйшлі нейкія грошы — гэта толькі мая справа ўвогуле і нікога не павінна [турбаваць]», — падсумаваў Дзмітрый.

Пасля гэтага выдаліў перапіску і прыгразіў, што калі ягоныя каментары будуць апублікаваныя і журналіст «напіша нешта ад ягонага імя, то ўсё жыццё будзе шкадаваць».

На наступны дзень мы зноў сазваніліся з Дзмітрыем. Цяпер ён сказаў, што не атрымліваў ніякіх грошай для Сяргея Наліўкі, а ўсю дапамогу, якую атрымліваў для іншых — перадаваў. Адкуль тады Сяргей узяў ягоны польскі рахунак? «Цяжка сказаць».

Дзмітрый дадаў, што «такіх, як Наліўка, ён не лічыць палітвязнямі» і прызнаў, што сёння яму складана фармуляваць думкі.

Каментар «Байсола»

«У нашай практыцы было толькі два такія выпадкі, так што такое здараецца нячаста. Але калі людзі даюць нам чужыя рэквізіты, то мы папярэджваем, што не можам кантраляваць тое, куды далей пойдуць грошы», — кажуць у фондзе.

У фондзе кажуць, што адзінае, што яны могуць параіць — не пераводзіць грошы на рахункі людзям, у якіх вы не ўпэўненыя. І не давяраць людзям проста таму, што вы сядзелі разам з імі з кратамі ці прайшлі іншыя цяжкасці.

• 3
• 0
• 1
• 22
• 2
• 4
• 3
• 0