Тур абяцае кампрамат на тых, хто праз тыкток скардзіцца на ўлады
Тыкток стаў ці не адзіным інструментам камунікацыі простых людзей з уладамі. Скаргі, якія немагчыма кантраляваць, зрабіліся галаўным болем для чыноўнікаў. Прапагандыст Ігар Тур вырашыў застрашыць тых, хто скардзіцца на ўлады: маўляў, у адказ дастанем усю вашу брудную бялізну.
Тур заявіў у сваёй праграме, што раней чыноўнікі публічна не адказвалі скаржнікам: ці то «сапраўды нарабілі памылак», ці нават калі чалавек са скаргамі не меў рацыі, вырашалі «трымацца далей ад скандалаў — можа, само ўсё і рассмокчацца».
«Некая грамадзянка запісала нешта крытычнае ва ўмоўным тыктоку — маўляў, ёй, шматдзетнай, не даюць належную кватэру — і збірае сотні каментарыяў, дзе ўсе абліваюць брудам чыноўнікаў, усю краіну і таго, хто ўсё гэта прыдумаў. А чыноўнікі, што кантактавалі з ёй, маўчалі», — кажа Тур, хаця гэта няпраўда: на рэзанансныя сюжэты з інтэрнэту чыноўнікі рэагуюць і асабліва падрабязна тлумачаць, у чым яны маюць рацыю, а грамадзянін не мае.
Цяпер жа ўлада бачыць камунікацыю з людзьмі так. Тым, хто выходзіць публічна са сваімі скаргамі, абяцаюць цэбар памыяў.
«Сёння прыемна паглядзець, як на нараканні дзяржава ўсё часцей адказвае ўпэўнена і імгненна: «Пачакайце, грамадзянка! Вы памыляецеся і ўводзіце сваіх гледачоў у зман. Вам прапаноўвалі і тое, і гэта, але вы хітруеце — хочаце і рыбку з’есці, і ўсё астатняе. Так нельга. І не трэба спрабаваць зламаць дзяржаву публічным скандалам». Нагнуць дзяржаву скандалам ужо дакладна нікому не ўдасца. Гэта на заметку ўсім ахвочым», — абяцае Тур.
«А калі спатрэбіцца, то ў адказ на публічную няпраўду з боку нейкага грамадзяніна дзяржава пакажа непрыемную для некага, але чыстую праўду. Напрыклад: «А чаму вы, грамадзянка, жадаючы кватэру, не ведзяце гаспадарку разам з мужам і не заяўляеце яго як члена сям’і? Хоць у яго ёсць нават уласная кватэра, якую ён здае. Напэўна, каб хітрасцю атрымаць больш льготных метраў, ці не так?» — удакладняе ён.
Паводле прапагандыста, канцэпцыя сучаснай сацыяльнай дзяржавы і «правільнай сацыяльнасці» не ў тым, каб задавальняць патрабаванні кожнага, хто звяртаецца, а ў тым, каб камунікацыя «дзяржава — грамадзянін» была справядлівай.
«Прынята рашэнне прэзідэнта: касіць траву на ўчастках і наводзіць парадак. Значыць, трэба парадак і трэба касіць, а не наракаць, што гэта цяжка, доўга або лянота», — расставіў кропкі Тур.
Цяпер чытаюць
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»44
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»
«Як Вольскі прыходзіў з ператрусам да Коласа, а Крапіва і Глебка даносілі на калег». Апублікаваныя жахлівыя ўспаміны Рыгора Бярозкіна пра рэпрэсіі 1920—1940-х1515
Каментары
Тур ужо абкасіў траву вакол БТ?
Іду мераць з рулеткай