Начальнік Генеральнага штаба Расіі Валерый Герасімаў заявіў, што Расія працягне вайну супраць Украіны і будзе весці наступальныя дзеянні. Ён удакладніў задачы для войскаў на восеньскі перыяд, падвёўшы вынікі вяснова-летняй кампаніі 2025 года. Паводле яго слоў, «стратэгічная ініцыятыва цалкам належыць расійскай арміі».
Герасімаў сцвярджае, што войскі Расіі цяпер кантралююць амаль усю Луганскую вобласць (99,7%), а таксама 79% Данецкай, 74% Запарожскай і 76% Херсонскай. Адначасова ён апраўдваў масавыя ракетныя ўдары па Украіне 28 і 30 жніўня, у выніку якіх у Кіеве загінулі 25 чалавек, у тым ліку дзеці. Афіцыйна ўдары нібыта наносіліся па «аб’ектах ВПК», але пацярпела цывільная інфраструктура.
Паводле розных ацэнак, пад кантролем Расіі цяпер каля 20% тэрыторыі Украіны, прычым большасць яе ўдалося захапіць ці задоўга да поўнамаштабнай вайны, ці ў першыя тыдні ўварвання. За 1010 дзён вайны РФ здолела заняць толькі каля 0,97% плошчы краіны.
Наступленне суправаджаецца велізарнымі стратамі. Вашынгтонскі CSIS ацэньвае страты Расіі прыкладна ў 1 мільён чалавек (250 тысяч загінулі, 400 тысяч сталі інвалідамі). Брытанская разведка падае падобныя лічбы, а паводле даследавання «Медузы» і «Медыязоны», заснаванага на аналізе Рэестра спадчынных спраў, па стане на канец жніўня 2025 года загінулі ўжо каля 220 тысяч расійскіх вайскоўцаў.
Падлікі The Economist паказваюць: летам 2025 года расійская армія траціла аднаго салдата за кожныя 0,038 км² прасоўвання. Пры такіх тэмпах выйсці да адміністрацыйных межаў акупаваных абласцей можна не раней за 2029 год, а поўны захоп Украіны заняў бы каля 89 гадоў.
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну16
Каментары